Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de ma Jou woiriki 'awi do-domoteke yanagi tumudiingoli, de wakisuloko yami-mididi yosira 'o kota de 'o ngii 'isinoi-noimi gee womau wodulu. Kawongosekau 'onaka, "'I'umukukou ma amooka ma yo'utu-'utuku ka munukaka. Sababu ge'ena nioga'asoko ma Bairi ma Dutuka la wakisidingoto yo'utu-'utuku.

² (10:1)

³ Niomajobou! Ma niongano-nganono, ngoi tinisuloko ngini niotagi 'o nyawa yoti-tingkaika, so ngini matero ka 'o domba 'o haewani 'iti-tingkai ma sigoronaka.

⁴ 'Uwa nio'asa 'o pipi ma ngii bolo 'o beta-beta, de 'uwa nio'asa 'o capato sigado 'o sabi modidi. De 'ania do-dagi ma sigoronaka, 'uwa nimaogoruku niakitabeasi ka moika ma.

⁵ Nako niowosama 'o woa moika, ge'ena niongosekasi, 'Tabea! Tanu ma Jou winisibarakati 'o woa ma dodaka ne'ena la koniakiawa 'ikurangi de kaniosa-sanangi.'

⁶ Nako gee ma woa ma dodaka go'ona nidawongo de manga singina 'isa-sanangi, ge'ena 'ona 'asa yamake 'o barakati gee niakida-daga'asoko. Ma nako konisidabinowa, ge'ena 'o barakati gee niakida-daga'asoko ge'ena 'asa 'ilio nginika.

⁷ Niomanoa gee kiaka naga nidawo-dawongoka de nia'odomo 'o 'inomo gee nikula. Sababu ma ngale ge'enau, ngini 'isoka gee yongose 'ato, ''O nyawa yoma-manarama ge'ena yadaene yadawongo manga sewa.' De 'uwa nimato-to'oraka 'o woa moioka de 'o woa moikali.

⁸ Nako ngini niowosama 'o kota moika de ge'enaka ngini nidawongo, ge'ena kania'odomo 'o 'inomo gee nikula nginika.

⁹ Niakisi'aiki 'o nyawa yopa-panyake ma kotaka ge'ena, de niositotara 'o nyawa-nyawaka 'ato, 'Ma Jo'oungu ma Dutu wacobou wopareta nginioka naga.'

¹⁰ Ma nako ngini niowosama 'o kota moika de ge'enaka konidawonguwa, niosupuka 'o tapakioka de niongose 'ato,

¹¹ 'Ka nia kota ma kakawo gee 'amia douoka ma miaparisoka ma ngale minisingano-nganono nginika 'ato ngini kominisidabinowa. De ngaro ma 'orasi ne'ena niooluku minidawongo, ma niongano-nganono, ma 'orasi 'isoriokau ma Jo'oungu ma Dutu wopareta ne'ena nginioka!'

¹² Tinisidemo ne'ena, 'o dunia ma do-dogumoka dua, 'o Sodom ma nyawa 'asa manga hukumani 'ifoloi 'iku'arene de 'o nyawa ma kotaka ne'ena!"

¹³ "Niotorouoka ngini 'o Korazim ma nyawa de 'o Betsaida ma nyawa! Sababu nako 'o no-nako 'ihera-herangi 'isoka nginioka ne'ena la 'idadiokau 'o Tirusoka de 'o Sidonioka, tanu 'ona ma do'ingou yotoba 'o sowono yodiai de yomasinoa 'o balisa ma pakeangi de manga mumuoka 'o kakawo yodonoaku.

¹⁴ 'O dunia ma do-dogumoka dua, 'o Tirus de 'o Sidon ma nyawa 'asa manga hukumani 'ifoloi 'iku'arene de ngini ne'ena.

¹⁵ De ngini 'o Kapernaumoka, 'uwa nimangano-nganono 'ato dua ma Jo'oungu ma Dutu winisidaduie sigado 'o sorogaade! Ma 'ena dua ngini ni'umo 'o narakaka!"

¹⁶ Ge'enaka de 'o Yesus wongose 'awi do-domoteika, "'O nyawa gee yosigisene de yongaku 'ania demo, ge'ena 'ingaku ngoi. 'O nyawa gee niitomo ngini, ge'ena 'iitomo ngoi. De 'o nyawa gee 'iitomo ngoi, ge'ena wiitomo mita 'una gee woisulo-suloko ngoi."

¹⁷ 'O do-domoteke yanagi tumudiingi go'ona yolio kayomore-morene. 'Ona kayongosekau, "Jou, 'o tokata mita 'ikoki'isene ngomino nako la ngomi miasuloko 'isupu de to ngona 'ani kuasa!"

¹⁸ 'O Yesus wosango, "Ngoi tamake 'o Tokata ma Koana 'iotaka 'o diwanguku daku 'isoka 'o tawi-tawi.

¹⁹ Niongano-nganono! Ngini tinikulakau 'o kuasa la ngini ngaro niadoko 'o ngia 'ibisa-bisa de 'o kakatama ma konido'oawa. De mita niaisanga gee nisa-saturuu manga guata, ge'ena la 'o Tokata ma Koana ma kuasa, ma ka moi ma koi'iwa nisitorou nginika.

²⁰ Ngaro koge'ena ma 'uwa niomorene duga ka sababu 'o tokata 'ikoki'isene nginika. Ma 'ifoloiosi niomorene ge'ena la sababu 'ania ronga 'ilefokou 'o sorogaaka, ma ngale ngini winidawongokau ma Jo'oungu ma Dutu."

²¹ Ma 'orasi ge'ena 'o Yesus posironga womorenoka, 'awi morene ge'ena 'o Ngomasa 'Itebi-tebinino de wo'amalaha wongose 'ato, "'Aba Jou, gee napareta 'o diwanga de 'o dunia! Ngoi to'alele, sababu 'iodumu ne'ena ngona konosidumutuwa 'o nyawaka gee yomamaoku yobarija de yanako 'o sagala moi-moi, ma ngona nosidumutu kiaka naga gee 'o nyawa yakimakeka koyoba-barijawa. Ge'enau 'ani singina yadaene 'Aba.

²² 'O sagala moi-moi 'ai Dea wosisarakaniokau ngoino. Komoiwa moi ma gou-goungu 'inako ngoi 'o 'Aba wi Ngowaka, duga ka 'ai Dea. Mita komoiwa ma gou-goungu winako 'ai Dea, duga ka ngoi 'awi Ngowaka de 'o nyawa-nyawa gee ngoi tomau takisinako 'ai Dea."

²³ Ge'enaka de 'o Yesus womapulutuka 'awi do-domoteika de wakidongose ka 'onaka duga, "Niosanangioka ngini sababu niamakekau gee niamake-make ne'ena.

²⁴ Tinisidemo ne'ena: Ma sira manga gudai 'o nabii de 'o koana yomau yamake gee ngini niamake-make ma 'orasi ne'ena, ma 'ona koyamakewa. 'Ona yomau yo'isene gee ngini nio'ise-'isene ma 'orasi ne'ena, ma 'ona koyo'isenuwa."

²⁵ Ma moi ge'ena 'o Yahudioka manga 'agamaka wodoto-dotoko wimoi waika 'o Yesusika de witaili kawongosekau, "'Aba Guru, ngoi salingou 'okia tadiai la tamake 'o 'ahu 'ika-kakali?"

²⁶ 'O Yesus wosango, "'Okia naga 'isilefoku 'o Buku 'Itebi-tebinoka? 'Okia nabaca ge'enaka?"

²⁷ 'O nyawa gu'una wosango, "Salingou powidora nanga Jou ge'ena la ma Jo'oungu ma Dutu de nanga singina ma gou-goungu, de nanga roese de nanga 'ahu 'iodumu, de nanga guata 'iodumu, de nanga 'akali 'iodumu. De pakidora nanga ma-manai 'isoka ngone ma sirete pomadora."

²⁸ 'O Yesus wongose, "'Ani sa-sango ge'ena yadaene. Nadiai ge'ena, la 'o 'ahu 'ika-kakali namake."

²⁹ Ma 'o 'agamaka wodoto-dotoko gu'una womau ka 'una 'itiai. 'Una wosano, "Nago'ona ge'ena to ngoi 'ai ma-manai?"

³⁰ 'O Yesus wosango de 'o 'ade-'ade konee, "Naga wimoi 'o Yerusalemuoka de wosikauku 'o Yerikhoku. 'O ngekomo ma goronaka de yo'ora-ora widingino, de 'awi kia sonaa 'iodumu ya'ora yabootoka. De wipesana rekeni wisongenoka, 'asa de wimadakou wololokie 'o ngekomoka wodabo-dabode.

³¹ Ge'enaka de ma 'imam wimoi woboa de wimake 'o nyawa gu'una, de wiresene so kawogila-gilaka.

³² Koge'enali mita 'o Lewi ma nyawa wimoi, gee waboa ge'enano de wimakeka 'o nyawa gu'una de womasisori ma ngale wisakisii, wilega ma diai. Ma 'una mita kawiresenoka de wogila-gilakau.

³³ Ma ge'enaka de 'o Samaria ma nyawa wimoi 'awi do-dagi ma sigoronaka, waboa mita ge'enano. Gee wimake 'o nyawa gu'una de wi singina ma sala.

³⁴ So waika de 'awi dabo wakoki'isoko de 'o 'anggur, de wosisouru de 'o goooro, ge'enaka de 'awi dabo ge'ena wakokitamunu. Wakokitamunoka de wisibarene 'awi gorobade de wi'asa 'o woaka gee 'o nyawa yodulu-duluka ma ngale wileleani.

³⁵ Ma bibinoka de wa'ese 'o pipi 'o saaka 'o ngai modidi de wokula 'o woa ma dutuka gu'una de kawongosekau, 'Tagi winisouru, de nako de ma 'enasi ma bo-bangu 'iregu-regu, 'asa tafangu gee tainoli ne'enano.'"

³⁶ Ge'enaka de 'o Yesus wosido-dogumu 'awi jarita ge'ena de 'awi sa-sano naneda, "Moteke to ngona 'ani di-dibangi, yaruange go'ona nago'ona yodiai 'o nyawa gee wi'ora-'oraka gu'una 'isoka to 'ona manga manaika?"

³⁷ 'O 'agamaka wodoto-dotoko gu'una wosango, "Gee widora-dora 'o nyawa wi'ora-'ora gu'una." Ge'enaka de 'o Yesus wongose, "Notagiou de nadiai koge'enali mita!"

³⁸ Ge'enaka de 'o Yesus de 'awi do-domoteke yosigila manga do-dagi, de ya'adono 'o soana moika. Ge'enaka dau mimoi mi ronga ngo Marta, muna mo'asoko 'o Yesusika mongose 'ato, "Nou, nowosamino."

³⁹ Ngo Marta 'ami dodoto mimoi mi ronga ngo Maria. Ngo Maria muna mogogerie ma Jou Yesus 'awi dateoka mosigisene 'awi do-dotoko.

⁴⁰ Ma ngo Marta muna kamomanarama somoi 'o woa ma dodaka. Muna maika 'o Yesusika de kamongosekau, "Jou, konokalesanguawa 'o ngo Maria kamoisitengoka tomanarama? Monisuloko la moiriwosi!"

⁴¹ Ma Jou wosango, "Ee Marta, ngona nododato de natibangi 'i'ini-'inioka, 'ena momongo 'ifoloi 'iparaluu ge'ena duga ka 'o ngai moi.

⁴² De ngo Maria mairikokau yaowa-owa ge'ena la mosigisene 'ai demo, gee dua komoiwa ya'ese munaka."

Lukas

Video Lukas 10

Ikuti Kami:

KONTAK | PARTISIPASI | DONASI