Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bọu ene Mawu e nanẹ̌bọ lai pitum pul᷊o murit'E wal᷊ine, mase něndoloh'i sire tahạ duang katau niapangal᷊amona si Sie su apan soa ringangu tampạ sarung karěntaěng'E.
2 "Buane kụ sarung i pěnsạ e mal᷊awọ," angkuěng'E si sire, "arawe mamaměnsạe kětạeng mahal᷊i. Batụu ene pěmpẹ̌dorongke su Taghuange tadeạu i Sie měndoloh'u mělahal᷊ẹ̌ e mẹ̌deạu manipo wuane.
3 Ho! dakọe pěmpahundal᷊engke! kụ ene ěng! Iạ měndoloh'i kamene tabidạu rumba sutal᷊oaran dal᷊ugẹ̌.
4 Abe pěmpẹ̌bawa kawihu roitẹ̌, arau ponde arau sapatu. Abe pěngẹ̌dung sutal᷊oaran dal᷊eng kụ měmpẹ̌tabeạ su sarang sěngkatau.
5 Kamageng i kamene rumangeng su wal᷊e, pěmpẹ̌bera kal᷊imona, 'Karimạko piạ pẹ̌darame su wal᷊e ini.'
6 Kụ kereu sene piạ taumata mapulung pẹ̌darame, ute tạbeạu pẹ̌daramenu e měngkai matanạ si sie. Kereu tala ute, saụewe wal᷊ị kapia tạbeạu pědaramenu ene.
7 Kụ kěngkatanạ su wal᷊e sěmbaụ ene. Pěmpanarimạ apang kụ nisiliwirẹ̌ sene si kau, batụu i sai měmẹ̌munara e hinone wue makahombang bawaehe. Abe pěmpangal᷊ing bọu wal᷊e sěmbaụ sol᷊ong bal᷊e wal᷊ine.
8 Kereu i kamene ruměnta su soa sěmbaụ kụ sene i kamene nitarimạ dingangu mapia ute, kaěngke apang nisadia sene si kamene.
9 Apakaul᷊eko taumata apang masasakị su soa ene kụ pěmpẹ̌habarẹ̌ko su taumata sene, 'Mawu Ruata e seng masanggidu tempone mẹ̌parenta makoạ Datu su tal᷊oarang kamene.'
10 Arawe kamagengu i kamene ruměnta su soa sěmbaụ kụ sene tawe nitarimạ ute, pahunsẹ̌bang sol᷊ong dal᷊eng kụ pěmpẹ̌bera,
11 'Saral᷊aing awul᷊u soang kamene riměkạ su laed'i kami e, tontongangbeng kami e makoạ tatiala si kamene. Kụ kěngkasingkạko u kai seng maranin tempone Mawu Kasěllahenge manětạ mẹ̌parenta makoạ Datu su tal᷊oarang kamene!'
12 Pẹ̌tahěndungko, su Ěllong Kiamatẹ̌, tau Sodom sarungbe limembong kal᷊owokange ampungang u Mawu Ruata sul᷊ungu taumatan soa ene!"
13 "Kaěngkěhang i kamene, Korazim! Dingangu kaěngkěhang i kamene Betsaida! Kereu manga apa makạl᷊aherang kụ seng nikakoạ su tal᷊oarang dua e seng nịkakoạ su soan Tirus dingangu Sidon ěngkudeng manga taumata pai sene seng marěngụ němpẹ̌tobatẹ̌ bọu kal᷊awọu rosan sire, kụ němpěluheng pakeangu lutu ringangu němpěnawuh'u awul᷊ẹ̌ su wowon těmbo i sire.
14 Maěndokangbe tau Tirus dingangu Sidon ampungang u Mawu Ruata sul᷊ungu i kamene, su Ěllong Kiamatẹ̌.
15 Dingangu i kamene Kapernaum! I kamene mạngiral᷊ingu i kamene kai sarung masapuạ sol᷊ong sorga? Tala! I kamene sarung irěmmẹ sarang naraka!"
16 Mase Mawu Yesus něhengetang su manga murit'E, "I sain dụdaringihẹ̌ si kamene, rudaringihẹ̌ Siạ. I sai mạnuhud'i kamene, kai manuhudu Iạ, kụ lai mạnuhud'i Sie rimolohu Iạ e."
17 I sire pitum pul᷊o muritẹ̌ e něngkawal᷊ịbe ringangu naungi sire maral᷊uasẹ̌ kahěngang. "Mawu," angkuěng i sire, "kal᷊ingung manga rohkẹ̌ daral᷊akị e sụsasuměllung si kami kahiang pěmamarentang kami e si sire su areng u Mawu!"
18 Mawu Yesus simimbang, "Iạ e nakasilo setang ěnnaẹ nanawo wọu l᷊angị kere kilạ.
19 Kěngkasingkạko! I kamene seng Takụ nionggotangu kawasa tadeạu i kamene makatahịda těmpu ringangu i ninangu l᷊ipang dingangkewe mamẹ̌di kạguwạu wuntuangu rokạ, kụ mambeng ta makapẹ̌kapura si kamene.
20 Maning seng kerene, abe pahul᷊uasẹ̌ ual᷊ingu manga rohkẹ̌ daral᷊akị e sụsasuměllung si kamene. Ěndokang i kamene pěmpahul᷊uasu u areng i kamene mạbawohẹ su sorga."
21 Su orasẹ̌ ene lai i Yesus limuasu Rohkẹ̌ u Ruata e nẹ̌karadiahang si Sie. I Yesus něhengetang, "Amang, Mawu kawasang l᷊angị dingangu dunia! Iạ makịtarimakasẹ si Kau watụ u kěbị ini ipakạpěnis'u taumata mapapande ringangu matatahuěnna, kaiso kareạu mang nilahẹ u su kal᷊awọu taumata reng ta nạsikol᷊a. Ene e makal᷊uasẹ̌ naung i Amang.
22 Patikụ sạbarang seng nisarakang i Amang si Siạ. Tawẹu sarang sěngkatau masingkạ u Ahusẹ̌ kětạewen i Amang'E. Tawẹu l᷊ai masingkạ i Amang mantịewen Ahusẹ̌ e dingangu i saịewen i kapulung Ahusẹ̌ e pělahekangu i Amang'E."
23 Mase i Yesus nẹ̌bihu su manga murit'E, bọu ene něhengetang si sire hala, "Kariangkamang i kamene watụ u seng nakasilo apan nikasilong kamene orasẹ̌ ini.
24 Kai pẹ̌tahěndung bue: Lawọ nabi ringangu ratu mapulu makasilo apang kinasilong kamene orasẹ̌ ini, kaiso tawe ikasilon sire. I sire mapulu rumaringihẹ̌ apang kinaringih'i kamene orasẹ̌ ini, kaiso tawe ikaringih'i sire."
25 Bọu e piạ sěngkatau mananěntiro agama nẹ̌buạ měnangkạ si Yesus. I sie nakiwal᷊o, "Tuang Guru, kai měkapurạe iạ e tadeạu makahombang pẹ̌bawiahẹ̌ patutune ringangu kakalẹ̌ e?"
26 I Yesus simimbang, "Apa tangu mạbawohẹ su ral᷊ungu Winohẹ Susi? Kerea tiněnnanu su hal᷊ẹ̌ ene?"
27 Tau ene simimbang, "Kěndagẹ̌kon Mawu Ruatanu ringangu kạguwạu naungu, ringangu kạguwạu kuat'u kụ dingangu kaguwạu laěnnanu kụ kěndagẹ̌kong kasanggidangu mẹ̌sul᷊ungu i kau kuměndagu watangengu."
28 "Sasimbangu e nihino," angkuěng i Yesus. "Pẹ̌koạko kerene kụ i kau sarung mẹ̌biahẹ̌."
29 Kai mananěntiro agama ene mapulu mẹ̌těngkahinom batangenge. I sie nakiwal᷊o, "I sai wue kasanggidangku e?"
30 Yesus simimbang, "Piạ sěngkatau esẹ diměsung bọu Yerusalem sol᷊ong Yerikho. Su tal᷊oaran dal᷊eng i sie nihombangengu taha pěngaho, nihampasẹ̌ kal᷊awọu rarotonge, nịbawawẹ̌bahẹ̌ sarang masarạ mate, mase niwala ral᷊imbatange su ral᷊eng dingangu lesẹ e ghẹ̌guwạ.
31 Nẹ̌sarětạ u l᷊ai sěngkatau imang narěsungu ral᷊eng ene. Kutẹu i sie nakasilọe tau ene, i sie měngkatewe limihi pai wọu sěmběkane kụ měngkai rimal᷊eng.
32 Kerene lai ringangu sěngkatau hiten tau Lewi e rudẹ̌sung sene, suapạewen nikasilone tau ene, nihaungange kapẹ̌pẹ̌patehe si sie. Kaiso i sie nětěngkaghea sarang sěmběkan dal᷊eng, mase měngkate rimal᷊eng.
33 Arawe wọu ene piạko l᷊ai sěngkatau wọu Samaria nasahe sural᷊eng ene. Sarạeng kinasilone tau ene, ute naunge měngkatewe nẹ̌kakal᷊ẹ̌kaden tatal᷊ěntụ.
34 Kụ měngkatewe tamai himaung tau e mase namurěsi manga lesẹ e niuhasu anggorẹ̌ kụ niundangengu lana, bọu e naměkisẹ̌ manga l᷊esẹ ene. Mase i sie něnduịu tau ene su wowong kalidene sẹ̌sane, kụ niẹ̌ntudẹ̌ su wal᷊e kawawunakeng dingangu nipạdul᷊iange.
35 Sěngkariọěllone i sie něngukahẹ̌ doitẹ̌ sal᷊aka ruang kal᷊ěpa kụ nitẹ̌gone su taghuangu wal᷊e e apidu nẹ̌bera, 'Padul᷊ie wue i sie kụ apạeweng manga wawaehẹ̌ bal᷊ine ute, sarung takụ baehang kereu iạ mawal᷊ị kapia sini.'"
36 Bọu e i Yesus něngěnsuẹeng běkene ringangu kakiwal᷊o ini, "Bọu i sire těllu ene i saị e su ěnnanu nakoạ kere tau kasanggidange wọu tau nihampasẹ̌ e?"
37 Mananěntiro agama e nikiwal᷊ongu ene simimbang, "Tau kụ seng timal᷊ěntụ u tau ene!" "Ho, dakọe kụ pěkoạ e kerene lai!" angkuěng i Yesus.
38 Bọu e i Yesus dingangu manga murit'E nẹ̌saụewe rimal᷊eng kụ narěntạ e su kampong sěmbaụ. Sene piạ sěngkatau wawine arenge i Marta, nighausang i Sie sol᷊ong bal᷊ene.
39 I Marta piạ tuarine arenge i Maria. I Maria e kimaiangke maraning Mawu Yesus dụdaringihẹ̌ manga těntiron'E.
40 Arawe i Marta e měngkatewe matasibung hal᷊ẹ̌ u wal᷊e. I sie himaung si Yesus kụ nẹ̌bera, "Mawu, apa Mawu ta mẹ̌sasěmpị si Maria naněntangu hal᷊ẹ̌ pinakihal᷊ẹ̌ si siạ sẹ̌saku? Dolohẹ̌ko i sie pẹ̌tul᷊ungu iạ!"
41 "Marta, Marta!" angkuěngu Mawu. "I kau měngkatewe ghụgěnggang dingangu tasibu mẹ̌tẹ̌tiněnnan hal᷊ẹ̌ lawọ;
42 sěmbal᷊iau hal᷊ẹ̌ kahumotongange mang sěmbaụ. Kụ i Maria seng namile apang kapiaěnge, kụ tawe sarung ikaal᷊ạ wọ'i sie."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA