Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Me no aefa da'õ Ifili zui fitu ngafulu nifahaõ-Nia Yesu. Ifatenge ira darudarua sowaõwaõ fõna-Nia ba mbanua awõ nahia si mõi Ia dania.
2 Imane khõra Yesu, "Ebolo sa mbasitõ, ba lõ ato zohalõw̃õ. Andrõ bõrõ da'õ mi'andrõ khõ Zokhõ nowi ena'õ Ifatenge niha sangowuloi bua nowi-Nia.
3 Mi'ae'e! Ufatenge ami hulõ nono mbiribiri ba hunõ nasu gatua.
4 Bõi mi'ohe gofekofe ba ma kandrekandre nahia gefe, ma zui badagahe. Bõi mi'olombase ba dalu lala ba wangowai niha.
5 Na mõi ami yomo ba zi sambua omo, ba da'õ zi fõfõna miw̃a'õ, 'Ya falukha wa'ohahau dõdõ zi sambua omo andre.'
6 Ba na so ba da'õ niha somasi fa'ohahau dõdõ andrõ, ba ahono khõnia wangowaimi andrõ. Ba na lõ omasi ia wa'ohahau dõdõ ba mifuli mihalõ wangowai fa'ohahau dõdõ andrõ khõmi.
7 Mi'iagõ manõ zi sambua omo. Mitema mbalazo nibe'era khõmi, bõrõ me sinangea latema mbua wa'erege dõdõra sohalõw̃õ. Bõi mifalalilali nomo moroi ba zi sambua numalõ ba danõ bõ'õ.
8 Na mõi ami ba zi sambua banua ba na latema ami ba da'õ, ba mi'a hadia mbalazo nibe'era khõmi ba da'õ.
9 Mifadõhõ zofõkhõ ba mbanua, ba mi'ombakha'õ ba niha si so ba da'õ, 'Lõ ara tõ Ibõrõtaigõ wamatõrõ-Nia Lowalangi ba wa'arazo-Nia ba gotaluami.'
10 Ba na mõi ami ba zi sambua banua, ba na lõ latema ami ba da'õ, mi'ae'e ba lala ba mimane,
11 'Gawugawu si falemba ba gahema na'i ma'anotogõ si tobali famangelama khõmi. Mihaogõ wanõngõni, lõ ara tõ Ibõrõtaigõ wamatõrõ-Nia Lowalangi ba wa'arazo-Nia ba gotaluami!'
12 Mitõngõni, ba luo safuria andrõ abõlõ Ihakhõsi tõdõ dania Lowalangi mbanua Zodoma moroi ba mbanua da'õ!"
13 "Alai ndra'ugõ, Khorazi! Ba alai ndra'ugõ, Betisa'ida! Na tefalua zahõlihõli dõdõ nifalua khõmi andrõ ba mbanua Diro ba ba Zidona, ba no ara mangesa dõdõra moroi ba horõra, ba la'onukha mbaru wa'abu dõdõ ba lalau nawu ba hõgõra.
14 Ba luo safuria, abõlõ Ihakhõsi tõdõ Lowalangi niha Diro ba niha Zidona moroi khõmi.
15 Ba ya'ugõ Kafana'uma! Hadia õw̃a'õ dõdõu, la'alaw̃a'õ ndra'ugõ ba zorugo? Lõ'õ. No nitibo'õ ndra'ugõ ba narako!"
16 Aefa da'õ Imane Yesu khõ ndra nifahaõ-Nia, "Niha samondrongo khõmi, no gõi ifondrondrongo khõ-Gu. Niha si lõ manema ya'ami, ba lõ'õ gõi itema Ndra'odo. Ba si lõ manema Ya'o, no lõ gõi itema zamatenge Ya'o."
17 Mangawuli nifahaõ Yesu si fitu ngafulu andrõ si fao fa'omuso dõdõ. Lamane, "He So'aya, fa'abõlõ zi lõ sõkhi gõi no la'o'õ lima na mafofanõ ira ba dõi-Mõ!"
18 Itema li Yesu, "No U'ila wa'abõlõ zi lõ sõkhi saekhu tou moroi ba mbanua si yaw̃a, hulõ gari mbanua.
19 Mitõngõni! No mitema wa'abõlõ moroi khõ-Gu ba wanguhundragõ ulõ ba tongo awõ wa'abõlõ ba wo'alani udu. Ba ma'ifu lõ hadia ia samakiko ya'ami.
20 Ba hew̃a'ae si manõ, bõi mi'omusoi'õ dõdõmi bõrõ me la'o'õ limi fa'abõlõ zi lõ sõkhi si ra'iõ. Abõlõ sõkhi na mi'omusoi'õ dõdõmi bõrõ me no mutanõ dõimi ba zorugo."
21 Me inõtõ da'õ gõi, omuso dõdõ Yesu bõrõ me Ifatõrõ Ia Eheha Lowalangi. Imane Yesu, "He Ama, So'aya zorugo ba ulidanõ! U'andrõ saohagõlõ khõ-U me no Õbini'õ da'õ ma'afefu ba niha sonekhe ba ba zatuatua, ba no Õ'oroma'õ ba niha si lõ fa'atuatua. No da'õ zomasi dõdõ-U, Ama.
22 Fefu hadia ia ba no Ibe'e khõ-Gu ama-Gu. Ba samõsa lõ sangila Ono, baero Nama andrõ. Ba si manõ gõi, samõsa lõ sangila Ama, baero Nono; awõ niha somasi I'ombakha'õ Ono, haniha Nama andrõ."
23 Ifakhõlõ Ia Yesu khõ ndra nifahaõ-Nia, ba Imane khõra ba zi ha ya'ira, "Moharazaki sibai ami, bõrõ me no mi'ila fefu zi no mi'ila andrõ.
24 Bõrõ da'õ mitõngõni: Ato razo ba sama'ele'õ somasi mangila hadia ia ni'ilami iada'e, ba hiza lõ ni'ilara. Omasi sibai ira larongo nirongomi andre, ba lõ nirongora."
25 Aefa da'õ maoso samõsa zangila amakhoita ba wamesu li Yesu. Isofu imane, "He Amagu Guru, hadia nilaugu ena'õ usõndra wa'auri si lõ aetu?"
26 Itema linia Yesu, "Hadia nisura ba Mbuku Ni'amoni'õ? Hewisa gera'erau sanandrõsa ba da'õ?"
27 Itema li niha andrõ, "'Omasi'õ Zo'aya Lowalangiu moroi si'aikõ ba dõdõu, nosou ma'asambua awõ fefu wa'abõlõu, ba fefu wangerangerau,' ba 'Omasi'õ nawõu niha si mane fangomasi'õu ya'ugõ samõsa.'"
28 Imane khõnia Yesu, "Atulõ wanemau li andrõ. Lau zi manõ, ba auri ndra'ugõ."
29 Ba omasi zangila amakhoita andrõ na ha ya'ia zatulõ. Isofu imane, "Haniha nawõgu niha andrõ?"
30 Itema linia Yesu, "So samõsa zi mõi mitou ba Yeruzalema moroi ba Yerikho. Ba dalu lala falukha ia zorabu. Larabu ia ba labõbõzi irege arakhagõ mate, ba larõi manõ ia ba da'õ.
31 Tefaudu itõrõ ba da'õ ere. Me i'ila niha andrõ ere, i'arõu'õ ia ba zinga lala, ba idõlõ fofanõ.
32 Si manõ gõi samõsa mado Lewi. Itõrõ da'õ ba i'ila niha nirabu andrõ. Ba itõrõ manõ, italu'i niha andrõ ba zi tambai lala.
33 Ba so gõi niha Zamaria sanõrõ da'õ. Me i'ila niha andrõ, ahakhõ dõdõnia.
34 I'ondrasi niha andrõ ba isasai fefu zokhonia agu, ba idaludaluni fanikha, ba ibõbõ zokho andrõ. Aefa da'õ ifazaw̃a yaw̃a ba hulu galidenia ba i'ohe ba nahia wemõrõ zikoli ba irorogõ ba da'õ.
35 Ba mahemolu õ ihalõ dombua ngawua gefe firõ ba ibe'e ba zokhõ omo zikoli andrõ, imane, 'Rorogõ ia. Ba na so nasa zoguna tanõ bõ'õ, ba ubu'a dania khõu, na ufulido ba da'e.'"
36 I'etu'õ nidunõdunõ-Nia andrõ Yesu, Imane, "Moroi ba zi datõlu andrõ, haniha molo'õ ya'ugõ nawõ niha nirabu andrõ?"
37 Itema li sangila amakhoita andrõ, imane, "Niha si hakhõsi tõdõ ya'ia." Imane khõnia Yesu, "Ba ae'e, lau zi manõ gõi!"
38 Aefa da'õ Itohugõ wofanõ Yesu awõ ndra nifahaõ-Nia, larugi sambua mbanua side'ide. So ba da'õ samõsa ndra alawe sotõi Marata, ikaoni Yesu ba nomonia.
39 So gõi dalifusõnia alawe, sotõi Maria. Dumadao Maria fõna Yesu ba wamondrongo famahaõ-Nia.
40 Ba hiza arõrõ Marata ba wombambaya halõw̃õ ba nomo. Mõi Marata khõ Yesu ba imane, "He So'aya, hadia aboto ba dõdõ-U wa ibe'e manõ sangai halõw̃õ ndra'o Maria ha ya'oya'o? &Wa'õ khõnia akha itolodo!"
41 Itema linia So'aya, "Marata, Marata! Oya manõ õbusi tõdõu ba lõ manõ fa'ahonou,
42 ba ha sambalõ zoguna. No ituyu khõnia zi sõkhi Maria, ba lõ teheta khõnia da'õ."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA