Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sasudah tu Tuhan mamiliah pulo tujuah puluah urang lai pangikuik-Nyo, Baliau manyuruah pangikuik-pangikuik-Nyo tu payi baduwo-baduwo untuak mandawului-Nyo ka satiyok kota sarato jo ka satiyok tampaik nan ka dikunjuangi-Nyo.

² "Sambuah asie nan ka dituwai," kecek Isa Almasih kabake pangikuik-Nyo, "tapi urang nan ka manuwai hanyo saketek. Dek karano itu, mintaklah kabake Nan Punyo ladang, supayo Inyo buliah manyadiyokan urang untuak nan ka manuwai asie tanaman-Nyo.

³ Kiniko, bi barangkeklah! Ambo ma utuih angku-angku, samo jo bancando manyuruah domba ka tangah-tangah anjiang utan.

⁴ Jan mambawok puro atau kampia sidakah, ataupun tarompa. Jan baranti di tangah jalan untuak mambari salam kabake siyapo pun juwo.

⁵ Jikok angku-angku masuak ka sabuwah rumah, katokanlah labiah dawulu, 'Assalamualaikum.'

⁶ Jikok disinan ado urang nan suko jo nan damai, mako salam angkau tu, tatap tingga untuak inyo; jikok indak, mako elolah baliak salam angkau tu.

⁷ Manatap sajolah tingga disabuwah rumah. Janlah bapindah-pindah dari rumah nan ciyek ka rumah nan lain. Tarimolah apo nan di edangkan dek nan punyo rumah, dek karano urang nan bakarajo patuik manarimo upahnyo.

⁸ Baitu pulo, jikok angku-angku datang ka sabuwah kota, jikok angku-angku layi ditarimo sacaro elok, mako makanlah apo nan di edangkan.

⁹ Cegakkanlah urang-urang nan sakik di kota tu, sarato baritokanlah kabake urang-urang nan disinan, katokanlah kabake inyo, baraso 'Karajaan Allah lah dakek ka angku-angku.'

¹⁰ Tapi, jikok angku-angku datang ka sabuwah kota, tibo disinan angku-angku indak ditarimo, mako payilah ka labuah, sarato katokanlah nan bakcando iko,

¹¹ 'Jo kabuik-kabuik tanah kota angkau ko, nan malakek di kaki kami, kami kipehkan sabagai tando mambari ingek kabake angku-angku. Tapi ingek-ingeklah angku-angku, baraso Karajaan Allah lah ampia ka tibo!'

¹² Kana-ilah apo nan Ambo katokan ko, isuak di ari kiamaik, labiah ringan lai ukunannyo urang Sodom, daripado urang nan di kota tu!"

¹³ "Cilakolah angkau, Korazim! Sarato cilakolah angkau, Betsaida! Kok santano sagalo mukjizat nan lah dipabuwek di tangah-tangah angkau tu, dipaliyekkan di kota Tirus jo Sidon, mungkin lah sajak dek sari lai urang-urang tu bi batobaik dari doso-dosonyo, mako inyo kanakkanlah kain tando basadiah ati, sarato inyo tonggokkanlah abu di ateh kapalonyo.

¹⁴ Isuak di ari kiamaik, urang Tirus jo urang Sidon tu, labiah ringan lai ukunannyo daripado angkau.

¹⁵ Baitu pulo angkau, oih Kapernaum! Angkau sangko, angkau ka ditinggikan sampai ka sarugo? Indak! Malah angkau ka di ambuangkan masuak narako!"

¹⁶ Sudah tu Isa Almasih bakato kabake pangikuik-pangikuik-Nyo, "Urang nan lai namuah mandangakan kato angku-angku, ba arati inyo lai namuah mandangakan kato-kato Ambo. Urang nan indak niyo manarimo angku-angku, ba arati inyo indak niyo manarimo Ambo. Urang nan indak niyo manarimo Ambo, ba arati inyo indak niyo manarimo Baliau nan ma utuih Ambo."

¹⁷ Katujuah puluah urang pangikuik Isa Almasih, lah babaliak jo bagadang ati. Inyo bi mangatokan, "Tuhan, roh-roh jahek pun tunduak kabake kami, jikok kami mamarentahkan inyo ateh namo Tuhan!"

¹⁸ Baliau manjawab, "Ambo manampak ubilih jatuah dari langik saroman jo kilek.

¹⁹ Katawuilah! Angku-angku lah Ambo agiah kuwaso supayo angku-angku dapek mamijakkan ula jo kalo, sarato jo mamatahkan sagalo kakuatan musuah, indak ado ciyek juwo doh nan ka dapek mancilakokan angku-angku.

²⁰ Biyapun baitu, janlah bagadang ati dek karano roh-roh jahek tu patuah kabake angku-angku. Labiah elok lai angku-angku bagadang ati, dek karano namo angku-angku tacataik di sarugo."

²¹ Dikutiko tu juwo, Isa Almasih basukocito dek karano kuwaso Roh Allah. Baliau bakato, "Bapak, Tuhan nan manguwasoi langik jo bumi! Ambo batarimo kasih kapado Angkau, dek karano sagalo sasuatu Angkau rasiyokan, taradok urang-urang nan santiang, sarato taradok urang nan ba ilimu, tapi Angkau nyatokan taradok urang-urang nan indak basikola. Dek karano, itulah nan katuju dek Angkau Bapak.

²² Sagalo sasuatu lah disarahkan dek Bapak kabake Ambo. Indak surang juwo doh urang nan tawu, siapo Anak, salain daripado Bapak. Indak ado pulo doh urang nan tawu siapo Bapak, salain daripado Anak; sarato jo urang-urang, nan kabake inyo Anak lah manunjuakkan, siyapo Bapak."

²³ Sudah tu Isa Almasih ma engong kabake pangikuik-pangikuik-Nyo, kudian Baliau mangecek sacaro tasandiri, "Baruntuanglah angku-angku, dek karano angku-angku lah maliyek, apo nan diliyek kiniko.

²⁴ Kana-ilah nan Ambo katokan ko: Dek karano, sambuah nabi sarato jo rajo, nan baniyaik nak maliyek nan angku-angku liyek kiniko, tapi inyo indak dapek doh maliyek. Inyo niyo nak mandanga, apo nan lah angku-angku danga, tapi inyo indak dapek doh mandanga."

²⁵ Kudian ado surang guru agamo nan tagak ka muko, untuak manjarek Isa Almasih jo kato-kato. Inyo batanyo, "Angku Guru, apo nan musti ambo karajokan, supayo ambo mandapek iduik sajati nan kaka?"

²⁶ Baliau manjawab, "Apo nan tatulih di Alkitab? Baa pandapek angkau tantang ayaik tu?"

²⁷ Urang tu manjawab, "'Kasiahilah Tuhan Allah angkau, jo sapanuah ati angkau, jo saganok jiwa angkau, jo sagalo kakuatan angkau, sarato jo sadonyo aka pikieran angkau,' sarato 'Kasiahilah urang nan sasamo angkau, samo jo bakcando angkau mangasiahi diri angkau sandiri.'"

²⁸ "Jawaban angku tu batua," kecek Isa Almasih. "Karajokanlah kasadonyo tu, mako angku ka mandapek iduik nan kaka."

²⁹ Tapi dek karano guru agamo Yahudi tu, nak ka mangarehkan pandapeknyo juwo. Mako inyo batanyo, "Siya tu urangnyo nan sasamo jo ambo tu?"

³⁰ Isa Almasih manjawab, "Ado surang laki-laki nan turun dari Yerusalem ka Yerikho. Di tangah jalan inyo di ambek dek panyamun, sagalo aratonyo di ambiak, inyo ditangani sampai lajaik, sudah tu inyo ditinggakan sajo tatilantang di tangah jalan, badannyo lah bi luko sarato jo bangkak-bangkak.

³¹ Kabatualan pulo ado surang imam nan lalu di jalan tu. Kutiko inyo manampak urang nan kanai rampok tu, inyo ma inda ka subaliak jalan, sudah tu inyo taruih juwo bajalan.

³² Baitu pulo jo surang Lewi, nan lalu pulo disinan; kutiko inyo manampak urang nan kanai rampok tu, inyo mandakek ka urang tu, untuak mancaliak siya bana urangnyo. Tapi inyo pun ma inda ka subaliak jalan, sudah tu inyo taruih juwo bajalan.

³³ Tapi kudian ado pulo surang urang Samaria nan sadang dalam pajalanan, inyo lalu pulo disinan. Kutiko inyo manampak urang tu, sabana tasinayuang atinyo dek karano ibo.

³⁴ Mako didakek-inyolah urang tu, sudah tu inyo barasiahkan luko-luko urang tu jo anggur, sarato ma ubek-inyo jo minyak, kudian dipaluiknyo luko-luko urang tu. Sasudah tu, inyo manayiakkan urang tu ka ateh kaladainyo, lansuang mambawok urang tu ka sabuwah tampaik bamalam sarato marawatnyo.

³⁵ Bisuak arinyo, inyo barikan duwo buwah pitih perak kabake urang nan punyo panginapan tu, sarato ba umanaik, 'Ubek-ilah urang nan sakik tu, jikok ado ongkoih-ongkoih nan lain, isuak ambo bayie, jikok ambo lah babaliak kamari.'"

³⁶ Kamudian, Isa Almasih manyudahi curito-Nyo tu, jo sabuwah tanyo nan bakcando iko, "Dari urang nan batigo tu, nama urangnyo manuruik pandapek angku, nan mampabuwek sabagai sasamo manusia, kabake urang nan kanai rampok tu?"

³⁷ Guru agamo nan ditanyoi tu manjawab, "Tantu urang nan lah manolong, urang nan kanai rampok tu." "Nah, payilah lai, karajokan pulolah nan bakcando itu!" kecek Isa Almasih.

³⁸ Kamudian Isa Almasih sarato jo pangikuik-Nyo, barangkek manaruihkan pajalanan, tibolah inyo di sabuwah kampuang. Disinan ado surang padusi nan banamo si Marta, inyo mambawok singgah Isa Almasih ka rumahnyo.

³⁹ Si Marta ado punyo dunsanak padusi nan banamo si Maryam. Si Maryam ko duduak dakek Tuhan Isa Almasih untuak mandangakan pangajaran Baliau.

⁴⁰ Tapi nan si Marta inyo sangaik sibuknyo jo karajo rumah tanggonyo. Inyo payi ka dakek Isa Almasih sarato bakato, "Tuhan, baa mangko Tuhan indak manyuruah si Maryam untuak manolong ambo? Inyo padiyakan sajo ambo bakarajo surang? Suruahlah inyo Tuhan, untuak manolong ambo!"

⁴¹ Tuhan bakato, "Marta, Marta! Angkau pancameh, sarato sibuk mamikiekan iko jo itu;

⁴² padohal, nan paliang pantiang, hanyo ado ciyek. Nan si Maryam lah inyo piliah nan paliang baiak, nan ka tatap manjadi miliaknyo."

Lukas

Video Lukas 10

Ikuti Kami:

KONTAK | PARTISIPASI | DONASI