Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dung i dipili Jesus ma muse pitu pulu halak nari. Disuru Ia ma halahi mardua-dua halak manjoloi Ia tu sude kota dohot inganan na giot topotonNia.

² Jadi didokkon Ia ma tu halahi, "Bahat do nian sisabion, tapi otik do anggo parkarejo, hara ni i pangido hamu ma di Nampuna sabion i anso disuru Ia parkarejo tu sabionNa i.

³ Antong kehe ma hamu. Songon biri-biri na nisuru tu tonga-tonga ni sorigala do Husuru hamu.

⁴ Ulang oban hamu huncang sanga inganan ni hepeng, sanga pe sipatu. Ulang pola jalang hamu halak di tonga dalan.

⁵ Muda masuk hamu tu sada bagas manigor dokkononmunu ma, 'Hasonangan ma di bagas on.'

⁶ Jadi muda adong disi na patut manjagit hasonangan i, jadi tinggal ma hata horas-horasmunu i disi. Tapi muda nada, mulak do hata horas-horas i tu hamunu.

⁷ Di bagas i ma hamu tinggal. Jagit hamu ma sanga aha na niparade tu hamu disi, harana angkon dilehen do upa ni halak na markarejo. Ulang kehe hamu sian bagas na sada tu bagas na asing.

⁸ Muda masuk hamu tu sada kota, denggan panjagitonna tu hamu disi, pangan hamu ma sanga aha na diparade tu hamu.

⁹ Pamalum hamu ma angka na marnyae na di kota i, jana dokkon hamu ma tu angka halak na disi, 'Madung donok tu hamu, Harajaan Ni Debata.'

¹⁰ Tapi muda masuk hamu tu sada kota hape nada dijagit hamu disi, kehe ma hamu tu angka dalan godang na di kota i jana dok hamu ma,

¹¹ 'Abuan ni hutamunu on pe na lohot di patnami, hami paspaskon ma di jolomunu. Tapi ingot hamu ma bahaso madung donok Harajaan Ni Debata!'

¹² Hudok ma di hamu: Umnayang do uhum na tu halak Sodom di ari parpudi, ulang pado kota na songon i!"

¹³ "Marjaya do ho Khorasim! Marjaya do ho ale Betsaida! Sugari di kota Tirus dohot Sidon dipamasa angka hahomangan na di pamasa di tonga-tongamunu pasti madung tibu halahi pauba rohana jana marsak angka jolma na disi di hatiha i.

¹⁴ Tapi umnayang do uhum na tu Tirus dohot Sidon di ari parpudi ulang pado tu hamu.

¹⁵ Dohot Kapernaum! Ning rohamu paginjangon ma ho lakna lalu tu banua ginjang? Nada! Ambungkonon noma ho tu banua toru!"

¹⁶ Dung i mandok hata ma Jesus tu angka siseanNia, "Angka halak na manangihon na nidokmunu sarupa do i tu na manangihon sanga aha na Hudok tusia. Halak na so ra manjagit hamu, laing na so ra manjagit Au do i. Jana halak na so ra manjagit Au, sarupa do i tu na so ra manjagit na marsuru Au."

¹⁷ Mulak ma sisean ni Jesus sipitu pulu halak i marjop ni roha situtu. "Tuhan, sudena, lopus tu angka setan gabe mangoloi do tu hami muda hami parenta halahi mangasahon goarMu!"

¹⁸ Dialusi Jesus ma, "Huida do madabu Sibolis sian langit songon hilap.

¹⁹ Ingot hamu ma! Madung dijagit hamu kuaso sian Au laho mandegei ulok dohot hala, songon i muse kuaso laho manaluhon sude kuaso ni musu. Jana umpe sada na tarbaen mangkahua hamu. (Hala)

²⁰ Haru pe songon i, ulang marjop ni roha hamu hara ni na nioloan ni angka tondi na jahat hamu, tapi gumonan ma marjop ni roha hamu hara ni na dung tarsurat goarmunu di banua ginjang."

²¹ Laing di hatiha i muse, marjop ni roha ma Jesus di bagasan Tondi Parbadia, jana mandok, "Hupuji do Ho Amang, Tuhan ni langit dohot tano, dibaen dibunihon Ho do i adop angka na pistar dohot na marroha, tapi dipapatar Ho do i tu angka halak na menek. Olo, ale Amang, songon i ma antong hagiot ni Damang sandiri."

²² "Madung dipasahat Damang do sudena tu Au. Jana umpe adong sahalak na mananda Anak i, hum Damang do na manandasa. Songon i muse ma, nada adong na mananda sanga ise Ama i, hum Anak i do na manandaSa; dohot halak na gabe lomo ni roha ni Anak i laho patandahon Damang tu halahi."

²³ Dung i manaili ma Jesus tu angka siseanNia i lalu didok Ia ma tu halahi sajo, "Martua ma mata na marnida sanga aha angka na dung niidamunu on.

²⁴ Hara ni i ingot ma: Bahat do angka panurirang dohot raja na malungun marnida na niidamunu saonnari on hape nada tarbaen halahi marnidasa. Lungun sajo do roha ni halahi umbege on, hape nada tarbaen halahi be umbegesa."

²⁵ Dung i jongjong ma sahalak Siboto Surat laho mangunjuni Jesus, ning ia ma manyapai, "Guru, aha ma he sibaenonku anso dapot au ngolu na manongtong?"

²⁶ Dialusi Jesus ma, "Bia dehe tarsurat di Buku Na Badia i? Aha do disise ho disi?"

²⁷ Mangalusi ma bayo i, "Angkon holong do rohamu di Tuhan Debatamu sian sandok ate-atemu, sian sandok rohamu, sian sude gogomu, dohot sian sandok pikiranmu. Jana, angkon holong do rohamu di donganmu jolma songon pangkaholongimu di dirimu sandiri."

²⁸ Didok Jesus ma, "Tutu do alusmi. Baen ma songon i, gabe mangolu ma ho."

²⁹ Tapi na giot patigor diri do Siboto Surat i. Marsapa ma ia, "Ise do satutuna na tardok, dongan jolma?"

³⁰ Dialusi Jesus ma, "Adong ma sada bayo manuat sian Jerusalem tu Jeriko. Di tongan dalan ro ma panyamun manangkup ia. Dipupusi panyamun i ma ia, dibalbali lopus giot mate, dung i ditinggalkon ma ia songon i sajo.

³¹ Jadi topet ma mamolus sada halak malim disi. Dung diida malim i bayo i, manopi-nopi ma ia jana dilaosi ia.

³² Songon i muse ma sada halak Levi. Mamolus muse ma ia sian i jana diida ia do bayo na tarsamun i. Laing dilaosi ia muse do bayo i, dibolus ia sian ipar ni dalan i.

³³ Tapi adong muse ma sada halak Samaria na mamolus disi. Dung diida ia bayo i gabe ibo ma rohania midasa.

³⁴ Dipadonok ia ma tu bayo i, dung i dibaen ia ma miak dohot anggur tu bugang ni bayo i, jana dibaluti ia ma na mabugang i. Dung i dipajuguk ia ma bayo i tu halodenia sandiri, laho maroban tu bagas parbornginan, disi ma dipature-ture ia.

³⁵ Ancogotna i diparuar ia ma dua hepeng perak, dilehen ia ma i tu nampuna bagas parbornginan i. 'Pature-ture ma jolo,' ning ia tu nampuna parbornginan i. 'Muda mulak au muse tuson hugarari pe harugian na nipakemu laho pature-ture ia.'"

³⁶ Dung i dipaujung Jesus ma carito i songon on, "Sian sitolu halak i, na dia ma ninna rohamu, dongan jolma di bayo na tarsamun i?"

³⁷ Dialusi ia ma, "Halak na maribo ni roha tu bayo i." "Antong, kehe ma ho jana baen muse ma songon i!" ninna Jesus tusia.

³⁸ Sanoli, hatiha mardalan Jesus rap dohot angka siseanNia i, masuk ma Jesus tu sada huta. Adong ma disi sada anak boru na margoar si Marta mangontang Jesus tu bagasna.

³⁹ Adong do anggi ni si Marta, na margoar si Maria. Juguk sajo ma si Maria di lambung pat ni Jesus manangihon pangajaranNia.

⁴⁰ Tapi si Marta bahat sajo karejonia laho mangkobasi angka tamu i. Kehe ma si Marta tu Tuhan Jesus mandok, "O Tuhan, ligi ma jolo anggingkon! Dipadiar ia do sada au sajo karejo. Suru ma anso ditolong ia au!"

⁴¹ Dialusi Tuhan i ma, "O Marta, Marta! Mabahattu do dipasari-sari rohamu jana sude dihasusahon ho.

⁴² Hape hum sada do na porlu! Jana madung ditodo si Maria na denggan i, na so buaton be sian ia."

Lukas

Video Lukas 10

Ikuti Kami:

KONTAK | PARTISIPASI | DONASI