Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun nike, Junjungan Saq Mulie Deside Isa pilẽq pituq pulu pengiring saq lain, terus ie pade teutus due-due siq Deside Isa jari senjuluq Ie ojok sebilang kote dait taoq saq gen Ie rauhin.

² Manik-Ne tipaq ie pade, "Saq tepataq mule luwẽq, laguq tukang pataqne cume sekediq. Keranaq nike tunas lẽq ~Epẽne adẽq Ie ngirim tukang pataq jari mataq.

³ Silaq pade lumbar! Tiang ngutus side pade maraq anak dombe ojok tengaq-tengaq serigale.

⁴ Ndaq jauq dompẽt atao takaq sangu, atao sepatu. Ndaq mentelah jari ngucapang salam tipaq sai juaq lẽq tengaq kelampande.

⁵ Lamun side pade tame ojok sopoq balẽ, ucapang juluq, 'Moge-moge damẽ balẽ niki.'

⁶ Lamun lẽq derike araq saq patut nerimaq damẽ, make salamde nike gen tetep lẽq ie. Laguq lamun ndẽq, salamde nike gen tulak tipaq side.

⁷ Ndot lẽq sopoq balẽ doang. Terimaq napi saq tesajiang tipaq side, sẽngaq dengan saq begawẽan berhak nerimaq upaqne. Ndaq ngalih-ngalih lẽman sopoq balẽ ojok balẽ saq lain.

⁸ Lamun side pade dateng ojok sopoq kote dait lẽq derike side pade tesambut secare bagus, kelorang napi saq tesajiang tipaq side.

⁹ Selahang dengan-dengan sakit lẽq kote nike, dait badaq dengan-dengan lẽq derike, 'Kerajaan Allah sampun rapet lẽq side.'

¹⁰ Laguq lamun side pade dateng lẽq sopoq kote dait lẽq derike side pade ndẽq teterimaq, sugul ojok rurung-rurung lẽq kote nike dait ucapang maraq niki,

¹¹ 'Kerepuk kotende saq nekẽt lẽq naẽn tiang pade, tiang pade kerapang sebagẽ peringetan tipaq side. Laguq adẽq side pade nenaoq Kerajaan Allah sampun rapet!'

¹² Tiang badaq side: Lẽq jelo Kiamat, dengan-dengan kote Sodom dait Gomora gen molahan teampunin siq Allah ketimbang dengan-dengan lẽq kote nike!"

¹³ "Celake side, kote Korazim! Dait celake side, kote Betsaida! Seandẽne muqjizat-muqjizat saq tepiaq lẽq tengaq-tengaqde nike sampun tepiaq lẽq kote Tirus dait Sidon, pasti dengan-dengan lẽq derike sampun ngonẽq betobat lẽman dose-dose ie pade, dait ngengadu kelambi dukecite serte noloq awu-awu lẽq atas ulu ie pade.

¹⁴ Lẽq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade!

¹⁵ Dait side, Kapernaum! Napi side paran, side gen teatasang jangke dateng langit? Ndẽq! Malahan side gen tetetẽh ojok dunie dengan matẽ!"

¹⁶ Beterus Deside Isa bemanik lẽq pengiring-pengiring-Ne, "Dengan saq dengahang side pade, artine ie dengahang Tiang. Dengan saq nolaq side pade, ie nolaq Tiang. Dait dengan saq nolaq Tiang, artine ie ẽndah nolaq Allah saq ngutus Tiang."

¹⁷ Waktu kepituq pulu pengiring nike tulak, angen ie pade cemoh gati. Terus ie pade matur, "Junjungan Saq Mulie, sẽtan-sẽtan ẽndah taat lẽq tiang pade lamun tiang pade prẽntah ie pade siq pesẽngan Pelungguh!"

¹⁸ Jawab Deside Isa, "Tiang serioq Belis geriq lẽman langit maraq kisap.

¹⁹ Setetune, side pade sampun Tiang bẽng kuase adẽq side pade bau ngicaq ulah dait teledu serte kuase jari nahen selapuq kekuatan musuh, sehingge ndẽq araq saq gen bahayeang side pade.

²⁰ Timaq maraq nike ndaq gembire lantaran sẽtan-sẽtan taat lẽq side. Laguq solahan side pade gembire sẽngaq arande tecatet lẽq sorge."

²¹ Lẽq waktu nike ẽndah, Deside Isa gembire sẽngaq tekuasein Roh Suci. Terus Ie bemanik, "Bapa, Tuhan saq nguasein langit dait gumi! Tiang ngucap syukur lẽq Deside sẽngaq selapuqne nike Deside rahasieang lẽq dengan-dengan saq pinter dait bijaksane, laguq Deside nyatayang tipaq dengan saq biase-biase. Nike saq nyenengang Bapa.

²² Selapuq hal sampun teserahang siq Bapa tipaq Tiang. Ndẽq araq sopoq dengan juaq saq kenal kance Bije, selain Bapa. Ndẽq araq ẽndah saq kenal Bapa selain Bije; dait tipaq dengan-dengan saq Bije nike kayun nyatayang Bapa."

²³ Beterus Deside Isa ngẽngat andang pengiring-pengiring-Ne, dait bemanik tipaq ie pade secare husus, "Bahagie side pade sẽngaq sampun serioq saq side pade serioq mangkin niki.

²⁴ Tiang badaq side: Luwẽq nabi dait raje melẽt serioq saq side pade serioq mangkin laguq ie pade ndẽq serioq ie. Ie pade melẽt dengah saq side pade dengah mangkin niki, laguq ie pade ndẽq dengah ie."

²⁵ Lẽq sopoq waktu araq ahli Taurat nganjeng jari boyaq kesalaqan Deside Isa. Ie metakẽn, "Bapaq Guru, napi saq harus tiang laksaneang adẽq bau nerimaq idup sejati dait kekel?"

²⁶ Jawab Deside Isa, "Napi saq tetulis lẽq Kitab Suci? Berembẽ pendapet side mengenai hal nike?"

²⁷ Jawab dengan nike, "'Kasihin Allah, Tuhan side siq segenep atẽnde, dait siq segenep jiwende, dait siq selapuq kekuatande, dait siq segenep akal budinde,' dait 'Kasihin sepadende manusie maraq side ngasihin diriqde mẽsaq.'"

²⁸ "Jawabande nike kenaq," manik Deside Isa. "Laksaneang nike, make side gen idup."

²⁹ Laguq ahli Taurat nike mẽlẽ pekenaq diriqne mẽsaq. Make ie metakẽn lẽq Deside Isa, "Sai saq teparan pade-pade manusie maraq tiag?"

³⁰ Jawab Deside Isa, "Araq sopoq dengan mame turun lẽman Yerusalem ojok Yeriko. Lẽq tengaq kelampan ie teserang perampok, terampas selapuq dowẽ bandene, tempuk jangke lelah, terus tebilin nyelangkar lẽq rurung dalem keadaan bakat saq parah.

³¹ Lẽq waktu nike araq ẽndah sopoq imam liwat lẽq rurung nike. Sewaktu ie serioq dengan nike, ie mirik lampaq langan itoqan rurung.

³² Maraq nike ẽndah sopoq dengan Lewi saq lampaq lẽq derike; sewaktu ie serioq dengan nike, ie mirik lampaq langan itoqan rurung.

³³ Laguq sesampun nike sopoq dengan Samaria saq kenyeke bekelampan, liwat ẽndah lẽq derike. Sewaktu ie serioq dengan saq terampok nike, ie periak lẽq dengan nike.

³⁴ Ie rapetin dengan nike terus persiq bakat-bakatne siq anggur dait ngowatin kadu minyak, beterus bebetne bakat-bakat nike. Sesampun nike, taẽkangne dengan nike ojok bagalne mẽsaq, dait jauqne ojok taoq penginepan dait ngerawat ie.

³⁵ Lẽq jemaqne, ie ngebẽng due kẽpẽng perak tipaq ẽpẽn penginepan nike dait bebase, 'Rawat ie, dait lamun araq biaye-biaye lain, gen tiang bayah laun lamun tiang tulak ojok deriki.'"

³⁶ Beterus Deside Isa nutuqang cerite nike dait beketuan niki, "Lẽman ketelu dengan nike, saq mbẽ side paran sepade manusie kance dengan saq terampok nike?"

³⁷ Ahli Taurat saq teketuan nike bejawab, "Dengan saq sampun nulung dengan nike." Deside Isa bemanik, "Silaq lumbar dait laksaneang maraq nike ẽndah!"

³⁸ Beterus Deside Isa dait pengiring-pengiring-Ne ngelanjutang pemargian, beterus rauh lẽq sopoq dẽse. Lẽq derike araq dengan nine aranne Marta, pesilaq Deside Isa ojok balẽne.

³⁹ Marta bedowẽ semeton nine aranne Mariam. Mariam niki tokol lẽq dẽkẽt Deside Isa dengahang pengajahan-pengajahan-Ne.

⁴⁰ Laguq Marta rẽpot gati siq pegawẽanne lẽq balẽ. Ie lumbar tipaq Deside Isa dait matur, "Junjungan Saq Mulie, kembẽq Pelungguh nẽnten peduli tiang tealurang begawẽan mẽsaq-mẽsaq siq Mariam? Manikang ie nulung tiang!"

⁴¹ "Marta, Marta!" jawab Deside Isa. "Side kuatir dait rẽpot mikirang luwẽq hal;

⁴² padahal saq penting cume sopoq. Mariam sampun pilẽq saq paling solah, saq ndẽq gen tebait lẽman diriqne."

Lukas

Video Lukas 10

Ikuti Kami:

KONTAK | PARTISIPASI | DONASI