Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca si e, ipilih Tuhan pitu puluh kalak nari jadi ajar-AjarNa. Ajar-ajar enda ndai IsuruhNa dua-dua kalak sendalanen ngelebei Ia ku kerina kuta ras ingan si minter AteNa IdahiNa.

² Nina Jesus man kalak e, "Mbelang si man peranin, tapi kurang si ranisa. Dage, ertotolah man si Mada peranin e, gelah IsuruhNa si erdahin guna mperanisa.

³ Berkatlah! Kusuruh kam lawes bagi anak biri-biri ku tengah-tengah serigala.

⁴ Ola baba dompet, gajut-gajut, ntah sepatu, ola kam ngadi i tengah dalan guna ercakap ras kalak.

⁵ Adi bengket kam ku bas sada rumah katakenlah lebe, 'Dame man isi jabu enda.'

⁶ Janah adi lit i bas rumah e kalak si ngarapken dame, maka dame si isehkenndu ringan i bas ia. Tapi adi la lit, dame si isehkenndu mulih man bandu.

⁷ Kesilanglah i bas rumah e, pan dingen inemlah kai si iberekenna man bandu, sabap kalak si erdahin patut kap dat upah. Ola sambar-sambar inganndu kesilang.

⁸ Adi bengket kam ku sada kuta janah i je ialo-alo kalak kam, panlah kai si iberekenna man bandu;

⁹ janah pepalemlah kalak si penakiten i je. Kataken pe man anak kuta e, 'Kinirajan Dibata nggo ndeher ku tengah-tengahndu!'

¹⁰ Tapi adi bengket kam ku sada kuta janah i je la kam ialoken kalak, laweslah kam ku pasar-pasar, jenari momokenlah,

¹¹ 'Abu kutandu si leket i bas nahe kami iapusi kami i lebe-lebendu; tapi ingetlah, maka Kinirajan Dibata nggo ndeher ku tengah-tengahndu.'

¹² Kukataken man bandu maka i bas wari pendungi e pagi, nahangen ukumen si isehken Dibata man kota Sodom asangken man kota e."

¹³ "Andiko, cilaka kal kam pagi o, Korasin. Kam pe o Betsaida, cilaka me kam! Sabap adi tanda-tanda sengget si nggo ibahan i tengah-tengahndu ibahan i Tirus ras i Sidon, ndekah me ia erkadiola ras erceda ate. Tentu nggo itamakenna abu ku badanna guna mbuktiken maka nggo ia jera i bas dosa-dosana nari.

¹⁴ Emaka i bas wari pendungi e pagi, liten denga perkuah ate Dibata man Tirus ras Sidon asaken man bandu.

¹⁵ Bage pe kam, o Kapernaum! Atendu kin maka ipeganjangkenndu bandu seh ku langit? Kam pagi idampesken ku neraka."

¹⁶ Nina Jesus man ajar-AjarNa, "Ise si megiken kam, ia megiken Aku; ise si nulak kam, itulakna pe Aku; janah ise si nulak kam, itulakna pe Ia si nuruh Aku."

¹⁷ Ajar-ajar si pitu puluh kalak ndai mulih alu dem keriahen. Nina man Jesus, "O Tuhan, setan-setan pe ngikutken kata kami adi isergangi kami ia i bas GelarNdu!"

¹⁸ Ngaloi Jesus man bana kerina nina, "Kuidah Iblis ndabuh i langit nari bagi kilap.

¹⁹ Begikenlah! Nggo kubereken man bandu kuasa merjati nipe ras kacip gelang, bage pe kuasa naluken musuh e, janah kai pe la banci encilakai kam.

²⁰ Tapi ola meriah ukurndu perbahan setan-setan ngikutken perentahndu, tapi meriahlah ukurndu perbahan gelarndu nggo isuratken i Surga."

²¹ Paksa si e, meriah iakap Jesus ibahan Kesah Dibata janah nina, "O Bapa, Tuhan si mada langit ras doni! Kukataken bujur man BaNdu, sabap nggo icidahken Kam man kalak si la erpemeteh, kerina si ibuniken Kam man kalak si pentar dingen erpemeteh. Payo bage me jadina Bapa, sabap bage me si ngena AteNdu.

²² Kerina nggo iendesken BapangKu man bangKu. Ise pe la meteh ise Anak e seakatan Bapa; janah ise pe la meteh ise kin Bapa e seakatan Anak ras kalak si man bana ipebetehken Anak e."

²³ Asum Jesus nari ngenca i je ras ajar-AjarNa nina Jesus, "Malem tuhu-tuhu atendu sabap kam nggo ngidah kai si idahndu!

²⁴ Kukataken pe man bandu maka nterem nge nabi ras raja merincuh ngidah kai si idahndu tapi la idahna, bage pe merincuh ia megi kai si ibegindu, tapi la ibegina."

²⁵ Sekali jadi reh sekalak guru agama Jahudi ncubai Jesus. Isungkunna Jesus nina, "O Guru, kai arus kubahan gelah kualoken kegeluhen si rasa lalap?"

²⁶ Erjabap Jesus nina, "Kai kin si tersurat i bas Pustaka Si Badia? Kai si iogendu i je?"

²⁷ Erjabap guru Undang-undang e, "Kelengilah Tuhan Dibatandu asa ukurndu, asa tendindu dingen asa gegeh ras kepentarenndu lit; bage pe kelengilah temanndu manusia bagi kam ngkelengi badanndu."

²⁸ Ngaloi Jesus, "Payo jabapndu e. Bahanlah bage gelah ialokenndu kegeluhen si rasa lalap."

²⁹ Tapi ate guru agama e pebujur-bujurken bana, emaka nungkun ia man Jesus nina, "Ise kin temanku manusia?"

³⁰ Erjabap Jesus alu perumpaman nina, "Lit sekalak ngincuah i Jerusalem nari ku Jeriho. I tengah dalan jumpa ia ras pengerampuk. La saja barang-barang irampukna, tapi igudamina pe ia seh menam mate, jenari itadingkenna.

³¹ Rembang mentas sekalak imam arah dalan e; kenca idahna kalak si nggo ampar e, isilahkenna, jenari iteruskenna perdalanenna.

³² Bage pe mentas ka sekalak Lewi; kenca idahna, ia pe nilah jenari iteruskenna perdalanenna.

³³ Tapi sekalak Samaria si mentas ka arah dalan e mekuah atena asum idahna kalak si ampar e.

³⁴ Emaka ideherina jenari itamakenna minak ras anggur ku luka-lukana dingen ibalutina pe. Kenca bage iangkatna ku datas kaldena, ibabana ku ingan penginapen guna itambari.

³⁵ Pepagina iberekenna dua duit pirak man si empu penginapen e janah nina, 'Tambari ia janah adi la bias enda kutambahi pagi asum aku reh mulihken.'"

³⁶ Emaka nungkun Jesus man guru agama e nina, "Si apai nge iakapndu i bas si telu e jadi teman manusia kalak si irampok e?"

³⁷ Erjabap guru Undang-undang e, "Kalak si nggo nampati ia." Ngaloi Jesus, "Kam pe laweslah, janah bahanlah bage."

³⁸ Asum Jesus ras ajar-AjarNa nerusken perdalanenna, seh ia i bas sada kuta. I je lit sekalak diberu gelarna Marta; ialo-alona Jesus i rumahna.

³⁹ Lit pe sekalak seninana gelarna Maria. Maria kundul i deher nahe Tuhan megiken PengajarenNa.

⁴⁰ Tapi Marta kuskas nikapken pangan; emaka murkas ia ideherina Jesus janah nina, "O Tuhan, la IperdiatekenNdu ipeturut seninangku aku sisada ndahiken kerina dahin e? Suruh min ia nampati aku!"

⁴¹ Erjabap Jesus man Marta nina, "O Marta, Marta! Suhsah dingen gulut ukurndu sabap melala atendu ibahanndu,

⁴² tapi sada ngenca si la banci lang. Nggo ipilih si Maria si mehuli e janah lanai banci ibuat i bas ia nari."

Lukas

Video Lukas 10

Ikuti Kami:

KONTAK | PARTISIPASI | DONASI