Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 No'iduduimai kon tua, ki Yesus nomilií kon dumodudui-Nya ibanea pitu nopuḷuh ing kobayongea bodongka nopotabaí ko'i monia. Mosia pinokibayaían tumo-dodoyowa sin umuna ko'i-Nia mayak ing kotaí bo tampat mita inta bayaían-Nya.
2 Ki Yesus noguman nana'a, "Bungainya im mobayong totok, ta'e mononolisií in tongaí topilik. Manangka intua po'igumdon ko'i togi gobaí simbaí potabaínya mangoi in intau inta mogogaid simbaí mosia im mono'inut kom bungainya mita tatua.
3 Tuamai bayakdon! Aku'oi mopotabaí ko'i monimu naonda bo mopotabaí in domba kon yuaí-yuaík in serigala.
4 Bo donaíai modia kon pundi andeka baḷun andeka aip in si'oḷ. Dika mogogai kon yuaík in daḷan bo mobogoi in hormat ko'i inekadon.
5 Bo aka mo'ikow tumu'ot kon tobatuí baḷoi yo na'a in singogon muna, 'Binarakatandon i mo'ikow tobaḷoian na'a.'
6 Bo aka kon tua oyuíon intau inta mo'ibog in dodamean bo saḷamat, yo salammu tatua in motantuí kom baḷoi tatua, tongaí aka diaí, yo salammu tatua im mo'ibuibií ko'inimu.
7 Kotantuí kon tobatuí baḷoi aka mogutun. Tarima onu in ogoi monia ko'inimu. Sin intau inta mogaid im patusbií in sia motarima kom bungai in inaidannya. Dona'ai momampi-mamping makow kom pogutunan.
8 Aka mo'ikow mamangoi in tobatuí kotaí bo sinomu notompia in intau kon tua, yo ka'anbií onu inta ogoi monia ko'i monimu.
9 Tuḷungai bo undamai in intau mita inta notakit kong kotaí tatua bo poguman kon intau mita kon tua, 'Ki Allah mamangoidon momarentah saḷaku Raja kon yuaí-yuaík monimu.'
10 Ta'e aka mo'ikow bo mamangoi in tobatuí kota bo doií in intau kon tua motarima ko'i monimu, yo bayaí in doḷaag bo singog nana'a,
11 'Sedangpa ḷobud ing kotaímu na'a inta nongo-ikompit kon si'oḷ nami, daiton nami topiran saḷaku poringatan ko'i monimu. Ta'e baí kota'auan monimu kon diaí bidon mo'onggot ing ki Allah mamangoi momarentah saḷaku Raja kon yuaí-yuaík monimu!'"
12 Torop in na'a, "Kon singgai ponantuían, intau in Sodom im mogampa-gampang ampungan i Allah nongkon daripada intau mita ing kotaí tatua!"
13 "Koboditodon mo'ikow, Korazim! Bo koboditodon mo'ikow, Betsaida! Sin aka kuma bo kon lipuí in Tirus bo Sidon im pinogaidan kon inta mokoherang mita inta ain inaidan kon yuaí-yuaík monimu, yo no'onggot bidon mosia nogogai nogaid kon dosa, bo inagoiandon im panyasaḷan.
14 Ta'e kon singgai ponantuían, lipu in Tirus bo Sidon im mogampa-gampang ampungan i Allah daripada mo'ikow.
15 Bo mo'ikow, Kapernaum! degaí kai'nimu kamai daí poḷantudonbií ikow dapot in soroga? Baí pogumanku, Diaíbií! Malah mo'ikow nion in pogonagbií kon naraka!"
16 Bo ki Yesus noguman kom murií-Nya mita, "Ki ine im mo'ibog mokidongog ko'i monimu, yo mosia tua i mokidongog doman ko'i-Nakoí. Ta'e ki ine in doií motarima ko'i monimu, yo sia in doií doman motarima ko'i-Nakoí. Bo ki ine in doií motarima ko'i-Nakoí, yo sia in doií doman motarima ko'i-Nia inta nopotabaí ko'i-Nakoí."
17 Onda intua, dumodudui i Yesus inta pitu nopuḷuh nobuidon mangoi takin sanang ing gina bo noguman, "Tuhan sedang dimukud mita mora'at mo'ondok ko'inami sim mokodongog kon tangoi-Mu."
18 Daí ki Yesus noguman ko'i monia, "Aku'oi noko'ontong kon Ibilis noḷabuí nongkon ḷangit naíonda bo kilat.
19 Mo'ikow aindon inogoian-Ku ing kawasa poritak kon uḷag bo bamba'u, bo kawasa pomutoḷ kon ropot in saturu, sahingga diaí bidon im moko'bodito ko'i monimu.
20 Tongaí umpakahbií natua, yo dikabií mopia-pia ing gina monimu sim mo'ondok in dimukud mora'at ko'i monimu. Na'abií im patus mokopia kong gina monimu, tangoimu aindon pinais kon soroga."
21 Ko wakutu intua nosanang totok ing gina i Yesus, lantaran kinawasaan in Roho i Allah. Sia nosingog nana'a, "Aku'oi mosukur ko'i-Nimu Amaí, Tuhan in ḷangit bo butaí, lantaran bayongan intua aindon binuni-Mu kon intau mita inta mopandoi bo mobijaksana, ta'e aindon pino'ontong-Mu kon intau mita inta nongobodok. Tuabií ing kino'ibog i Amaí.
22 Yagi-yagi komintandon pinosarahkan i Amaí ko'i-Nakoí. Bo diaíbií in tobatuímai intau nonota'au kon Adií, kolikudbií ing ki Amaí. Bo diaíbií doman intau in nonota'au ko'i Amaí kolikudbií in Adií; bo intau mita inta kino'ibog in Adií popota'auan kon ki ine ing ki Amaí."
23 Onda intua ki Yesus nobobui kon dumodudui-Nya mita bo noguman, "Nomujur totok mo'ikow in noko'ontong kon onu inta ain inontong monimu tana'a.
24 Sin toropbií monimu: Nobayong in nabi bo raja im mo'ibog mo'indoi kon onu inta ain inontong monimu, ta'e mosia diaí noko'ontong. Naí doman tua, mosia mo'ibog mongindongog kon naí inta ain dinongog monimu, ta'e mosia diaídon nokodongog kon tua."
25 No'iduduimai kon tua, oyuíon mototunduí kon agama namangoi bo monungkuḷ ko'i Yesus. Sia noliboí ko'i Yesus, "Pak Guru, onu degaí im musti aidanku simbaí aku'oi moko'ulií kong kobiagan mopia bo mononoi?"
26 Ki Yesus bui noliboí ko'inia, "Onu im pinais kon hukum i Musa? Podudui in raianmu, naíonda intua?"
27 Intau tatua notubag, "'Kotabibií ing ki Tuhan, takin Allahmu, kotantuí ing gina ko'i-Nia,' bo 'Kotabibií in tumpaḷa intau naí kototabimu kon awakmu tontanií.'"
28 Daí kai Yesus doman, "Totu'u in tubagmu nion! Aidaidon intua komintan, daí ikow moko'uliíbií kong kobiagan mononoi."
29 Ta'e mototunduí kon agama tatua doií taḷowon, daí sia noliboí bui ko'i Yesus, "Ki inebií inta sinangoi tumpaḷa intau?"
30 Ki Yesus notubag, "Oyuíon intau nosilig nongkon Yerusalem. Sia mayak in Yerikho. Kon yuaík in daḷan, sia dinomok in intau mita inta mogogagow. Binongkug monia in sia bo inagow doman im bayongan kapunya'annya inta kodia-dianya. Nodait makow inagow onu in ko'inia, binongkug doman monia inimibo-ibog nodapot aindon matoi bodongka sinaḷaían monia.
31 Kabutuḷan oyuíon tobatuí imang nosilig nongin daḷan tatua. Ta'e naonda inontongnya intau inta binongkug monia tua, nomarut in sia bo nongin daḷan toḷosi.
32 Natua doman intau in Lewi inta no'italib kon tua. Noko'ontongmai kon intau tatua, nomarut doman in sia bo nongin daḷan toḷosi.
33 No'iduduimai kon tua oyuíon intau in Samaria nongin daḷan doman tatua. Noko'ontongmai kon intau tatua totok noliai ing ginanya bo notabi.
34 Daí dinimiug in sia kon intau tatua bo dinaritannya anggur ing kekebnya mita bo inundaman poḷat binakut kinopia ing kekebnya tatua. Nopaḷut makow, pinoponiknya intau tatua kong keledainya, bo dinia pinobayak im baḷoi inta pongongandupan bo sinompianya.
35 Nopo'ikoḷomai kon singgai inogoiannya in doit perak doyowa ing kitogi baḷoi pongongandupan tatua bo nongoyow, 'Tompiapa in sia bo onu in taḷuionmu ponompia ko'inia daitonkubií toliuan aka mobuidon mangoi in aku'oi.'"
36 Onda intua ki Yesus nonimpod kon o'uman-Nya tatua bo noliboí ko'inia, "Podudui in raianmu, ki ine ing kon sigad naya'toḷu tua in nomia kon oaíid saḷaku tumpaḷa intau ko'inia inta pinogagowan tatua?"
37 Mototunduí kon agama tatua notubag, "Intau inta ain inagoian tabi bo poḷat notuḷung kon intau tatua." Ki Yesus noguman, "Daí aka natua, yo bayakdon bo aidai doman in natua!"
38 Onda intua ki Yesus bo murií-Nya mita nongingguputdon kom bobayaían monia bo mosia no'iyaputdon in tobatuí lipu. Kon lipuí tatua oyuíon tobatuí bobay nogoinií ko'i monia minayak im baḷoinya, ki Marta in tangoinya.
39 Ki Marta na'a oyuíon ing ki utatnya bobay doman inta tangoinya ki Maria. Ki Maria na'a ilimituí makow kon diug i Yesus bo mokidongogmai kon onu in singogon-Nya.
40 Ta'e ki Marta im mosibuk totok mogaid kon oaíidanya kon baḷoi. Daí ki Marta dinimiug ko'i Yesus bo noguman, "Tuhan, degaí bo diaíbií ontongon i Tuhan ing ki utatku tanion. Ko'inapa in sia tongaíbií limituí makow mokidongog kon onu in poguman i Tuhan bo pomayaknya makow aku'oi im mogaid tontanií?"
41 Ta'e ki Tuhan noguman, "Marta, Marta! ikow na'a in totokbií mohawatir bo mopoyoyiga in awakmu tontanií bo tongaí umuran morai kom bayongan rupa-rupa.
42 Baí poguman-Ku ko'inimu kon tongaíbií tobatuí in totok moponting. Ki Maria ain nomilií kon inta mopia, inta diaíbií bui gamaían ko'inia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA