Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, i Pue mangampilis pitu mpuyu pei dua mba’a tau to yusa. Ia mampokau tau etu dua mba’a sinjaya, dua mba’a sinjaya damampatiruyu pei Ia njo’u ponto-ponto kota pasi ponto-ponto lipu ntau to Ia damangampago.
2 Tempo sira tawa yau Ia mamporapaka sira, Ia manganto’o, “Tau boros to tawa rapotundeka maya raporapaka ewa pae to matasam to tawa rapota. Boros kojo pae to matasam pei taa boros tau to mampota. Wali porapika resi i Pue Allah see Ia damampokauka tau yau mampotundeka tau to tawa rapotundeka etu, ewa naika mpue nawu mangampokauka tau yau damangampota pae to matasam.”
3 Roo see i Yesu manganto’oka wo’u sira, “Wali intamo. Pei pakatao kojo apa Aku mampokau komi yau resi tau to tawa mangalulu Aku, wali komi maya raporapaka ewa ana nu domba to yau ri oyo nu asu maila to maja’a kiranya.
4 Wali ri raya mpalinja ngkomi, ne’e mangkeni bara kesaa. Ne’e mangkeni doi, pasi ne’e seja mangkeni tas, bara sandal to yabi yako sandal to nupake ngkomi. Pasi tempo komi malinja, ne’e mandoo mampasaritaka tau to simpatomu pei komi ri jaya.
5 “Wali ri raya mpalinja ngkomi, ane komi damasua ri raya banua to danukaroo, ri katawanya komi masua ri banua etu tabea ruyu tau puenya ewa to biasa resi kita, etu semo, to’oka ia, ‘Aku mampokai-kaika komi mamporapika resi i Pue Allah see Ia mampakasanang katuwu ngkomi to maroo ri banua si’i.’
6 Wali yako etu ane tau to maroo ri banua etu masipato darapakasanang, pokaikai ngkomi etu danabanang i mPue Allah see damasanang katuwu nsira. Pei ane sira taa masipato rapakasanang, ane ewa see ojo komi semo to danapakasanang i mPue Allah.
7 Wali ane pue nu banua etu masanang mampalinggona komi, karoo-roo nja’u ria semo, ne’e malimba-limba njo’u banua to yusa. Pasi anu to nawaika nsira komi darakoni pasi darainu, pakasanang mangkoni pasi manginu anu to etu. Apa anu to nawaika nsira komi etu ewa saro mpalaong ngkomi, pasi kita mangansani ane tau to mapalaong, tau etu masipato mangarata saronya.
8 “Wali ri raya mpalinja ngkomi, ane masua ri raya ngkota pei masanang tau mampalinggona komi, ane ewa see, pakasanang mangkoni pasi manginu anu to naposaka nsira ri tango ngkomi.
9 Pasi pakatao muni tau to masaki nja’u kota etu, pei to’oka tau nja’u ria, ‘Daratamo temponya i Pue Allah mawali Makole nto lino.’ Ewa wetu danuika ane tau masanang mampalinggona komi.
10 Pei ane komi masua ri raya ngkota ntau to bo’onya mampalinggona komi, ane ewa see, inta njo’u jaya tikore ri kota etu pei to’oka resi sira,
11 ‘Komi taa kojo rani mawali tau to i Pue Allah Makolenya, see naka pasiwa awu ntana nu lipu ngkomi to re’e ri witi mami kami mampalasi yau apa kami taa singkonong pei komi. Pei ne’e mangkalingan, daratamo temponya i Pue Allah mawali Makole nto lino.’ Etu semo to danuto’oka ngkomi tau etu.
12 Wali Aku manganto’oka komi, monso pu’u ane ratamo temponya i Pue Allah mangabotus to lino, tempo etu huku to danarata ntau ri kota to bo’onya mampalinggona komi etu, huku nsira to pari-pari wo’u pei huku to danarata ntau to maroo ri kota Sodom tempo owi.”
13 Wali yako etu i Yesu manganto’oka wo’u tau pitu mpuyu pei dua mangkonong kasesa to danarata ntau ri kota-kota to taa majea. Ia manganto’o, “Kasesa danarata ntau to yako ri kota Korasim! Kasesa danarata ntau to yako ri kota Betsaida! Apa tau etu taa majea nempo mangkita palaong to taa rapobiasa. Pei pobuuka kota Tirus pasi Sidon tempo owi. Kota etu maja’a kojo lengko ntaunya. Pei ane rapanya tempo owi etu Aku bara mangika palaong to taa rapobiasa nja’u kota etu, ane rapanya ewa see, tau ri kota etu majoli kojo damajea. Sira damamposunsuka kain karu pasi matunda mangkaku awu pei mansambuetaka nto’u wawo mbo’onya apa soso kojo raya nsira mampobuuka dosanya. Ewa wetu ane rapanya tau etu mangkita palaong to inika ngKu.
14 Pei tau Korasim pasi Betsaida taa majea. Wali ane tempo to darata, tempo i Pue Allah mangabotus to lino, tempo etu tau etu semo to pari-pari huku to danarata pei tau Tirus pasi Sidon etu.
15 Pasi tau to yako kota Kapernaum, wimba ane sira? Wimba, ane tempo to darata sira bara daraokotaka mawali bae angga ndate saruga? Taa kojo! Sira darapakakodi angga la’u lipu ntau mate. Apa boros seja palaong to taa rapobiasa to roomo raika nja’u kota nsira pei sira taa seja majea. Wali see naka sira damangarata kasesa.”
16 Wali ojo karoonya i Yesu manganto’o gombo etu, Ia manganto’oka wo’u pomakauNya to pitu mpuyu pei dua mba’a, Ia manganto’o, “I sema tau to mampodongeka komi, batuanginya tau etu mampodongeka Aku. Pei tau to mampobo’o komi, batuanginya tau etu mampobo’o Aku. Pasi tau to mampobo’o Aku, batuanginya Ia mampobo’o seja Pa’angKu to nampokau Aku.” Wali tempo i Yesu roomo manganto’oka pomakauNya gombo etu, sira yau mangika palaong to nato’oka i Yesu sira mangika.
17 Wali ojo karoonya pomakau i Yesu to pitu mpuyu pei dua etu mangika palaong to napokauka i Yesu sira etu, sira mawolili muni resi Ia ri kandende ndayanya. Sira manganto’oka Ia, “Pue, sakowa measa mampalaika seja kami apa saba kuasa ngKomi.”
18 Wali i Yesu manganto’oka sira, “Monso pu’u. Naka pei sira mampalaika komi apa nangi kepalanya, apa Aku re’e mangalo’a tempo Kepala Measa rasounaka yako ndate saruga. Kasounya etu ewa bilak kagasinya. Wali ia nangimo kuasanya.
19 Wali pobuuka si’i: Aku roomo mangawaika komi kuasa see nempo mangalombu ule pasi lipa mpondo, komi taa darapakaja’a. Pasi Aku roomo mangawaika komi kuasa damanganangi samparia kuasa ngKepala Measa, bali ngkita. Wali tare bara kesaa to damampakaja’a komi.
20 Pei nempo measa mampalaika komi, si’a etu to masipato mawali pu’u ngkandende ndaya ngkomi. Kasimbalinya yako etu, pakandende raya ngkomi apa saba sanga ngkomi roomo ratulis ndate saruga.”
21 Wali tempo etu i Yesu bae kojo kandende ndaya to nawaika i Nosa Mapasing Ia. See naka Ia makaikai manganto’o, “O Pa’a, Pue nu yangi pasi lino, Aku mangabarong Komi apa Komi mangawunika yau anu to monso see taa nansani ntau to manga’angga kapande ngkoronya. Pei anu to monso etu Komi roomo mampaponsanika resi tau to tawa pande kojo ane ri pangkita nto lino. Ewa see songka ngKomi, Pa’a, apa ewa wetu semo songka to mampakasanang rayaMu. Wali see naka Aku mangabarong Komi.” Etu semo pokai-kai i Yesu resi Pa’aNya.
22 Wali yako etu i Yesu manganto’oka wo’u tau boros, Ia manganto’o, “Samparia anu to re’e roomo nasarumakaka mPa’angKu resi Aku. Wali tare to maya mangansani kojo Aku, Ana i mPue Allah, kasimbalinya yako Pa’angKu. Pasi tare to maya mangansani kojo i Pue Allah, Pa’angKu, kasimbalinya yako Aku to AnaNya. Pei ane mangkonong tau, ojo patanya tau to Aku rani mampaponsanika mangkonong Pa’angKu, ojo tau etu maya mangansani seja Ia.
23 Wali ojo karoonya i Yesu magombo resi tau boros etu, Ia mangandolika tangoNya resi anaguruNya pei manganto’oka resi siraja, Ia manganto’o, “Masipato komi masanang apa komi re’e mangkita samparia palaong to inikangKu ri tempo si’i.
24 Apa Aku manganto’oka komi, ane tempo owi boros to pantuntu tuntu i mPue Allah pasi makole-makole, sira rani kojo mangkita palaong to nukita ngkomi ri tempo si’i, pei sira taa rapapokita. Pasi sira rani kojo mangandonge anu to nudonge ngkomi ri tempo si’i, pei sira taa rawaika mangandonge apa tawa rata temponya to napilis i mPue Allah damampaponsanika to lino. Pei komi rawaika mangkita pasi mangandonge anu to taa nakita pasi to taa nadonge nsira etu, wali masipato komi masanang!” Ewa wetu nato’oka i Yesu anaguruNya.
25 Wali yako etu re’e samba’a tau to pande kojo mangkonong porenta i Musa, ia rani mangakal i Yesu see Ia manganto’o gombo to sala. Wali see naka ngkai etu makore pei mampotanaka resi i Yesu, ia manganto’o, “Pa’a Guru, bara kesaa to dakuika see aku damangarata katuwu to singkasaenya?”
26 Wali i Yesu mampotanaka resi ia, “Kesaa to ratulis ri raya porenta i Musa? Kesaa nubasa ngkorom nja’u ria?”
27 Wali ngkai etu manganto’o, “Porenta i Musa manganto’o, ‘Pakabae kojo pamporayang ngkomi resi i Pue Allahmu. Pasi biakamo pamporayang ngkomi resi Ia etu damampasilonga katuwumu. Pasi biakamo pamporayang ngkomi resi Ia etu damampakaroso raya ngkomi. Pasi biakamo see yako pamporayang ngkomi resi i Pue Allah, see naka komi mampobuuka kojo Ia.’ Pasi porenta etu manganto’o seja, ‘Porayang sa’e ewa raika mamporayang koro ngkalio.’”
28 Wali i Yesu manganto’oka ngkai etu, “Monso pu’u pasonomu. Wali palengkoka porenta to etu panewa korom damangarata katuwu.”
29 Pei ngkai etu taa rani nangi, see naka ia mampotanaka resi i Yesu, to’onya, “Iya, pei sema yunungku to dakuporayang etu?”
30 Wali i Yesu mangansono pampotanaka ngkai etu mangkonong to imba tau to kamonsonya yununya. Ia manganto’o rapa, to’oNya, “Re’e samba’a yunu ngkita to Yahudi to malinja yako ndate kota Yerusalem dayau lo’u kota Yerikho. Ri raya mpalinjanya etu, kodi majoli ia nasoko ntau maja’a to rani mangoko yau ngaya-ngayanya. Tau etu mangayali yau pake ngkai etu pei mangaboba-bobak ia sampe mosu mate, panewa sira mampiyaika ia.
31 Yako etu ma’i samba’a to pampue to Yahudi liu ri jaya to etu. Ia mangkita ngkai to mosu mate etu pei ia ojo yau ri sambali njaya pei mangantalidik ia.
32 Pasi roo see ma’i seja samba’a to Yahudi to wiyaa i Lewi. Tau etu mangika seja ewa naika nto pampue. Ia yau seja ri sambali njaya pei mangaliunaka yau ngkai to mosu mate etu.
33 Pei yako etu rata seja tau Samaria to malinja seja liu jaya nakare’e ngkai etu. Tempo tau Samaria etu mangkita ngkai to mosu mate etu, ia mamporayang ngkai etu.
34 Wali see naka ia yau ri awenya pei mampokulir welanya mangampake indol pasi tule. Roo see ia mangawungusika kain welanya etu. Panewa roo see ia mangalea ngkai etu ri keledai to si ia pei mangkeni njo’u banua nakayore ntau to ri raya mpalinjanya. Rata nja’u ria ia mangkampang tau masaki etu.
35 Yako etu, ojo kaeonya rao, tau Samaria etu mangoko dua ngkomba doi pera yako raya ndompetnya, panewa doi etu ia mangawaika resi tau to pue banua etu. Ia manganto’o, “Kampang tau si’i. Pei ane taa gana doi si’i, tempo aku mawolili muni aku damampakagana.” Etu semo rapa to nato’oka i Yesu tau to pande mangkonong porenta i Musa etu.
36 Roo see Ia mampotanaka resi ngkai etu, Ia manganto’o, “Ane ewa pampobuuka ngkorom, to imba tau togo etu to kamonso-monsonya yunu ngkai to napakaja’a ntau maja’a etu?”
37 Wali tau to pande mangkonong porenta i Musa mangansono, “Tau to mamporayang ia semo.” Wali i Yesu manganto’oka ia, “Inta pei ika seja ewa wetu.”
38 Wali yako etu i Yesu pasi anaguruNya polas wo’u ri raya mpalinja nsira, panewa rata sira nja’u samba’a kota. Nja’u ria re’e samba’a tau we’a sanganya i Marta to masanang mampalinggona sira, wali sira yau ri banuanya.
39 I Marta etu, ia re’e samba’a tua’inya to we’a to sanganya i Maria. Wali tempo i Yesu re’e ri banuanya, i Maria yau matunda ri awe mbiti i Yesu pei mampodongeka gomboNya.
40 Pei i Marta boros kojo palaonginya, see naka ia masusa rayanya mangkita i Maria ojo matunda-tunda. Wali ia yau resi i Yesu pei manganto’o, “Pue, bara taa mawei resi Komi ane a’ingku ojo mangabiaka aku ngkaliongku mangika samparia palaong to si’i? To’oka ia mangansawang aku!”
41 Pei i Yesu manganto’oka ia, “O Marta, Marta, boros palaong to mampakamoru pasi mampakasusa raya ngkorom.
42 Pei taa boros palaong to bae kojo batuanginya, ojo samba’aja to bae kojo batuanginya, etu semo to napilis i Maria. Wali anu to matao to ia mangampilis etu taa kojo darayali yau yako resi ia.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA