Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi anggo pasal parroh ni Tuhanta Jesus Kristus ampa pardasta hu Bani, mangindo ma hanami bani nasiam sanina,
2 ase ulang urah idugur nasiam humbani totap ni paruhuron, anjaha rusak ibahen marhitei tonduy ni sipartonduy atap hata, barang marhitei surat na ihatahon roh hun bennami, na patugahkon, paboa na dob roh do ari ni Tuhan in.
3 Ulang ma adong na paoto-otohon nasiam atap marhitei aha pe. Ai seng anjai roh ari ai, anggo seng masa lobei parbalikon, anjaha ipatalar jolma na so parduli bani titah in, ai ma anak hamagouan ai,
4 na manlawan anjaha na pabangkit dirini dompak haganup na targoran naibata ampa sisombahon, na pahundul dirini i Rumah ni Naibata, na maningtingkon, paboa ia do naibata.
5 Ai lang idingat nasiam, na dob hupatugah in hinan, sanggah rap ope ahu pakon nasiam?
6 Ambahni ai, ibotoh nasiam do, aha na mangambatsi nuan, paima roh panorangni patalaron ia.
7 Ai domma marhorja nuan gogoh ni rusia ni hajahaton ai, paima ipadaoh na mangambatsi nuan.
8 Dob ai pe ase patalaron siparjahat ai, tapi ripaskonon ni Tuhan Jesus ma ia marhitei hosah ni pamangan-Ni, anjaha siapkonon-Ni ma ia talarhonsi Ia bani parroh-Ni ai.
9 Hun bani kuasa ni sibolis do parroh ni parjahat ai, marhasoman haganup bagei ni hagogohon ampa tanda ampa halongangan ladung,
10 ambahni ai marhasoman haganup bagei ni hajahaton sipaoto-oto bani halak na laho magou, halani lang ijalo sidea holong na humbani hasintongan in, ase maluah namin sidea.
11 Halani ai isuruh Naibata do bani sidea tonduy na pakahouhon, ase porsaya sidea bani ladung,
12 ase hona uhum sagala na so porsaya bani hasintongan in, na marosuh bani hagedukon.
13 Tapi na patut do hanami mangkatahon tarima kasih tongtong bani Naibata halani nasiam, sanina na hinaholongan ni Tuhan in, ai ipilih Naibata do nasiam humbani mulani, ase saud nasiam maluah marhitei pangurasion ni Tonduy in ampa haporsayaon bani hasintongan in.
14 Ai hujai do nasiam idilo marhitei Ambilan Na Madear, na niambilankonnami, ase parrupei nasiam bani hasangapon ni Tuhan Jesus Kristus.
15 Ase nasiam sanina, totap ma nasiam jongjong anjaha marsijoloman bani podah na niajarhonnami bani nasiam, marhitei hata atap surat pe.
16 Ase Tuhanta Jesus Kristus pakon Naibata Bapanta na mangkaholongi hita anjaha na mambere banta apoh-apoh na manongtong ampa pangarapan na madear marhitei idop ni uhur,
17 Ia ma mangapohi anjaha patotaphon uhur nasiam bani sagala horja ampa hata na madear.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA