Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Su hal᷊ẹ̌ u rarěntang Mawung kitẹ i Yesus Kristus, dingangu hal᷊ẹ̌ u pẹ̌tatampung i kitẹ mẹ̌deạu sěngkapẹ̌tanạ dingangu Mawu, ini e rẹ̌dorongangku e sěngapam botonge wọ'i kamene:
2 Kumbahangbe i kamene měngkai lighạ měmpẹ̌bingọ dingangu rěnděnganengu habaru seng tempone Mawu Yesus duměnta kapia. Aramanung habarẹ̌ ene kai nariadi wọu nubuetẹ̌ sembaụ arau wọu těntiro sěmbaụ, arau wotongewe lai mariadi piạu mẹ̌bẹ̌berau i kami e wọu němohẹ kerene su ral᷊ungu suratẹ̌ sěmbaụ bọu tal᷊oarang surat'i kami.
3 Maningbe lai kereapa, kumbahangbe i kamene sarang akal᷊engu taumata. U těntal᷊angbe tawẹ nạhumpạu ěllone ene, hal᷊ẹ̌ ini e sembeng mariadi kal᷊imona: Mal᷊awọ taumata sarung maněntangu pangangimange, mẹ̌sunial᷊'i Kristus ringangu taumata ral᷊akịe kawuakengu naraka e sarung sumẹ̌pụ.
4 Tangu ringangu obote i sie sarung dumokạ dingangu mẹ̌těngkarangẹ u watangenge su wowon patikụ apan dẹ̌daloěngu taumata arau su kěbị apang isẹ̌sẹ̌ba Mawu kahian taumata. Sal᷊a anune i sie kai sarung maiang su ral᷊ungu wanalan Duata kụ mamokạ u i Sie kai Mawu.
5 Pẹ̌tahěndungko u iạ kai wọu něhabarẹ̌ kěbị tamai ene su tempon iạ e wědang dingangi kamene.
6 Dingangu i kamene masingkạ u apa orasẹ̌ inie wědang makapetọ kěbị e. Hědowen su tempone nitantung Mawu Kasěllahenge, taumata ral᷊akịẹ ene sarung suměpụ.
7 Kakakuatu mẹ̌koạ dal᷊akisẹ̌ ene seng nanětạ nẹ̌karadiahang supěnise, kai wẹ̌dawen taghal᷊ẹ̌ kẹ̌kědal᷊eng. Hẹ̌doweng kamagengu i saing měnganguhunge seng iapakatạdịe,
8 ute wuhụewe ikasilo taumata ral᷊akisẹ̌ ene. Tangu kamagengbe Mawu Yesus marěnta ute i Sie sarungbe měmate Taumata Ralakị ene ringangu singongone wọu mohong'E ringangu mapakawinasang kawantugu rarěntan'E.
9 Tau ral᷊akịe sarung suměpụ kụ dingangu kuatu setang. I sie lai sarung mẹ̌koạ haghin tanda makạl᷊aherang dingangu makạdal᷊inaụ napenẹu kontine.
10 I sie sarung mẹ̌pakẹu haghin bawitaugu kararal᷊aị makạkapal᷊idu taumata kụ makạbinasa. I sire kai sarung mawinasa u i sire tawe mapulu měnarimạ dingangu tawẹ karal᷊uase su habaru katul᷊idẹ̌ bọu anun Duata e kụ makasal᷊amatẹ̌ si sire.
11 Kai ene hakịu Mawu Ruata e maparěntang kawasa makapal᷊idẹ̌ si sire, hakịu i sire měmpangimang apam bal᷊ine su katul᷊ide.
12 Bontọge ute kěbị apan taumata papuluangu pẹ̌sasal᷊a ringangu tawe měmpangimang katul᷊idẹ̌ e ute sarung ihukung.
13 Manga anạ u sěmbaụ ikẹ̌kěndag'u Mawu! I kami e mambeng hinong hanesẹ̌ makitarimakasẹ su Mawu Ruata e waugu i kamene, watụ u kai rongkeng bọu tẹ̌tạ e Mawu Ruata seng němile si kamene tadeạu ipakasal᷊amatẹ̌. U ene kai nariadi ual᷊ingu karadiahangu Rohkẹ̌ u Ruata si kamene napakariading kamene ral᷊ohon jamaat'u Mawu e masasusi mase ual᷊ingken pangangimang i kamene su habaru katul᷊idẹ̌ e wọu Ruata.
14 Baụgu ene Mawu Ruata e nẹ̌kuing kamene ringangu injilẹ̌ ilẹ̌habar'i kami e si kamene. Mawu Ruata e měkẹ̌kui si kamene, u Ruata e mapulu tadeạu i kamene mẹ̌těngkal᷊aụ bue su ral᷊ungu kawawantug'u Mawung kitẹ i Yesus Kristus.
15 Hakịu ene manga anạ u sěmbaụ darisịko pakatoghasẹ̌ dingangu pěmpangumbelẹko turusẹ̌ těntiro nitěntirong kami si kamene, baẹ nitěntiro ual᷊ingu pal᷊ahumbisarang kami e ringangu l᷊ai ual᷊ingu pamamohẹ.
16 Karimạko Mawung kitẹ i Yesus Kristus sẹ̌sane, ringangu Ruata i Amang i kitẹ e měhiborẹ̌ dingangu manoghasẹ̌ naung'i kamene, tadeạu i kamene makakoạ bue ringangu makapẹ̌habarẹ̌ben munara mapapia. U Ruata e kụkěndag'i kitẹ e, ringangu ual᷊ingu kapian naung'E i Sie mapạkakẹ̌dang i kitẹ e ringangu makạpělẹ̌harapu apang mapia.
17 (2:16)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA