Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ La'eneu ita Lamatuan Yesus mamai na, ma la'eneu manda'dik esa nae, neukose Ana tao nakabubua ita to Ndia, au oke ela leo bee na,

² boso no lai-laik, emi mapangamak do emi susa, nana emi mamanene hala tutui ka nae, Lamatuak Yesus fai mamai na, ana losa so. Nana fafakama tutuik ndia, ana da'di neme nabi la lafa'da ela dede'ak ndia, do fafakama ana da'di neme nanolik esa mai; do bole da'di, hataholi nggelok lafa'da lae, ami sulak hai dede'ak ndia, nai ami susulam nggelok dalek so.

³ Leomae leo beek boeo, boso nau haaholi ke'di ndiu emi. Nana faik ndia beita losa fa te, hapu dede'ak de'u bee, ala da'di lakahuluk: Soona neukose hataholi ba'u ka fali deak fo, lalelesi Kristus; Boema Hataholi Mangalauk fo nananafa'da basak, tao leo bee o ana masok leo tasi ha'ik dale neu a, neukose ana to'da mai.

⁴ Ma neukose ana laban Manetualain, ma ana manaku nae, ndia nanuu koasa, lenaheni basa dula dale mangalauk fo, hataholi daebafa ka sene-do'o kasa. Lena-lenak, neukose nangatuuk neu Lamatua ka Uman dale fo nafa'da nae, Manetualain nde ndia.

⁵ Mafandendelek te, au afa'da hai dede'ak sila la neu emi, ndek makahulu na, au bei sama-sama o emi a.

⁶ Boema emi bubuluk, bee ka nde besak ia, bei napangge na basa sila la de, ala beita da'di fa. Ela neu faik fo Manetualain naketu basa ka soona, neukose Hataholi Mangalauk ndia, ana to'da mai.

⁷ Emi bubuluk mae, Hataholi Mangalauk fo mana tao tatao-nono'i mangalauk ndia, ana mulai tao-no'i no nafufunik, nana hapu hata esa napangge nan. Tehu mahani te, metema fai na losa fo Manetualain tipa heni mana mapanggenggeek ndia soona,

⁸ besa ka Hataholi Mangalauk ndia nananitak. Tehu metema Lamatuak Yesus mai soona, Ana taonisa Hataholi Mangalauk ndia, ninik ani hahae na. Ma neukose nanatao nakalulutuk ninik Lamatua ka mamai mandela-masa'a na.

⁹ Neukose Hataholi Mangalauk ndia, ana mai no koasa matua ina esa, neme Nitu a mai. Neukose ana tao manda'di beu mata-mata kala, ma dede'a matua ina fo, henuk no ke'dindiu ka.

¹⁰ Ana pake basa ke'dindiu mangalauk lala'ena, fo ana ke'dindiu hataholi fo, ala ta nau sipok hala ndoos maneme Manetalai na mai. Neukose mate basa hataholi sila la, nana ala ta nau lamahele halak fo manini so'dak ndia fa.

¹¹ Hu ndia de, Manetualain haitua koasa esa neu fo, ana tao nalas latofa-latalak, nalosa lamahele neu hata fo, ta ndoo sa fa.

¹² Mate'e na, basa hataholi fo ala hii tao sala-singok, ma hataholi fo ala ta nau lamahele dede'a ndoos ndia fa soona, neukose nanahukuk.

¹³ Tolano-tolanook fo Lamatua ka sue-lai ka lemin! Ami muse moke makasi makandoo neu Manetualain soaneu emi, nana neme makasososa na mai, Manetualain hele basa emi, fo Ana soi-tefa na emi. Dede'ak ndia ana da'di neme hata fo, Manetualain Dula Dale na tao-no'in neu emi, fo Ana tao emi da'di Manetualain hataholi kamahehelen fo malalaok, ma hu ka nde emi mamahele hala ndoos, fo maneme Manetualai na mai.

¹⁴ Hu no dede'a ka nde ndia de, Manetualain nalo emi tunga Hala Malole fo ami tui-bengan neu emi a. Manetualain nalo emi nanahu, Ana nau fo ela emi hapu mame'da mita ita Lamatuan Yesus Kristus matua-mademan.

¹⁵ Hu ndia tolano-tolanoo ngala lemin! Mapadeik matetetu ma ho'u mahele nanolik fo, ami manoli emi kala, nau nai lelek fo ami tui-bengan neu emi, do nai susula makasososak fo, ami sulak fen neu emi a.

¹⁶ Ela leo bee na, ita Lamatuan Yesus Kristus ma ita Aman Manetualain, fe emi kokoe-nanasik, ma natetea-nahehele emi dale ma, fo ela emi hapu tao-no'i ma tui-benga hata fo malole. Hu ka nde Manetualain sue-lai ita, ma hu ka nde dale malole na de, Ana tao na ita tatea-tahele, boema ita tamahena ka'da hata fo malole.

¹⁷ (2:16)

2 Tesalonika

Video 2 Tesalonika 2

Ikuti Kami:

KONTAK | PARTISIPASI | DONASI