Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kerna kerehen Tuhanta Jesus Kristus bage pe kerna kita ipepulung ersada ras Ia, kupindoken man bandu o senina-senina:
2 Ula mesunahsa bene ukurndu adi ikataken kalak maka Wari Tuhan e nggo seh. Banci jadi si enda ikataken kalak si sangana ikuasai kesah-kesah, ntah kalak si ngajar. Ntah pe banci jadi ikataken kalak maka pernah isuratken kami bage i bas surat kami.
3 Ula bere kam itipu kalak i bas kai pe. Sabap Wari Tuhan e langa bo seh adi langa kin seh pemberontaken si perpudi dingen teridah si Jahat si itetapken ku bas neraka e.
4 Ilawan si Jahat e me pagi kerina si isembah manusia bage pe kerina dibata-dibata manusia. Ipeganjangkenna bana i babo si e kerina. Lebih asangken si e bengket dingen kundul pe ia i bas Rumah Pertoton Dibata janah ikatakenna ia Dibata.
5 Ma ingetndu denga kin si enda kerina nggo kuturiken bandu asum aku i tengah-tengahndu?
6 Amin bage gia lit si ngolangisa maka la jadi si e genduari, janah ietehndu nge kai si ngolangisa e. Denggo, i bas paksa si itetapken Dibata teridah me si Jahat e.
7 Kejahaten si terbuni e mulai erdahin, tapi kai si nandangi jadi e labo jadi adi langa kin iagui si ngolangisa e.
8 Kenca bage maka teridah si Jahat e. Jenari asum Tuhan Jesus reh IbunuhNa me si Jahat e alu kesah si ndarat i bas BabahNa nari, janah IkernepkenNa alu KerehenNa si mulia.
9 Si Jahat e pagi reh alu kuasa Iblis. Ibahanna pagi erbage-bage tanda sengget ras tanda-tanda si palsu bage pe kejadin-kejadin si erbahanca mamang ate.
10 Itipuna pagi alu pertipun si Jahat kalak si nandangi bene. Kalak e bene erkiteken la ia nggit ngaloken dingen ngkelengi pengajaren si tuhu-tuhu, e me pengajaren si arah e ia maka selamat.
11 Erkiteken persuruhen Dibata erdahin i bas ia kuasa si erbahanca papak, gelah tek ia kai si la tuhu.
12 Emaka, iukum Dibata kerina kalak si la tek nandangi pengajaren si tuhu-tuhu e, e me kalak si muat kesenangen i bas dosa.
13 O senina-senina, si ikelengi Tuhan, katawari pe arus ikataken kami bujur man Dibata erdandanken kam. Sabap kam ipilih Dibata jadi si pemenana guna iselamatken alu kuasa Kesah Si Badia dingen alu kinitekenndu nandangi pengajaren si tuhu-tuhu e. Ibahan Dibata kam jadi anak-anak si iserapken guna Ia.
14 Kam ipilih Dibata arah Berita Si Mehuli si iberitaken kami man bandu. IpilihNa kam gelah ialokenndu baginndu i bas Tuhanta Jesus Kristus.
15 Emaka, o senina-senina, tetaplah tek dingen ernalem nandangi pengajaren si tuhu-tuhu, si iajarken kami man bandu subuk asum kami ngajar bage pe arah surat kami.
16 Tuhanta Jesus Kristus, ras Dibata Bapanta, si ngkelengi kita dingen arah lias AteNa nggo mereken pengapul si tetap ras pengarapen si paguh man banta,
17 IpetetapNa min ukurndu janah IpegegehiNa kam guna ndahiken dingen nuriken kerina si mehuli.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA