Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ratnan acing Tuhan tau Yésus Keristus idi ratnan tau tebubpun pad-pad denganNeh, kai mutuh nemuyuh, O kinanak-kinanakku,
2 aleg muyuh saget pekisu' terawé idi megagap ku bala lemulun ratnan Aco Tuhan pangeh nacing, ayuneh pangeh bida' lemulun luk kikem roh lek, kian bida' lemulun kareb ieh mada' lek. Kian inan luk pebala, kai ini pangeh nengayud ineh bang surat.
3 Aleg muyuh saluken lemulun ratnan anun-anun, ngaceku Aco ineh na miak macing kareb nateh lemulun mula' lumi ratnan anu atun, idi Lemulun luk Dat luk kumin bang apui uen ngegala'.
4 Ieh sikal metueh ratnan amung-amung luk inan lemulun sembayang idi luk titen lemulun ratnan Allah. Ieh miak ngedita' bururneh, pad ieh tudo bang Ruma' Allah idi ngamo bururneh ineh Allah.
5 Naké muyuh ngerawé kareb ui tudo dengan muyuh ui pangeh nemala amung-amung ini kuan muyuh?
6 Iamo' inan luk ngesabeng ineh nekini, pad ieh na mangun, idi muyuh kali' anun ineh. Bang kareb luk inau' lutep, Lemulun luk Dat ineh miak ngegala' bururneh.
7 Luk Inalum ineh kali' rungen uned ngakem, iamo' inan luk nabeng nekini. Kudeng luk nabeng ineh talan,
8 Lemulun luk Dat ineh miak uen ngegala' idi miak pitayen Tuhan Yésus ku bui tangNeh, idi uen ngusag ku rasat acingNeh.
9 Idi Lemulun luk Dat ineh macing dengan lalud Sétan, idi nganau' kekamen luk melalud, idi tanu' luk na matu idi kekamen luk nan mawa.
10 Ieh naluk lemulun luk kumin maté ku saluk luk dat. Lemulun ineh miak maté, ngaceku na ideh ngalap idi mawa ku luk matu pad ideh miak uen ngulun.
11 Ini punneh Allah nengacing kuandeh sebuleng lalud luk ngeraruh, pad ideh miak manu ku luk mebalih,
12 pelé amung-amung luk na manu ku luk matu, iamo' mawang niat ku luk dat ineh miak uen ngediman.
13 Iamo' do' kai ini megéi maré ubur kuan Allah ngaceku muyuh, O kinanak-kinanankku luk inan Tuhan mawa. Ngaceku muyuh pangeh pinili' Allah rat pun-pun pad uen ngulun, ngaceku muyuh linigan bang Roh, idi muyuh manu ku luk matu.
14 Allah nenawar nemuyuh kuan luk kudeng ineh dengan Bala luk Do' luk bida' kai nemuyuh; Ieh nenawar nemuyuh, pad ngalap babpat ratnan rayeh Tuhan tau Yésus Keristus.
15 Ngaceku ineh, O kinanak-kinanakku, do' muyuh tuped meraben, idi ngimet amung-amung bada' luk pangeh bida' kuan muyuh, do' dengan bala idi surat kai pana'.
16 Do' Tuhan tau Yésus Keristus sebuleng, idi Allah Taman tau, luk pangeh mawa netau idi nemaré ubuk luk meruked idi rapet luk do' ngaceku ratnan katuNeh,
17 ngubuk niat muyuh idi ngeraben nemuyuh bang anid-anid kekamen idi bala luk do'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA