Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tentang ratong-Ni Tuhan ram Isa Almasih, rik mengenai haga dikumpulko ram untuk tinggal jejama Ia, injido sai kukilu nihan jak keti:

² Dang geluk-geluk bingung atau gelisah ulihni wat kabar bahwa radu sampai ranini Tuhan Isa ratong luot. Halokni kabar ano asalni jak sai nubuat, atau jak suatu ajaran; atau halokni juga wat sai cawa bahwa sekam pernah nulis sai injuk reno di delom salah sai surat sekam.

³ Injuk repa pun juga, dang naganko jelma nipu keti. Mani semakkung sampai Rani seno, harus tejadi hal inji lebih mena: Lamon jelma haga murtad, ngingkari Almasih; rik Manusia sai Jahat ditakdirko untuk kuruk mik neraka, haga ngeliakko diri.

⁴ Ia haga mepungah ngelawan rik ngelanggarko diri di atas sunyin sai disumbah ulihni manusia, atau sunyin diwa sai dianggap Allah ulihni manusia. Bahkan ia haga mejong di delom Lamban Ibadah rik ngumumko bahwa iado Allah.

⁵ Ingokdo bahwa nyak pernah ngeni pandai sunyinni ano waktu nyak masih jejama keti.

⁶ Rik keti pandai api sai tano masih ngelarang tejadini sunyinni ano. Kanah waktu sai radu ditantuko ulih-Ni Allah, Manusia sai Jahat udi haga muncul.

⁷ Kekuatan sai ngeguaiko kejahatan ano radu mulai beguai secara rahasia kidang masih ditahan-tahan. Kanah kik sai nahanni ano radu disingkerko,

⁸ ampai keliakan Manusia sai Jahat udi. Maka kapan Tuhan Isa ratong, Ia haga ngebunuh Manusia sai Jahat udi jama napas jak banguk-Ni, rik ngebinasakoni jama kecemerlangan kehadiran-Ni.

⁹ Manusia sai Jahat udi haga muncul jama suatu kuasa sai balak jak iblis. Ia haga nyani sunyin macam keanehan rik hal-hal luar biasa sai lamon tipuan.

¹⁰ Ia haga sunyin tipu muslihat sai jahat untuk nyesekko jelma-jelma sai haga binasa. Tian haga binasa mani nulak rik mak gering kabar sai benor jak Allah sai dapok nyelamatko tian.

¹¹ Udido sebabni Allah ngeratongko jama tian suatu kuasa sai nyesekko, sehingga tian percaya api sai mak benor.

¹² Akibatni, sunyin jelma sai gering jama dusa rik mak percaya jama sai benor udi, haga dihukum.

¹³ Puari-puari sai dikasihi Tuhan! Sekam selalu harus ngucapko terima kasih jama Allah tentang keti, mani jak mulani Allah radu memilih keti untuk diselamatko. Hal udi tejadi ulih api sai diguaiko Ruh-Ni Allah jama niku untuk ngejadiko keti umat-Ni Allah sai suci rik ulih mani keti percaya jama kabar sai benor jak Allah.

¹⁴ Untuk senodo Allah ngurau keti liwat Kabar Betik sai sekam beritako jama niku. Allah ngurau keti, mani Ia haga in keti nutuk ngerasako keagungan Tuhan ram Isa Almasih.

¹⁵ Ulihni seno, Puari-puari, cecokdo teguh rik cating terus ajaran-ajaran sai radu sekam keniko jama niku, baik sai lisan maupun sai tetulis.

¹⁶ Semoga Tuhan ram Isa Almasih tenggalan, rik Allah Bapa ram ngehibur rik nguatko hatimu, in keti dapok ngeguaiko rik ngabarko api sai betik. Mani Allah mengasihi ram, rik ulihni kebetikan hati-Ni Ia nyani ram tetap tabah, rik ngeharapko sai betik.

¹⁷ (2:16)

2 Tesalonika

Video 2 Tesalonika 2

Ikuti Kami:

KONTAK | PARTISIPASI | DONASI