Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 An Paulus men Silwanus men Timotius menen Allah umalikisi o Tesalonika welahebon fahet suwesingga aru emberuk lahe. Hit Ninikni Allah men Nonowe Yesus Kristus men mangno roho welahepma niren hi heneptuk lahe.
2 Hit fahet Ninikni Allah men Nonowe Yesus Kristus menen Inindi henesug lit hinindi yuwahap heneptuk lamuhuben niren sembahyang uruk lahe.
3 Nori, niren hit fahet likiya hupmu Allah fam Ninikni uruk lit wel tuk teg lahe. Hiren Yesus Kristus fam hinindimu wenggel haruk lahep ane anggolo atuk lit honori hinindi enesug lahep ane ine atuken niren Allah wel tuk teg lahe.
4 Allah umalikisi o pumbuk winon fam werehon enesehelimu wereg lit hiren fano ane turuk ulug wel heneptuk lahe. Alem siyahon hunubam atukmu aben hunusul ulug mug heneplug laruk angge famen hinindi yuwag toho wereg lit Yesus fam hinindi wenggel haruk lahepma niren wel heneptuk lahe.
5 Hiren ari roho turuk lahep ane ariyen Allahn alem pikit toho haltuk ane inam atisi. Ap obog toho Inikni aruhu ane fahet asengseng ane hunubam atukon ariyen hit fahet Allahn fano peruken Allah wereg ambeg ngi hinap welahep.
6 Allahn alem pikit toho haltuk lit aben hit siyahap heneptukon fahet ayeg waroho Aren oho it siyahap eneptuk.
7 Nonowe Yesus men Otsi malaikat men indok ambulpul turukon sehelimu lehoma wereg lit poholman inam amuhup sambil ino alem siyahon hit hunubam atuk ane ariyen Allahn kel taruk ambeg fanoma hiret niret hiyag nisahu.
8 Ari tuhu sambil ino Nonowe Yesus awene holtul fug ulug Allah enembol yig Utuk inap arimano ayeg waroho siyahap enebuhu.
9 Ari turuk inap arimano Nonowe Yesus lehoma Ine roho werehon Alukema wam fug angge weregma Allahn yatma hik isaruk lit alem unubam umbuhuwon ino unubam weregman eneg welamuhup.
10 Ari tuhu sambil ino Yesus waruhureg At umalikisi sehelimu weregma iren Unuk leho ferukmu Ubam wenggel haruk inap arimano At wel turuk lamuhup. Niren wene hiyag hisarukukmu holtikipteg hinindimu we tem toho wenggel haruk latikibon hiren oho At wel turuk lamuhup.
11 Nori, Allahn wol heneptisimu hiren Allahn mumal eneptuk inaben tuk hag teg ane turuk lamuhuben Allahn let henebuhu ulug niren sembahyang likiya hupmu hit hunubahet uruk lahe. Hiren fano ane tul peruk lahebon hikit toho tuk hag teg ulug Aren hinineyap heneptuk laruhu. Yesus fam hinindimu wenggel haruk lit mun ane man ane turuk lahebon fano aruhuwen Aren let heneptuk laruhu.
12 Ari roho turuk lit welamuhupteg Nonowe Yesus unuk hit sehelimuwen palimu aruhumu hir oho At alukema wereg lit palimu amuhup. Ninikni Allah men Nonowe Yesus Kristus menen Inindi henesug lit werehen ari turuk lit palimu welamuhup.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA