Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto 'o Tesalonika ma jamati, gee niodadi nanga Dea ma Jo'oungu ma Dutu 'awi kawasa, de to ma Jou Yesus Kristus 'awi kawasa! Ngomi ge'ena la 'o Paulus, 'o Silas de 'o Timotius,

² mioga'asoko la tanu ma Jo'oungu ma Dutu to ngone nanga Dea de ma Jou Yesus Kristus nikula 'o barakati de 'o sanangi.

³ 'Esa moi riaka dodoto, ngomi salingou kaitaurika mio'amalaha ma Jo'oungu ma Dutuka sababu ngini. De yadaene miodiai kone'ena, sababu 'ania ngo-ngaku 'o Yesusika kaikuata monga, de kanimakadora monga.

⁴ Ge'enau so gee ngomi miaika ma Jo'oungu ma Dutu 'awi jamati 'iregu-reguka 'isinoimi, ngomi kamiomore-morene miosijarita ma ngale ngini niotahani de nia ngo-ngaku 'ikua-kuata ma Kristusika, ngaro nisikisaa de niosangisara ma.

⁵ Ge'ena 'iodumu ma no-nako 'iwai-waiti monga 'ato ma Jo'oungu ma Dutu dua 'o nyawa wahakimi posironga de 'itiaioka. Ngini ne'ena naga niokasangisara sababu ngini winisingounu ma Jo'oungu ma Dutu, ge'enau so ngini dua yadaene niowosama ma Jo'oungu ma Dutu 'awi pareta ma sigoronaka.

⁶ 'Una 'asa wadiai gee 'iloa-loa, de 'asa wosibalasi 'o sangisara gee kiaka naga nisisa-sangisarakau nginika.

⁷ De ngini gee ma 'orasi ne'ena niosa-sangisara -- de mita ngomi -- ma Jo'oungu ma Dutu 'asa wonasisanangi gee ma 'orasi ma Jou Yesus woboali 'o sorogaaku. Ma 'orasi ge'ena 'una womasidumutu de 'awi sagala mala'ekati gee ma kuasa 'iamo-amoko

⁸ de 'o 'uku 'iluru-lurusu, de wakisangisara 'o nyawa gee kowika-kalesanguwa ma Jo'oungu ma Dutu de gee yooluku yo'ahu moteke 'o Habari ma Owa ma ngale 'o Yesus to ngone nanga Jou.

⁹ 'O nyawa go'ona 'asa yakihukumu so yosangisara kaisi'ado-'adonika. Ge'ena ma ngale 'ona yakisitingaka ma Jou 'awi bionoka de koyamakewa 'awi pareta gee posironga 'isureka.

¹⁰ Ge'ena 'iodumu 'asa 'idadi gee ma 'orasi 'o Yesus woboali ma ngale wisitedene 'awi nyawa de wihoromati 'o nyawa yongaku-ngaku 'iodumu. Ma nyawa-nyawa gee wisitede-tedene de wiho-horomati 'o Yesus, ge'ena dau ma dodaka ngini mita. Sababu ngini niongakuokau 'o habari gee minisitota-totara nginika.

¹¹ Ge'enau so ngomi kaitaurika minisilahidoa la ma Jo'oungu ma Dutu gee wini'asokokau ngini, winidiai ngini nia'akunu nio'ahu moteke 'awi mau. Tanu ma Jo'oungu ma Dutu de 'awi kuasa winiriwo la niadiai 'ania manarama yaowa-owa 'iodumu gee niomau niadiai, de wositotomo 'ania manarama 'iodumu gee niadi-diai sababu niongaku ma Kristusika.

¹² De koge'ena niodiai, 'o Yesus to ngone nanga Jou gu'una 'asa wisiarene, de sababu 'una, so ngini mita 'asa nisiarene. Ne'ena dua 'idadi sababu ma Jo'oungu ma Dutu de ma Yesus Kristus to ngone nanga Jou manga singina posironga 'isureka nginika.

2 Tesalonika

Video 2 Tesalonika 1

Ikuti Kami:

KONTAK | PARTISIPASI | DONASI