Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian jemaah lẽq Tesalonika, saq jari dengan-dengan saq tehususang bagi Allah Bapante dait Junjungan Saq Mulie Deside Isa Almasih! Tiang pade, Paulus, Silas dait Timotius

² beharep semoge Allah Bapa dait Junjungan Saq Mulie Deside Isa Almasih ngicanin side pade rahmat dait damẽ sejahtere.

³ Semeton senamian, tiang pade tetep ngucapang syukur tipaq Allah lantaran side pade. Dait mule sepatutne tiang pade piaq maraq nike, sẽngaq iman side pade sayan belẽq dait kasih side pade sopoq kance saq lain sayan belẽq ẽndah.

⁴ Lantaran hal nike, lẽq arepan jemaah Allah, tiang pade bangge lẽq side pade lantaran iman dait ketabahan side pade lẽq dalem selapuq penganiayean dait penderitean saq side pade alamin.

⁵ Dait lẽq deriki nyate berembẽ adilne penghakiman Allah, saq nyatayang bahwe side pade patut jari warge Kerajaan Allah, side pade saq mangkin menderite lantaran Kerajaan nike.

⁶ Ie ngelaksaneang napi saq adil, dait gen datengang pembalesan tipaq dengan saq miaq side pade menderite.

⁷ Dait tipaq side saq mangkin niki menderite -- maraq nike ẽndah lẽq tiang pade -- Allah gen ngicanin rase lege lẽq jelo Junjungan Saq Mulie Deside Isa turun lẽman sorge nyatayang diriq-Ne teiring siq malaẽkat-malaẽkat-Ne, dalem kuase-Ne, lẽq dalem api saq ngelaur-laur,

⁸ jari nentuang pembalesan tipaq ie pade saq ndẽq mẽlẽ kenal kance Allah dait ndẽq mẽlẽ taat lẽq Kabar Solah mengenai Deside Isa, Junjungante Saq Mulie.

⁹ Dengan-dengan nike gen nerimaq hukuman kebinasean selaẽq-laẽqne, tejaoqang lẽman hadirat Tuhan dait lẽman kemuliean kekuatan-Ne;

¹⁰ selapuqne nike gen telaksane lẽq jelo Ie rauh ẽraq jari temulieang siq selapuq dengan-dengan saq percaye, lantong side pade ẽndah sẽngaq side pade percaye lẽq kesaksian saq tiang pade beriteang tipaq side pade.

¹¹ Keranaq nike tiang pade tetep do'eang side pade. Tiang pade bedo'e adẽq Allah jariang idup side pade patut menurut pekayunan-Ne; jari hal nike Ie ngemanikang side pade. Dait adẽq siq kuase-Ne Ie nyempurneang kemẽlẽqde jari piaq saq solah, dait nyempurneang selapuq pegawẽan iman side pade.

¹² Sehingge pesẽngan Deside Isa, Junjungante Saq Mulie, temulieang lẽq dalem side dait side lẽq dalem Ie, menurut rahmat Allahte dait Junjungan Saq Mulie Deside Isa Almasih.

2 Tesalonika

Video 2 Tesalonika 1

Ikuti Kami:

KONTAK | PARTISIPASI | DONASI