Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rat ni Paulus, Siluanus idi Timotius — Kuan sidang lun Tesalonika luk bang Allah Taman tau, idi bang Tuhan tau Yésus Keristus:
2 Do' katu idi awang ratnan Allah Taman tau idi ratnan Tuhan tau Yésus Keristus temurun kuan muyuh.
3 Idi do' kai megéi' maré ubur kuan Allah ngaceku muyuh, O kinanak-kinanakku, mepad kudeng luk petulu, ngaceku anu muyuh amé'-amé' mula', idi awa rat arang muyuh sebuleng amé'-amé' mela kuan anid-anid burur muyuh.
4 Ineh punneh kai ngubur nemuyuh bang amung-amung sidang Allah, ngaceku ulai niat idi anu muyuh bang amung-amung dereh idi susa' luk ngesabeng nemuyuh.
5 Ineh luk mangun ku tanu' ratnan ukum Allah luk matu, ratnan muyuh mayu ruen ngiap kuan Imet Allah, idi ngaceku ineh muyuh kali' medereh teh.
6 Ngaceku Allah miak nganau' luk matu. Ieh pian ngedereh lemulun luk ngedereh nemuyuh.
7 Idi muyuh luk pidereh ineh miak ngalap do' udeng pad-pad dengan kai, kareb Tuhan Yésus uen ngegala' rat surga dengan amung-amung baweh melaikatNeh,
8 dengan apui luk mebudung, pad ngua' kuan amung-amung lemulun luk na miti Allah, idi kuandeh luk na sikal maya' Bala luk Do' ratnan Tuhan tau Yésus.
9 Ideh miak ngalap dereh até luk meruked pitad rat pa kiung Allah idi ratnan rayeh laludNeh,
10 kareb Ieh macing bang Aco ineh, pad Ieh uen ngerayeh bang amung-amung pupuNeh, idi uen ngedita' bang amung-amung lemulun luk manu. Kareb ineh muyuh pana' idi arangdeh, ngaceku muyuh pangeh manu ku bala luk bida' kai nemuyuh.
11 Ineh punneh kai megéi sembayang kuan muyuh pad Tuhan tau ngiap nemuyuh petulu maya' tawarNeh nemuyuh. Idi dengan laludNeh do' Allah ngacing amung-amung pian muyuh, pad muyuh maya' luk do' idi pad kekamen anun muyuh uen ngeriput,
12 pad ngadan Tuhan tau Yésus uen ngerayeh bang nemuyuh, idi muyuh bang Neneh, maya' katu Allah idi Tuhan Yésus Keristus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA