Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 An suratna tïngare Tesalonikak de Kristen zi hip, Bian Alap ne Bian Kristus Yesus nik mo bi eibiridan wenya kip, Paulus, Silas, hen Timotius mae onakon:
2 Dawem! Diki Bian Alap ne Bian Kristus Yesus ne sa kwasang-kwasang zemka mamkam ebe mae hap ol gwizimdi. Hen nen zëno nik mo taha terenak esa lowehe gwer.
3 Aya-wal oso-wal, ëe Alapsa anakanë en sone gweblanan, “Bian, Em ema asa sam ta gwibirida, sap Tesalonikak de Kristen zini dawem tangankam lowehe gwenan.” Ëe insa kirekam en sone gweblanan man dakastïꞌïn, sap em Yesussu de taïblïblanna hen enaka de kwasang gwibirida gwenna ema esek ulse zahe gweꞌan.
4 Zen in zebë ebe mae hap dena lonbiridanda gwenan– men san ki aena Alap mo hlïl irin zini amjanbiridanda gwenanye, “Tesalonikak de Kristen zini sap kareksa noltowe gwenan, hen aha zi man sap Kristus hup de jal hap mamkam karek da gwibirin, hwëna zen nama Yesussu de taïblïblannak tatem ëzauk gwenan.”
5 Eiwa, em insa kirekam Alap mo ïrïk gïn hïp de jal hap karekna oltowe gweꞌan, hwëna zen zep mes tangan dam gwesïnïn: Em zëwe de bïtï gwen hap esa tangan ëdakastïl. Sap Alap dam-dam enkam zisi klis gul gwenda.
6 Zen zep sa hen kirekam Alap mo dam-damkam de klis gun hup dena dam gwesïl– Zen kim de kareknak kang guꞌunka, zini men zen angkam emsa karek da gwibiꞌinye.
7 Zen dekam sa hwëna emsa dawemnak dep kang gul sera– apdekam aban mae, hen tïngan men zene zëre mo bose hap karekna oltowe gwenanke. Nëre mae mo Bian Yesus de ngatan zi mo lang nakon Alap mo dam taha nakore jana nabare zi niban golëati gwe ine zankam, zen kirekam sa lwal. Zen dekam zëre mo ngatan zi mo lang nakore syauk hïtïn makare ngatan naban sa golati gwe ine zala. Men zen Alapsa tame da srëm gwe-gwenan, hen men zen Yesus hup de ol dawemna i-san i-san neibir srëm gwe-gwenan, desa dekam sa zikarek tabir zira–
8 (1:7)
9 ëtimbwas gwen makan de hëndep denaban tïnsïn srëm syauk blanak kang gunkum. Desa Bian Zëre onakon langa san dep sa yal gulu. Zen dekon sa sap ëdwam gwe tine gwer– etan de sap Bian mo ngatan zi mo lang nakore sosonsa hlaun hupye.
10 Zen kïtak Bian mo nësa de tagal gulsuzun hap de lwa halzan yaklanak sa kirekam lwal. Dekam Bian Yesus mo hlïl irin wenya, men Desa Zënaka de taïblïblan hap dam tasibirki, zen zen sa zëre mo bosena teip nulsublunda gwer, hen zen dekam sa zëre mo ngatan zi mo lang nakore sosonna sërkam denggwan gwibir. Em hen zëwee bïtï gweꞌan, sap em mese abon mae onakon Yesussu laïblïblak.
11 Zen in zebë Alapsa ebe mae hap anakan abe la tine gwenan, “Bian, Em mese desa ere onak dep kwang guludaka, zep dikire zëno mae mo lowe henna eno nwenak dakastïl gwek. Emki zëbe mae hap sosonsa sowe henkam gol gwizimdin, sap zen angkam dawemsa de tïngare zi hip goltrei gwizimdin hip ëdwam gwe-gweꞌan– aha zi dekakim desa anakan dam dasïk gwibik, ‘Zen eiwa mes tangan dawemkam Biansa daïblïblak, zep dawemkam lowehe gwenan.’
12 Zep Bian, zëno mae mo lowehen dawemna in kon dikire aha zi kirekam Bian Yesus mo bosena teip nulsublunda gwek. Zen mes Kristus hun nëraha-en gwek, zep dikire ëKristen gwen srëm wenya desa hen blikip neisibirida gwek. Bian, an kïtak kirekam sa ki lwa gwer, sap Ere onakore kwasang-kwasangna hen Bian Yesus onakore kwasang-kwasangna abon mae onak lwa gwenan.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA