Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Natarimai sikontu sari’battangku, iamintu jama’ah niaka ri Tesalonika, a’jaria Umma’Na Allata’ala Manggeta siagang Batara Isa Almasi! Ikambe, iamintu Paulus, Silas siagang Timotius,

² ma’minasa ngasengki’ nuporo nisare ngaseng barakka’ siagang salewangang ri Allata’ala.

³ Sikamma sari’battangku; tena tappu’na appala’ sukkuru’ ikambe mae ri Allata’ala lanri ikau ngaseng. Na memang, siratang memang tongi appala’ sukkuru’ ikambe, lanri pila’ tappa’ ngasengko mae ri Almasi, siagang pila’ massing sikamaseangko.

⁴ Iaminjo saba’na natuli nacaritako ikambe punna mangeki’ akkunjungi jama’ah-jama’aNa Allata’ala nakipuji ngasengko ri alla’na sikamma jama’aNa Allata’ala. Lompomi pa’mai’na ikambe ancaritai antekamma majarre’na tappa’nu mae ri Almasi ri tangnga-tangngana passessaya siagang kapa’risang nukasiaka.

⁵ Anrinnimi anne a’nyata antekamma adele’na apa le’baka Natappuki Allata’ala; Le’ba’mi nukasia’ sessaya passabakkang Lino BeruNa Allata’ala, jari lanikellai mako antama’ anjoreng.

⁶ LaNagaukangi Allata’ala apa adeleka. LaNabalasaki passessa sikamma tau le’baka ampa’jari sessako.

⁷ Na untu’ ikau angkasiakai pa’risika ri kamma-kammaya anne — kammayatompa ri kambe — laNasareki’ kasalewangang Allata’ala, punna battu sallang Batara Isa, manaunga battu ri suruga ampa’nyatai KalenNa siagang malaeka’-malaeka’ lompoNa

⁸ kammayatompa pepe’ a’rinra-rinraya. Manaungi untu’ anghukkungi tau tenaya naero’ anjampangi Allata’ala, siagang tau tenaya naero’ mappilangngeri ri Kabara’ Bajika ri passala’na Isa Almasi Batarata.

⁹ Anjo tau kammaya langgappai hukkungang kapanrakang sa’genna satunggu-tungguna; nipelaki assulukang battu ri pammantanganNa Batara, battu ri kalompoanNa siagang kakoasanNa,

¹⁰ iamintu punna battu sallang Batara untu’ lanipakalompo ri umma’Na siagang untu’ lanikangalikang ri sikontu tau tappaka. Ikau pole, lania’ ngaseng tongko ri alla’na anjo umma’Na Allata’ala, lanri tappa’ ngaseng mako mae ri anjo biritta napabattua ikambe mae ri kau ngaseng.

¹¹ Lanri kammanami anjo nakituli appala’ doang untu’ ikau ngaseng. Appala’ doangi ikambe mae ri Allata’ala, sollannu Nasare pangngellai untu’ attallasa’ situru’ ero’Na; iaminjo saba’Na naNakio’ ngasengko. Poro Allata’ala lalang koasaNa Napa’rupai ero’Na untu’ a’gau’ baji’, ampassukkuki jama-jamang nugaukanga lanri tappa’nu mae ri Almasi.

¹² Lanri kammana anjo nanipakalompomo Batarata Isa ri kau ngaseng; kammayatompa nipakalompo tommako ri Isa lanri kabajikang pa’mai’Na Allata’ala siagang Batara Isa Almasi.

2 Tesalonika

Video 2 Tesalonika 1

Ikuti Kami:

KONTAK | PARTISIPASI | DONASI