Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O nyawa yongaku-ngaku gee yodadi 'o yongosi, salingou yamaoku 'ato manga tuangi ge'ena salingou yakihoromati, la 'o nyawa 'uwa yosito-torou ma Jo'oungu ma Dutu 'awi ronga bolo nanga do-dotoko.

² 'O yongo-yongosi gee manga tuangi yongaku-ngaku, 'uwa koyakibaragunawa manga tuangika sababu yamaoku matero ka 'o 'esa moi. Ma 'ena salingou 'onakasi 'ifoloi yakileleani yaowa, sababu gee yakileleani yaowa-owa go'ona, ge'ena ka 'o ngo-ngaku moi yakisiboso-bosono.

³ Nago'ona yosidotoko 'o do-dotoko 'imakaregu de ge'ena de koyosimotekuwa 'o do-dotoko 'iti-tiai ma Yesus Kristusino, to ngone nanga Jou gu'una, de mita koyosimotekuwa gee ma Jo'oungu ma Dutu wodua-duaka ngone padiai,

⁴ 'ona ge'ena yoma'ede-'edenge de ka 'okiawa yanako! To 'ona manga biasa 'ito-torou ge'ena la yoduaka yomakasango de yomakangamo ma ngale yomaributu 'o demo-demo ma ngale, sigado 'idadi 'o kadu'uduku, 'o kadi-dingaka, 'o sigurubungu, 'o tahajiri,

⁵ de yomakatasala koiboo-bootuwa. 'O nyawa go'ona manga di-dibangi 'iti'imuokau de koitiaiwau. 'Ona yongose dua yamoteke ma Jo'oungu ma Dutu wodua-duaka de 'idadi yokaya.

⁶ Ma goungu po'ahu de ma Jo'oungu ma Dutu de nanga 'ahu yaowa de pamao yaowakau 'okia sonaa paka-ka'elino, ge'ena ma faedaa 'iamoko.

⁷ Sababu ngone poboa 'o duniano ma ko 'okiawa po'asa, de gee dua posongene ma ko 'okiawa pa'asa.

⁸ So, nako 'o 'inomo de 'o pakeangi de ma 'ena, ge'ena yaowakau.

⁹ Ma 'o nyawa gee yomau yokorago, 'ona yakisihaga de to 'ona manga nyafisuu ma sirete gee ma ngale koi'iwa-'iwa de 'ito-torou. 'O nyafisuu ge'ena 'o nyawaka yakisitorou de yakisibodito.

¹⁰ Sababu 'o pipi podopokana ge'ena 'o sagala dorou ma titi. Naga munuka 'o pipi yodopokana so koyamotekuawau nanga do-dotoko. Ge'enaka de 'ona yakidaene 'o sangisara 'o gudai gee manga singina ya'ogu.

¹¹ So 'iodumu ge'ena salingou nomasikurutika, sababu ngona ge'ena to ma Jo'oungu ma Dutu 'awi rongamoi. Nomariwo nodadi 'o nyawa 'iloa-loa ma Jo'oungu ma Dutu wi bionoka, nogilaongo ma Jo'oungu ma Dutuka, nongaku ma Kristusika, nakidora 'o nyawa-nyawa, notongosono 'o sangisara ma sigoronaka, de ni singina 'ima'ai.

¹² Nomariwo nosigou-gounguku 'ani ngo-ngakuoka matero kanotandingi la namake 'o parasengi ge'ena la 'o 'ahu 'ika-kakali. Ma ngale ge'enau ma Jo'oungu ma Dutu woni'asoko ma 'orasi ngona nomangaku 'o nyawa manga gudai manga bionoka 'ato ngona nongaku ma Kristusika.

¹³ De ma 'orasi ne'ena, ma Jo'oungu ma Dutu gee wosi'ahu-'ahu 'o sagala moi-moi 'awi bionoka, de mita ma Kristus Yesus gee 'awi sakisii 'iti-tiai 'o Pontius Pilatusika 'awi bionoka, ngoi tosuloko, ge'ena la:

¹⁴ Namoteke 'o besesongo 'iodumu ge'ena ka ma eta ma 'uwa 'ikurangi sigado ma wange nanga Jou Yesus Kristus woboali.

¹⁵ 'Awi bo-boa ge'ena dua ma Jo'oungu ma Dutu ma sirete wositantuu ma 'orasi yadae-daenuku. 'Unau ge'ena woku-kuasa, 'una woamoko, 'o sagala koana manga Koana, de 'o tua-tuangi manga Jou.

¹⁶ Ka 'una duga koidadiwa 'o songene wikuasa; 'una wo'ahu 'o cahaya ma sigoronaka gee nago'ona bato koidadiwa yasori. 'O nyawa ka moi ma koma'iwasi wimake, bolo koidadiwa wimake. 'Unakau 'o horomati de 'o kuasa kaisi'ado-'adonika! 'Amin. Koge'enau.

¹⁷ 'O nyawa yokaya-kayaka 'o duniaka ne'ena, salingou nakisitiari la 'uwa yomaie de 'uwa yomasinganono 'okia sonaaka gee kaiisangoka, 'isoka manga harataaka. 'Ona salingou yomasinganono ma Jo'oungu ma Dutuka gee koitoa-toakuwa 'okia sonaa moi-moi wonakula-kula la posanangi.

¹⁸ De salingou posironga 'o gudai yadiai gee 'isure-sure, de yoduaka 'o nyawaka yakiriwo de manga singina 'isure-sure, de 'okia naga 'onaka ge'ena yakisibula-bula 'o nyawaka.

¹⁹ De ge'ena 'ona yomadolomu 'o harataa gee 'imadadi ma titi yaowa-owa ma ngale ma du'uruoka. Ma sababu ge'enau 'ona 'asa yamake 'o 'ahu kaisi'ado-'adonika, ge'ena la 'o 'ahu ma dutu.

²⁰ Timotius! 'Okia naga gee ma Jo'oungu ma Dutu wosito-togumokau ngonaka, ge'ena salingou nakalesangi nosidi-diai. 'Uwa nosigisenika 'o jarita gee ma faedaa koi'iwa-'iwa, de gee yomakakaributu 'okia naga koiti-tiaiwa 'ena yosironga "'O do-dotoko ma owa".

²¹ De sababu naga munuka yamotekokau 'o do-dotoko ge'ena, so yoisangokau 'o do-dotoko 'iti-tiaioka. Tanu ma Jou winisibarakati, 'Esa moi riaka dodoto. Ngoi 'o Paulus, tinitabea!

1 Timotius

Video 1 Timotius 6

Ikuti Kami:

KONTAK | PARTISIPASI | DONASI