Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kerina si jadi budak arus erpengakap maka tuanna patut ndatken kerina kehamaten, gelah ula ipebau-bau kalak gelar Dibata ras pengajarenta.
2 Budak-budak si kalak Kristen tuanna, ula la mehamat man tuanna, sabap tuanna e seninana kap. Tapi reh ulina min perbahanenna man tuanna, sabap dahin si idahikenna e man guna kalak si tek, si ikelengina. Ajarken dingen beritakenlah enda.
3 Kalak si ngajarken kiniteken si deban si la sue ras Kata Tuhanta Jesus Kristus dingen la sue ras pengajaren kinitekenta,
4 petua-tuaken dingen pebeluh-beluhken kap ia. Kai pe labo ietehna. Sura-surana la mehuli. Nggit kal sisimbaken; janah si enda erbahanca turah cian ate, perubaten, cekurak, sangka-sangkan si la mehuli,
5 bage pe perubaten si la erngadi-ngadi ras kalak si la pinter ukurna dingen si lanai lit i bas ia kebujuren. Iakapna agama dalan ncari kebayaken.
6 Tuhu, agama erbahanca kalak bayak, adi puas iakapna erkiteken kai si lit i bas ia.
7 Lit kin tah kai gia sibaba ku doni enda? Lang! Banci ntah kai gia sibaba ndarat i doni enda nari? Lang!
8 Emaka cukup min siakap adi lit nakanta ras uista.
9 Kalak si ersura-sura bayak ndabuh me ku bas percuban janah bene me ibahan erbage-bage sura-sura si bodoh dingen jahat, si erbahanca kalak gedap dingen kernep.
10 Sabap merangap nandangi duit e me sumbul kerina kejahaten. Nggo lit piga-piga kalak si merangap nandangi duit lanai tetap i bas kiniteken janah gulut ukurna ibahan erbage-bage kecedan ate.
11 Tapi kam, o suruh-suruhen Dibata, tadingkenlah si enda ndai kerina. Usahakenlah ndalanken si ngena ate Dibata, tutus ersembah man BaNa, tetap ernalem ku Ia, cidahken keleng atendu, megenggeng dingen lemah lembut!
12 Erlumbalah asa gegehndu i bas perlumban kiniteken, guna ndatken kegeluhen si tuhu-tuhu man gunandu. Sabap guna kegeluhen si e me maka ipilih Dibata kam asum iakukenndu kinitekenndu i lebe-lebe nterem saksi.
13 I lebe-lebe Dibata, si mereken kegeluhen man si nasa lit bage pe i lebe-lebe Kristus Jesus, si erbahan pengakun si tuhu-tuhu i lebe-lebe Pontius Pilatus, kukataken man bandu gelah
14 ikutkenlah pedah-pedah e dingen jagalah gelah tetap bersih dingen la ceda, seh ku warina Tuhanta Jesus Kristus reh peduakaliken.
15 KerehenNa pagi Dibata ngaturkenca i bas paksana. Dibata Pemerentah Si Tonggal dingen Badia, Raja i bas kerina raja, dingen Tuhan i bas kerina tuan.
16 Dibata ngenca nggeluh rasa lalap. Ia nggeluh i bas sinalsal si ise pe la ngasup ndeherisa. Ise pe la pernah ngidah Ia, ise pe la banci ngidah Ia, terpujilah Ia janah iakuilah KuasaNa seh rasa lalap! Amin.
17 Ajarkenlah kalak bayak i bas erta doni gelah ula meganjang ukurna dingen gelah ula ia ernalem man erta-ertana si la tetap, e me kinibayakenna, tapi ernalemlah man Dibata, si mere alu melumbar kerina keperlunta guna kesenangenta.
18 Ajarkenlah gelah idalankenna si mehuli, gelah bayak ia i bas perbahanen si mehuli, gelah nggit ia mere janah meriah ukurna mereken si lit i bas ia man kalak si deban.
19 Alu bage ipepulungna erta guna dirina si banci iarapkenna i bas paksa si reh, gelah idatna kegeluhen si tuhu-tuhu.
20 O, Timotius, kepkeplah alu mehuli kai si nggo iendesken jadi tanggung jababndu. Tadingkenlah percakapen-percakapen si la erguna si la ngena ate Dibata. Bage pe tadingken sijapapen kerna si iakap kalak e "pemeteh" tapi si tuhuna labo.
21 Sabap lit piga-piga kalak si ngataken dirina erpemeteh, tapi erdandanken si e lanai ia tek man Jesus Kristus. Lias ate Dibata rembak min ras kam kerina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA