Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kal᷊awọu tau Sahani kụ nakoạ ěllange, harusẹ̌ masingkạu mawun sire adateng, tadeạu taumata e tawe mapakasamedu arengu Mawu Ruata e arau těntirong kitẹ e.
2 Manga ěllang kụ mawune tau Sahani e tawe wotonge ta měndekeng mawune ual᷊ingu i sire kawe lawọ tau Sahani. Sal᷊ạ anune i sire kai harusẹ̌ mẹ̌tangkiang mawun sire lai limembong kapiane, u mawun sire tẹ̌tangkianeng limembong kapiane ene kai lawọ taumata mạngimang ikẹ̌kěndagẹ̌. Kai harusẹ̌ kerene i kau maněntirong kěbị ini ringangu měnasa.
3 I saịewen maněntiro wal᷊ine wọu ene e kụ tawe sěndal᷊eng dingangu těntiron katul᷊idẹ̌ e wọu Mawung kitẹ i Yesus Kristus, kụ dingangu těntirong agamang kitẹ,
4 kai taumata mal᷊aobotẹ̌ dingangu tawẹ kasingkạ e apa! Sakị e ute kai papuluang měmpẹ̌sasimbahẹ̌ dingangu měmpẹ̌darendehu manga wawera hakịu makakoạ pananoi, pẹ̌bawul᷊o, pẹ̌sasamedẹ̌, antang dal᷊aị,
5 dingangu pẹ̌sasasědụ tawẹ potọe. Daral᷊engu tiněnnan sire ute seng nahěpusẹ̌ kụ seng tawẹ hinone. I sire mětẹ̌timonan makalạ baugu pangangagamane.
6 Kerene wue u agama e makạonggọben kal᷊auntung masěllahẹ̌, kereu taumata e seng mal᷊uasu apan tẹ̌taghuanenge.
7 U tawẹ apa-apa niwawang kitẹ e su dunia ini, dingangu tawẹ apa-apa lai isẹ̌sěbang i kitẹ bọu dunia ini!
8 Kụ kereu piạbe kaěng dingangu pakeang ute ene e seng kapapiane.
9 Arawe taumata kụ mapulu makalạ e, kai kẹ̌kasal᷊ukateng dingangu mạl᷊awungu haghing kapulu wodo ringangu makạsilakạ. Kal᷊awọu kapulu ene e kai makạbonohu taumata e su kaghagholọ dingangu kawawinasa.
10 U kal᷊aanggang su roitẹ̌, kai makakạděntang haghing kararal᷊akisẹ̌. Piạ taumata sěnggạ e mang měmpạnahusu roitẹ̌ hakịu seng tawe tumatuhụ těntiron tau Sahani e, kụ i sire kẹ̌kahombangengken kal᷊awọu haghin sigěsạ makasunsara naung i sire marasai.
11 Arawe i kau e kai taumata tẹ̌taghuanengu Ruata, kụ i kau e harusẹ̌be mẹ̌teghangu kěbị ene. Pẹ̌tawakal᷊iko makoạ taumata maadilẹ̌ su silon Duata, měmunara waugu Mawu Ruata, pangimang si Kristus, kụkěndagu sěndinganeng taumata, kakakědang su susa, dingangu kasasikome naung.
12 Pẹ̌bangkuadẹ̌ko ringangu kạguwạu naung baugu mẹ̌biahẹ̌ kere sěngkatau Sahani e tadeạu i kau makaghal᷊awe tatendenge pẹ̌bawiahẹ̌ tutune ringangu kakalẹ̌. Kai waugu ene Ruata e nẹ̌kui si kau su tempong i kau něngaku su těngon taumata l᷊awọ u i kau mangimang si Kristus.
13 Kụ orasẹ̌ ini e, su těngon Duata kụ puěngu patikụ pẹ̌bawiahẹ̌ e, ringangu su těngon Kristus Yesus kụ seng něngonggọu sahiding katěngadẹ̌ su těngon Pontius Pilatus, iạ e mědẹ̌dorong ini wọ'i kau:
14 Sěmpike wue kěbị parenta ene pakatinalung dingangu tawẹ turạe sarangkewe ěllon Mawung kitẹ i Yesus Kristus ruměnta kapia.
15 Darěntane e ute sarungbe itantu su tempone mapia-pia kahian Mawu Ruata sẹ̌sane. U kai mangangawasa mang sěmbaụ; i Sie Mawantugẹ̌. Datum patikụ Datu, ringangu Mawung kal᷊awọu Mawu.
16 I Sie sẹ̌sane tawe ikawatạ u papate, tangu i Sie kai wiahẹ̌ mẹ̌bẹ̌banua su tualagẹ̌ ta kal᷊ahaungang i sai-sai. Tawẹu sarang sěngkatau taumata reng bọu nakasilo, arau makạsilo. U kai si Sie adatẹ̌ dingangu kawasa sarang kakalẹ̌ e! Aming.
17 Baugu taumata apang kalạ su dunia ini e, oroi tadeạu i sire abe pěmpěngobotẹ̌ dingangu abe pěmpangumbala su kakalạ. I sire harusẹ̌be apangumbala su Mawu Ruata kụ seng něngonggọu patikụ e si kitẹ ipẹ̌dẹ̌dal᷊embo e tadeạu i kitẹ makatemang bue.
18 Sasaiko i sire apẹ̌kẹ̌koạ mapia, apakakalạ su munara mapapia, mal᷊aělludẹ̌, dingangu apakạdal᷊uasẹ̌ mangonggọ.
19 Dingangu ene ute apạngěmungke arẹ̌ta itẹ̌tamang i sire makoạ sasadian tempo ramahi. Tangu waugu ene i sire e sarung makahombang pẹ̌bawiahẹ̌ kakalẹ̌ e kụ kai pẹ̌bawiahẹ̌ tutune.
20 Kụ apạewen seng niumbala si kamene, riagatewe pakapia, Timotius! Pẹ̌teghangben pẹ̌bawawisarang apa tạ kěhase ringangu pẹ̌dararendeh'u apa makạtal᷊ubambing kai isẹ̌sẹ̌ba, "Kasingkạ".
21 U kai piạ taumata měmpẹ̌bera u i sire piạ kasingkạ ene, hakịu měmpẹ̌lẹ̌lenga wọu pangangimangu tau sahani kụ pangimangeng i sire kal᷊amona. Karimakọ Mawu e měngal᷊amatẹ̌ si kamene manga anạ u sěmbaụ. Adat'i kami, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA