Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Selapuq dengan saq jari hambe, harus nganggep majikan ie pade patut tehormatin sepenoqne, adẽq dengan ndẽq bau ngelengẽang pesẽngan Allah dait pengajahante.

² Hambe-hambe saq majikanne dengan saq percaye lẽq Almasih, ndẽqne kanggo ngerẽmẽhang majikanne sẽngaq ie pade bareng-bareng percaye lẽq Almasih. Malahan ie pade seharusne ngelayanin majikan ie pade solahan malik, sẽngaq majikan saq telayanin secare solah nike pade-pade dengan percaye dait pade-pade tekasihin siq Allah. Ajahang niki dait bẽng nasẽhat mengenai selapuqne niki.

³ Sai-sai saq ngajahang pengajahan saq lain dait ndẽqne setuju kance pengajahan saq kenaq lẽman Junjungante Saq Mulie Deside Isa Almasih, dait kance pengajahan saq sesuai kance ibadahte,

⁴ nike dengan saq sombong, dait ndẽqne taoq napi-napi! Penyakitne demen bedebat dait betungkasan mengenai istilah-istilah sehingge nimbulang talon atẽ, ndẽq akor, pitnah, curige saq ndẽq solah,

⁵ dait bẽde pendapet saq ndẽq araq tutuqne lẽq antare dengan-dengan saq ndẽq waras pikiranne dait jaoq lẽman kebenaran. Ie pade paran bau jari sugih lẽman ibadah.

⁶ Mule ibadah nike lamun tebarengin siq rase cukup ngebẽng keuntungan saq belẽq.

⁷ Sẽngaq ndẽq araq napi juaq saq ite jauq ojok dalem dunie niki, dait ndẽq araq ẽndah saq bau ite jauq sugul!

⁸ Jari, lamun araq keloran dait kelambi, nike sampun cukup.

⁹ Laguq dengan-dengan saq mẽlẽ jari sugih, tegode dait tejeret siq segale macem kemẽlẽq saq bodo dait saq nyẽdaq. Kemẽlẽq-kemẽlẽq nike miaq dengan jari ancur dait celake.

¹⁰ Sẽngaq cinte lẽq kẽpẽng nike sumber macem-macem kejahatan. Araq separo dengan saq sesat lẽman imanne dait nyiksaq diriqne siq macem-macem dukecite lantaran palẽq kẽpẽng.

¹¹ Laguq side niki dowẽn Allah, jari side harus jaoqang selapuqne nike. Pade usaheang keadilan, ibadah, kesetiean, kasih, kesabaran, dait atẽ saq lemah lembut.

¹² Pade bejuang dalem peperangan iman saq kenaq dait boyaq jangke mauq idup saq kekel. Sẽngaq jari hal nike Allah ngemanikang side, sewaktu side ngakuq lẽq julun dengan luwẽq bahwe side percaye lẽq Almasih.

¹³ Dait mangkin, lẽq arepan Allah saq ngicanin idup tipaq selapuqne, dait lẽq arepan Deside Isa Almasih saq sampun nyampẽang kesaksian saq kenaq lẽq arepan Pontius Pilatus, tiang tunas hal niki lẽq side:

¹⁴ Pade taat lẽq selapuq prẽntah nike, ndaq jangke araq cacat dait cele jangke Junjungante Saq Mulie Deside Isa Almasih nyatayang diriq-Ne.

¹⁵ Kerauhan-Ne gen tetentuang lẽq waktu saq tepat siq Allah mẽsaq. Ie sopoq-sopoqne Penguase tunggal; Ie agung, Raje lẽq atas selapuq raje, dait Tuan lẽq atas selapuq tuan.

¹⁶ Ie doang saq ndẽq bau tekuasein siq kematẽan; Ie idup lẽq dalem cahaye saq ndẽq bau terapetin siq sai juaq. Ndẽq araq sopoq manusie saq sampun serioq Ie, atao bau serioq Ie. Umaq Ie hormat dait kuase selaẽq-laẽqne! Amin.

¹⁷ Tipaq dengan-dengan saq sugih lẽq dunie niki, side harus bẽng nasẽhat adẽqne ndaq sombong dait ndaq beharep lẽq barang-barang saq ndẽq kekel -- misalne kesugihan. Ie pade harus beharep lẽq Allah saq ngicanin selapuq hal tipaq ite secare belimpah-limpah adẽq ite nikmatin.

¹⁸ Peringet adẽq ie pade ngelaksaneang saq solah, jari sugih dalem kebajikan, demen besedekah.

¹⁹ Siq care nike ie pade ngumpulang harte saq bau jari dasar saq solah lẽq waktu saq gen dateng. Dait siq hal nike ie pade gen mauq idup saq kekel, nike idup saq sejati.

²⁰ Jagaq solah-solah napi saq sampun tepercayeang lẽq side, Timotius! Jaoqang diriqde lẽman raosan-raosan saq ndẽq araq manpaatne dait saq ndẽq suci dait raosan-raosan mengenai hal-hal saq tesebut penenaoq padahal ndẽq.

²¹ Sẽngaq araq dengan-dengan saq ngajahang penenaoq nike dait siq care nike sampun nyimpang lẽman iman. Rahmat Allah araq bareng kance side pade!

1 Timotius

Video 1 Timotius 6

Ikuti Kami:

KONTAK | PARTISIPASI | DONASI