Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Topomparasaya i Yesus anu najadi batua ntona kana mombabila bo matundu nte tuana ala Alatala ledo rasalai ntona bo pepatudukita nakana ledo rapakadaa ntona.

² Ane tuana mboto topomparasaya i Yesus, nee radekei batua haitu mompandaente tuana, sabana ira nosampesuvu sampomparasaya. Tapi ia kana mantambai kabelo pokarajaana sabana tua nitulungina haitu muni topomparasaya i Pue anu nipotovera. Timotius, iko kana mompatuduki pura-pura pepatuduki hitu ka todea topomparasaya bo popatora ka ira ala raoseakara.

³ Naria sanu tona nanggeni pepatuduki anu nosisala ante pepatudukita. Ledo nipokonora tesa-tesa nakana lako nte Tuputa Yesus Kristus bo ledo nipokonora pepatuduki anu nanggeni kita matuvu mangoseaka dota nu Alatala.

⁴ Tona haitu nalanga rarana. Ia netitau tapi ledo nisanina nuapa-nuapa. Ia aga nagila nangelo saba bo nosinjanai ka batua nu tesa. Pepatudukira haitu aga nanggeni tona nasiriati, nosinggarau, nosiuli-uli, nosirai,

⁵ bo ledo naupu-upu nosipakadua rara. Nadaamo pekirira bo domo nisanira anu nakana. Nisarumakara makalumana ira ane moagama.

⁶ Nakana mami, ane noagama kita, naoge mpuu belo rakavata, asaa naosa rarata ante anu naria nte kita.

⁷ Apa tempo kita nipoanaka ledo ria nuapa-nuapa nikenita riara dunia hitu, bo ane kita mamate ledo ria nuapa-nuapa mamala rakenita lako ri dunia hitu.

⁸ Jadi ane maria kandeata bo pakeata, kana maosamo rarata.

⁹ Tapi tona madota majadi makalumana mambela pesori. Ia ratoliani mpengaya-ngaya dota rara anu nadaa bo nadoyo, bo dota-dota haitu mompakagero katuvuana, mompakanavu ia, bo mompakaropu ia

¹⁰ sabana pompotove doi puna mpengaya-ngaya kadaa. Sanu tona nompasimbuku nangelo doi sampe nasalandalamo bo domo nioseakara pepatuduki nakana, bo aga mpengaya-ngaya kasusa nikavara anu nompakabuku rarara.

¹¹ Tapi iko batua nu Alatala. Nee mpuu mokainggu madaa eva haitu! Pasimbukumo majadi tona nanoa ri panggita nu Alatala. Pasimbukumo matuvu mangoseaka dotaNa. Iko kana mompakaroso pomparasayamu, potovemo singgamanusiamu, tidamaka tempo nasusa, bo moinggu malusu.

¹² Pasimbukumo mpuu-mpuu mangoseaka pepatuduki i Kristus. Kingisi pakarosomo katuvu nabelo sampe ri kasae-saena. Apa patuju nu Alatala nompokio iko majadi todeaNa ala mukava katuvu nabelo haitu tempo nipangakumu pomparasayamu i Kristus ri ngayo ntodea.

¹³ Jadi, ri ngayo nu Alatala, anu nompakatuvu pura-pura anu naria, bo ri ngayo i Yesus Kristus anu nabia nompangaku tesa nakana ri ngayo i Pontius Pilatus, kuuli ka iko ivei:

¹⁴ Oseaka puramo parenta hitu ante mpuu-mpuu raramu bo ante pokainggu anu ledo masipato rasalai ntona, sampe makava mpanjili Tuputa i Yesus Kristus.

¹⁵ Ia makava ri tempo nipakatantu nu Alatala. Aga Alatalamo nakuasa, bo nambaso mpuu kaogeNa. Ia Magau nakuasapa pade pura-pura magau ntanina, bo Tupu anu nakuasapa pade pura-pura tupu ntanina.

¹⁶ Aga Ia saito-itoNa ledo mamate. Ia natuvu riara reme anu ledo namala rakaparai. Ledo ria saitoa manusia nanggita Ia, apa ledo nipakule nu manusia manggita Ia. Iamo masipato rabila bo Iamo masipato momparenta sampe ri kasae-saena. Amin!

¹⁷ Timotius, ulika tona nakalumana ri dunia hitu ala nee majadi malanga rarara bo nee aga manjarumaka mbara-mbara ri dunia anu sakide-sakide malipo. Ira kana manjarumaka Alatala anu nompopelabi-labi ka kita mpengaya-ngaya anu niparaluuta rapodamba-dambata.

¹⁸ Popatoramo tona nakalumana, mokainggu mabelo ala pokainggura nabelo haitu majadi kakalumanara. Ira kana majoi rara bo masadia mombatulungi tona ntanina.

¹⁹ Ane ira mokainggu ivesia, namala raulita ira nompasiromu kakalumana ri suruga, anu mamala rasarumakara ri tempo makava, bo rakavara katuvu nabelo sampe ri kasae-saena.

²⁰ Timotius, jagaimo pakabelo-belo pepatuduki nakana anu niparasaya nu Alatala ka iko ala ledo rabaliki ntona. Nee mompariara tesa ledo ria gunana bo ledo manggeni kita mangoseaka dota nu Alatala, bo tesa-tesa anu nosisala nte pepatuduki nakana. Tesa-tesa haitu niuli ntona "pangisani", tano ledo nakana.

²¹ Naria tona nangoseaka tesa haitu sampe nasalandalamo, bo domo nangoseaka pepatuduki nakana. Kuperapi Tupu mombadekei belo ka komiu pura-pura. Amin. Tabe lako ri nte yaku, Paulus

1 Timotius

Video 1 Timotius 6

Ikuti Kami:

KONTAK | PARTISIPASI | DONASI