Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jelma-jelma Kristen sai jelma sai ngebantu, harus nganggap bahwa tuan tian patut dihormati, in ulun mak dapok ngeburakko gelar-Ni Allah atau ajaran ram.

² Jelma-jelma sai ngebantu tuanni jelma Kristen, mak ngasi ngeremehko tuanni mani tian jejama ulun Kristen. Malah tian seharusni lebih betik lagi ngelayani tuan tian ano, mani tuan sai betik dilayani ano iado jejama jelma percaya sai dikasihi. Sunyinni inji harusdo niku ajarko rik keni petuah.

³ Sapa gaoh sai ngajarko ajaran sai bareh jak seno rik mak setuju jama ajaran sai mak benor jak Tuhan ram Isa Almasih, rik jama ajaran agama ram,

⁴ iado jelma sai mepungah rik mak pandai api-api! Penyakikni iado gering bedebat rik betangkar tentang istilah-istilah sehingga nimbulko sesera, perpecohan, fitnahan, curiga sai mak betik,

⁵ rik perselisihan sai mak bela-belani. Pikeran jelma-jelma ano radu buntu rik mak lagi benor. Tian nyangko dapok jadi mebatin jak agama.

⁶ Sangun agama ngeniko untung sai balak, kik ulun puas jama api sai dikedauni.

⁷ Mani mak ngedok sai hal pun sai ram usung mik delom dunia inji, rik mak ngedok sai hal pun juga sai dapok ram usung mik luah.

⁸ Jadi, kik wat kanikan rik kawai, udi radu cukup.

⁹ Kidang jelma sai haga jadi mebatin, teguda rik terjerat ulih sunyin macam sai bugu rik sai nyadang. Kemirakan-kemirakan udi yakni jelma jadi hancor rik celaka.

¹⁰ Mani jak cinta jama duit, timbul sunyin kejahatan. Wat sebagian jelma sai ngebedak duit sehingga radu mak nutuk lagi ajaran Kristen, raduni tian ngalami lamon penderitaan sai ngehancorko hati tian.

¹¹ Kidang nikudo jelma kedau-Ni Allah, jadi niku harus ngejaohi sunyinni ano. Berusahado jadi jelma sai benor di mata-Ni Allah, sai ngabdi jama Allah, percaya jama Almasih, mengasihi peperda tian, tabah delom penderitaan rik besikap lemoh lembut.

¹² Bejuangdo temon-temon untuk hurik sebagai jelma Kristen in niku ngerebut hadiah hurik sejati rik kekal. Mani untuk senodo Allah ngurau niku waktu niku ngakui di hadap lamon jelma bahwa niku percaya jama Almasih.

¹³ Rik tano, di hadap-Ni Allah sai ngeniko nyawa jama sunyin hal, rik di hadap-Ni Isa Almasih sai ngeni kesaksian sai benor jama Pontius Pilatus, nyak ngilu inji jama niku:

¹⁴ Taatido sunyin perintah ano secara murni rik tanpa cela sampai pada rani Tuhan ram Isa Almasih ratong luot.

¹⁵ Ratong-Ni haga ditantuko waktu sai tepat ulih-Ni Allah tenggalan. Iado Jelma Sai Nguasai satu-satuni; Ia agung, Raja sunyinni raja, rik Tuhan sunyinni majikan.

¹⁶ Iado gaoh sai mak dapok dikuasai ulihni kematian; Ia hurik di delom cahaya sai mak dapok diredik ulihni sapa pun juga. Mak sai jelma pun pernah ngeliak-Ni, atau dapok ngeliak-Ni. Bagi Iado hormat rik kuasa untuk selama-lamani! Amin.

¹⁷ Jama jelma-jelma sai mebatin di dunia inji hagani niku ngilu in tian dang mepungah rik dang ngeharap jama barang-barang sai mak tetap -- injuk halni jama kebatinan. Tian harus beharap jama Allah sai ngeniko sunyin sai hal belimpah jama ram in ram ngerasakoni.

¹⁸ Ngiludo jama tian untuk nunjukko kebetikan, untuk lamon ngelakuko hal-hal sai betik, murah hati, rik risok ngeni.

¹⁹ Jama injuk reno tian ngumpulko harta sai jadi modal sai betik untuk waktu sai haga ratong. Rik renodo tian haga mansa hurik kekal, yakdo hurik sai sejati.

²⁰ Api sai radu dipercayako jama niku, jagado ano betik-betik, Timotius! Jaohko kicik-kicikan sai mak beguna rik perdebatan-perdebatan tentang hal-hal sai secara keliru disebut "Pengetahuan".

²¹ Mani wat jelma-jelma sai ngucakko bahwa tian ngedok pengetahuan ano, sehingga nyeleweng jak ajaran Kristen sai percaya tumbai. Semoga Tuhan ngeberkati Puari-puari. Hormat sekam, Paulus

1 Timotius

Video 1 Timotius 6

Ikuti Kami:

KONTAK | PARTISIPASI | DONASI