Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kare oloh Kristen je manjadi jipen, keleh maanggap oloh je manjadi tempon ewen te patut ihormat, uka oloh dia tau mamapa aran Hatalla atawa auh ajar ain itah.
2 Kare jipen je manempo oloh je Kristen, dia tau manaha gampang tempoe, awi ewen sama-sama oloh Kristen. Malahan ewen musti manyang tempoe te labih bahalap hindai, basa tempoe je ilayan hong kahalap te sama-sama oloh percaya je inyinta. Taloh handiai toh keleh iajar tuntang inasehat awim.
3 Ewe-eweh je majar auh je beken bara jete tuntang dia hasaroroi dengan ajar je bujur bara Tuhan itah Yesus Kristus, tuntang dengan auh ajar agaman itah,
4 oloh te bajoho tuntang dia katawan taloh en-en! Panyakit ayue iete rajin hasoal tuntang kalahi-kajama tahiu kare bawak kotak sampai mampalembut kahirin atei, kapusit, auh mangarana, kameles je dia bahalap,
5 tuntang kalahi je jaton katawan tikase. Jalan tirok kare oloh te jari patep tuntang dia bujur hindai. Ewen manyangka ewen tau mandino panatau bara gawin agama.
6 Agama puna manenga katuah je hai, amon oloh ombet huange dengan taloh je aton intu ie.
7 Basa ije mahin jaton taloh je tau itah mimbite akan kalunen toh, tuntang ije mahin jaton kea taloh je tau itah mimbite balua!
8 Jadi, amon aton panginan tuntang pakaian, jete jari sukup.
9 Tapi oloh je mipen manjadi tatau, ie inggoda tuntang injarat awi sepsimpan kare kipen kahumong tuntang taloh je marusak. Kare kipen mawi oloh manjadi hancor tuntang calaka.
10 Basa awi sinta dengan duit, lembut kakare taloh papa. Aton oloh belahe je manggoang duit sampai dia tinai manumon auh ajar ain oloh Kristen, palus ewen are buah kapehe je mampahancor atei ewen.
11 Tapi ikau toh oloh ain Hatalla, jadi ikau musti mangejau arepm bara kakare taloh te. Keleh manggau jalan mangat manjadi oloh je bujur hong matan Hatalla, je manempo Hatalla, percaya dengan Kristus, sinta dengan sama arepe, tahan huang kajake, tuntang belom balemo-lowah ampin dasare.
12 Keleh bausaha toto-toto uka belom kilau oloh Kristen mangat ikau mandino panengan pambelom je bujur tuntang katatahie. Basa akan jete Hatalla mantehau ikau katika ikau mangaku intu taharep oloh are je ikau percaya dengan Kristus.
13 Tuntang toh, intu taharep Hatalla je manenga hambaruan akan kakare taloh handiai, tuntang intu taharep Kristus Yesus je manenga kasaksian je bujur akan Pontius Pilatus, aku balaku jetoh dengam:
14 Keleh mamenda kakare parentah te hapan katinduh tuntang jaton kasalae sampai hong andau Tuhan itah Yesus Kristus dumah haluli.
15 Panumah Ayue kareh inantu hong katika je buah awi Hatalla kabuat. Baya Ie kabuat ih je mimbing kuasa; Ie hai, Rajan kare raja, tuntang Tuhan kare tuan.
16 Tikas Ie ih je dia olih inguasa awi pampatei; Ie belom hong kalawa je dia olih inokep awi eweh bawei. Ije biti mahin jaton oloh je puji mite Ie, atawa olih mite Ie. Akae hormat tuntang kuasa sampai katatahie! Amen.
17 Akan kare oloh je tatau hong kalunen toh, keleh ikau balaku uka ewen ela balecak tuntang ela maharap dengan kare ramo je dia bunggut -- kilau dengan panatau. Ewen musti harap dengan Hatalla je manenga taloh handiai akan itah dengan hakutoh karee uka itah mangkeme kamangate.
18 Keleh balaku dengan ewen uka mamparahan gawi bahalap, uka are malalus kare hal je bahalap, bajenta tuntang rajin manenga.
19 Awi kalote ewen mamumpong ramo je manjadi modal je bahalap akan wayah je rahian. Tuntang hapan jete ewen akan mandino pambelom je katatahie, iete pambelom je bujur.
20 Taloh je jari imercayaku akam, haga jete bua-buah, Timoteus! Keleh mahakan bara kare kotak je dia baguna tuntang kare soal-jawab tahiu kare taloh je salaya oloh manyewute, koae, "Pangatawan".
21 Basa aton kare oloh je mansanan ewen mingkes pangatawan te, sampai mahiwang bara kare ajar ain oloh Kristen je imercaya ewen solake bihin. Keleh Tuhan mamberkat Pahari samandiai. Hormat ikei, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA