Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia to kaunan matappa'mo lako Puang Isa nang la sipato' nakasiri' melo to puangna, nadanggi' nadipau gaja' to Puang Allataala ba'tu pangngajaran kasaranian.

² Ia to kaunan matappa' na tomatappa' toda to puangna, danggi' nasangai kumua ia to puangna te'da naparallu nakasiri' nasaba' pada tomatappa'i. Sibalikanna la la'bi napemelori to pangjamanna lako, nasaba' ia joo puangna napangjaman pada tomatappa'i na pada dipakamoja' tooi. La mupangpangngajaran ngasan tee, mupake tooi mpangngingaran tau.

³ Ia to tompangpangngajaran pangngajaran laen na ia to mangka kubenko, te'da naturu'i to pangngajaran tongan jio mai Puangta' Puang Isa Almaseh na pangngajaran agamanta'.

⁴ Iamo tomatampo na te'da apa naissen. Madoang bangri la massite'geh sola massita'go anna mpaden kamasereatian, kasisalan, mpau gaja' tau, ngkabatai bang tau,

⁵ massisala tarruh te'da cappa'na. Gaja' tarruhmi sipa'na tuu lako tau na te'damo naissenni to pangngajaran tongan. Nasangai kumua, la buda dalle'na, ke mangngagamai.

⁶ Sitonganna buda barakka'na to tonturu'i pangngajaran agamanta', ke napusannangngi to apa naampui.

⁷ Denraka apa tabawa mentama tee lino? Te'da! Nadenraka apa wa'ding tabawa ssalaii tee lino? Te'da!

⁸ Iamo joo ganna'mo ke nnampuiko pakean sola kande.

⁹ Ia to tomadoang sugih, la madoi' mpugauk mangrupa-rupa panggaukan gaja', sanga nataloii kamadoangan gaja'na, susi to naala poja. Tangmakkeguna joo pattujunna kannori mpa'dikkii, na iamo la mbawai lako kamasolangan.

¹⁰ Nasaba' kamacinnan lako doi' mpaden mangrupa-rupa kagajatan. Den to tau mentangmatappa' pole'mo lako Puang Isa Almaseh, nasaba' male bangngi nnangah doi', apa undinna melliwa' pa'dik penawari.

¹¹ Ee, Timotius! Danggi' mupugaukki tuu lako, sanga taun-Namoko Puang Allataala. Apa la mpugaukroko pakkaeloran-Na Puang Allataala, massompa lako kale-Na, matappa' lako Puang Isa Almaseh, mpakamoja' padammu rupa tau, sabbara' lan kamaparrisan na mpangkadai rampa' tau.

¹² Moi nabuda ewalimmu, apa la tatta'ko matappa', ammutarima paraseng katuoan melo te'da cappa'na. Iamo joo napileimoko Puang Allataala, tommumangngaku jio olona tobuda kumua matappa'moko lako Puang Isa Almaseh.

¹³ La nakita Puang Allataala, to mpatuo sakka' saianna, na Puang Isa Almaseh to mangka mpangben kasa'bian tongan lako Gubernur Pontius Pilatus, kumeta'da tongan lako iko, ammuturu' meloi sininna to kupauanko, mupugauk ngasanni ratu lako karatuan-Na pole' Puangta' Puang Isa Almaseh.

¹⁴ (6:13)

¹⁵ Ia to karatuan-Na pole', Puang Allataala Ia la mpattantui. Iamo tomangkada mesa, to mala'bih. Rajana sininna raja na Puangna sininna puang.

¹⁶ Ia manda to te'da nataloii kamatean. Moi mesa' tau te'da ssarai ngkandoppi'i to arrang nanii torro. Moi mesa' tau te'da ngkitai, nang la te'da tau ngkitai. Iamo tomakuasa dipakala'bih te'da cappa'na. Amin.

¹⁷ La mupangngingaran to tosugih lan tee lino, danggi' namabangka', danggi' napattuan kalena lako kasugiranna to la cappu', apa la mangpattuan lakori Puang Allataala to la mbenki' sininna taparalluinna antapakei masannang.

¹⁸ Kuanni na mpugauk kameloan lako padanna rupa tau, mamase na malaboh.

¹⁹ Na ianna susimo joo, padai to torrempunmi kasugiran makkeguna jio ahera', nalantarima katuoan melo te'da cappa'na.

²⁰ Ee, Timotius! La mujagai melo to pangngajaran napabarakkananko Puang Allataala. Danggi' mumatean wattu lako curita tangkebattuanna to tangkasiri' Puang Allataala, mupasalai tooi penawa to kasite'geran te'da bua'na, to nasanga tau kamaccan apa sitonganna tangngia.

²¹ Den tau ssanga kalena nnampuii joo kamaccan, anna te'damo nakatappa'i pangngajaran kasaranian to nakatappa'imo jolona. Dennaa upa' nabarakka'i kamu' Puang Allataala sola ngasan. Padamo jolo' too. Sallangki' mati', Paulus.

1 Timotius

Video 1 Timotius 6

Ikuti Kami:

KONTAK | PARTISIPASI | DONASI