Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rohkẹ̌ u Ruata mạul᷊ị masahẹ, u su tempo mahi kaděntane, sarung piạ u měmpẹ̌sohọ bọu pangangimang si Kristus. I sire sarung měmpẹ̌těngkatakidẹ̌ su rohkẹ̌ makapal᷊idẹ̌ dingangu tụtol᷊e manga těntiron setang,
2 ilẹ̌habaru taumata tahapẹ̌konti mělle. Dal᷊ungu naung i sire e seng marěndung.
3 I sire mạněntiro taumata kumbahang mẹ̌kawing dingangu kumbahang kumaěng kaěng pinẹ̌pělli. Sěmbal᷊iau kaěng ene kawe niriadin Duata e ipakipěpẹ̌pakẹ piạ tatarimakasẹ e si sire apan seng němpangimang dingangu něngkasingkạ u katěngadẹ̌ e kahěngang.
4 Patikụ apan niriadin Duata e ene kai mapia, kụ tawẹ u sarang sěmbaụ kụ hinong ikadiri kamagengben seng nitarimạu ringangkewen tatarimakasẹ su Mawu Ruata.
5 Batụu kai al᷊amat'u Ruata e ringangu kakal᷊iomanenge makạdiading kaěng ene ipakạsusi.
6 Kereu i kau maněntiro kěbị ene su manga anạ u sěmbaụ mạngimang ute i kau sarung makoạ mẹ̌tatangkiang si Kristus Yesus kụ měmẹ̌munara mapia. Dingangu i kau sarung mapakatawang pěndangu naungu kahiạen hengetangu Mawu Ruata e ipạngimangeng i kitẹ e ringangkewe lai manga těntirong katěngadẹ̌ seng tẹ̌tol᷊eěngu sěngapan děngụe.
7 Pẹ̌teghangkong kal᷊awọu wěken tahayulẹ̌ tawẹ kěhase. Pẹ̌těngkawihingko watangengu su pẹ̌bawiahu pangangagama.
8 Watụ u pěmamiasang badange apawe kadidị gunane; arawe pěmamiasang marohkẹ̌ e ute kawe mambeng mẹ̌baraguna su kěbị hal᷊ẹ̌, batụu kai kạl᷊aunidẹ̌ pẹ̌kakakědon pẹ̌bawiahu orasẹ̌ ini e ringangu tempo ramahi sarung.
9 Kai hal᷊ẹ̌ ini těngadẹ̌ dingangu hinong itarimạ dingangu pangimangengu kạguwạu naung.
10 Hakịu ene i kitẹ e mẹ̌bẹ̌bangkuadẹ̌ dingangu mětẹ̌těngkasaghedẹ̌, batụu i kitẹ e mělẹ̌harapẹ̌be ringangu kạguwạu naung su Mawu Ruata wiahẹ̌, i Sie kai Měngẹ̌ngambang patikụ taumata, nangělembo katewe su taumata apan měmpạngimang.
11 Těntiroko kěbị ene ringangu oroko taumata pahuntol᷊e.
12 Kumbahangbe piạ u ta měndekeng i kau watụ u i kau kawe wědang umbaseng. Su sěmběkane, kakoạko pẹ̌tatatěnoěng baugu taumata mangimang su ral᷊ungu waweranu ringangu kakanoạu, su kakakoạ i kau kuměndagu sěndinganengu ringangu mangimang su Mawu Yesus Kristus, ringangu kasasusin pẹ̌bawiahu e.
13 Těntal᷊ang ene, sarangbe iạ marěnta ute, i kau harusẹ̌be pěnggisingko mẹ̌basa Winohẹ Susi ipakiraringihẹ̌ su taumata, pěmahansang dingangu pěněntiro si sire.
14 Kumbahangbe i kau mẹ̌bul᷊en tatal᷊ěntụ u Rohkẹ̌ u Ruata kụ seng nionggọ si kau su tempon matatimadu jamaatẹ̌ e němpanělidu liman sire su těmbọu e, ringangu manga nabi němpěluntingihu hengetangu Mawu Ruata e mạanun batangengu.
15 Kẹ̌koạ bue kěbị tamai ene ringangu kaguwạu naung tadeạu sasombọu mal᷊ahẹ su patikụ taumata.
16 Pakal᷊ukare wue watangengu e ringangu tẹ̌tahimataiwe lai tatěntironu. Kěnangko pakasatia i kau mẹ̌koạ kěbị tamai ene watụ u ene ute i kau sarung makaambang kurai watangengu, kurai lai manga taumata apan dụdaringihẹ̌ si kau e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA