Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Roho i Allah muna bidon noguman nana'a: Kon singgai mita inta mo'iduduimai, oyuíon intau im mobaḷuidon im pirisaya monia ko'i Kristus. Mosia dumuduidon kon dimukud mita inta tongaí mopororigamai bo poḷat doman dumudui kon totunduí mita in dimukud mora'at tatua.
2 Totunduí mita tatua inta pinota'au i intau mita inta mongo munapik bo mongo'uboḷ. Gina intau mita tatua ain nosindip.
3 Mosia motunduí kon intau baí diaí mobuḷoi bo diaí doman moka'an kong ka'anon inta ain sinantuí monia. Padahaḷ ka'anon tatua pinomia i Allah sing ka'anon takin mosukur ko'i-Nia in intau mita inta ain nopirisaya ko'i Kristus bo inta ain nonota'au kon totunduí inta mobanar nongkon i Allah.
4 Bayongan inta pinomia i Allah tua im mopiabií, bo diaíbií tobatuímai im mota'au anggapon haram aka tua komintan tarima'an naton takin mopoyaput in sukur ko'i Allah.
5 Sing ka'anon mita tatua aim bidon binarakatan-Nya bo sinambayangan domandon naton.
6 Aka tunduíonmu intua komintan kom bayongan ginaḷum naton, yo ikow im mobalií bidon mogogaid i Kristus inta nogaid nopira. Bo ikow umurandon moginropot kon ginamu takin pirman i Allah inta pinirisaya naton bo takin totunduí mita totu'u inta ain dinuduianmumai na'a ing kino o'onggotea.
7 Dikadon mopirisaya kon o'uman mita inta tongaí pomia-mia'an in intau bo inta diaí im mangalenya. Ta'e tantudon poḷatih mo'ibadah ko'i Allah.
8 Latihan in awak na'a tongaíbií topilik im baragunanya, ta'e aka molatih mo'ibadah yo mo'ibaragunabií kom bayongan yagi-yagi, si oyuíon in dandi kong kobiagan tana'a makow bo kobiagan kon singgai mo'iduduimai.
9 Totu'ubií in singog tana'a bo patusbií tarima'an poḷat pirisaya'an.
10 Manangka intua kita musti moramiji mogaid, sing kita in tongaíbií moharap makow ko'i Allah inta nobiag; Sia tuata inta mopoposaḷamat kom bayongan intau, muna-munamai mosia inta mopirisaya.
11 Tunduídon intua komintan, bo tongganutaidon in intau mita simbaí mo'ibogdon dumudui.
12 Mokopo'ingat simbaí diaí tobatuímai intau im mopandang enteng ko'inimu lantaran nogu'odpa ikow. Ta'e poramijidon simbaí ikow umuran mobalií dodayanan bo doduduyanmai kon soaáḷ inta mopia i intau mita inta mopirisaya, pinangkoi kom pososingog, oaíid bo kon soaáḷ kototabimu kon tumpaḷa intau bo kopopirisayamu ko'i Kristus Yesus takin kobobiagmu inta motompia.
13 Samantara aku'oi diaípa mo'iangoi, daí mokoporajingdon im mobaca kom buk mita mosuci simbaí mota'au ikow mononggina bo motunduí kom bayongan intau inta mopirisaya.
14 Dika angoian maḷat ikow mopomakeí in totabi inta aim pinonotabi i Tuhan ko'inimu wakutu in ikow binarakatan i itoi mita in jama'at. Umuran torop ing koyow i Allah inta pinoguman in nabi mita soaáḷ ikow.
15 Tarukira intua komintan bo totu-totu'u aidan intua simbaí ko'ontongandon intau ing komajuan oaíidanmu.
16 ḷukadai in awakmu bo ḷukadai doman onu inta ain sinunduímu. Musti ikow mokopotoindudui kon tua komintan, sin aka tantuímu aidan intua komintan, yo mangalenya kon tua ikow moposaḷamat bidon in awakmu bo moposaḷamat doman kon intau mita inta mo'ibog mokidongog ko'inimu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA