Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali monso pu’u gombo to aku damanganto’o si’i. Etu semo, tau to langkai to rani mawali ketua ntau to mangaya, tau etu naporani palaong to matao.
2 Wali ketua ntau to mangaya, ia taa maya re’e lengkonya to masipato naseko nsa’e. Ia samba’aja rongonya, pasi ia mangajagai koronya ngkalio. Ia tau to masilonga pampobuukanya, pasi ia mangika lengko to masipato na’angga nsa’e. Tau to etu masanang mampalinggona tau to rata pasi ia seja pande mampotunde sa’e.
3 Ia si’a to panginu, bara to batingka, pasi ia taa makasar. Ia si’a tau to mangaliwu rani masibanta, pasi ia si’a tau to ojo rani doi.
4 Tau to rani mawali ketua ntau to mangaya ia seja taa maya taa matao raika mampasilonga tau to maroo ri banuanya, pei mampotundeka ananya see sira sangkani mampalaika pasi manga’angga ia.
5 Apa ane tau to taa nansani mampasilonga tau to maroo ri banuanya, tau etu taa seja nansani mampasilonga tau to mangaya i Pue Allah.
6 Wali tau to rani mawali ketua etu ia taa maya ane ia tawa masae pangayanya. Apa ane tau to owo mangaya pei mawali ketua, tau etu bara mawali mangei ewa i Kepala Measa tempo owi. Wali tau etu danahuku i mPue Allah.
7 Pasi re’e seja mangkonong tau to rani mawali ketua. Tau etu taa maya ane si’a tau to matao lengkonya ane ri pangkita ntau to taa mangaya. Apa ane si’a ewa see ia bara danato’o maja’a ntau pasi dakono akal i maja’a.
8 Wali ewa see seja tau to mawali diaken. Sira tau to mangika lengko to masipato na’angga nsa’e, sira si’a tau to mawuti, si’a to panginu, pasi si’a seja tau to ojo rani sugi.
9 Sira mangkongko anu to napaponsanika i mPue Allah mangkonong pangayanya, pasi raya nsira taa mangepe sala ri tango i mPue Allah.
10 Wali tau to damawali diaken, sira daraparesa ruyu panewa ane tare lengko nsira to masipato raseko, sira maya mawali diaken.
11 Wali ewa see seja rongo ntau to mawali diaken. Sira seja tau to masipato na’angga nsa’e, pasi si’a tau to bawiwi. Pei sira mangajagai koronya ngkalio pasi sira nempo kesaa palaong to nikanya, sira maya rasarumakaka.
12 Wali to langkai to mawali diaken, ia samba’aja seja rongonya pasi ia seja taa maya taa matao naika mampasilonga ananya pasi samparia tau to re’e maroo ri banuanya.
13 Wali tau to madota mangika palaong ndiaken, sira damangarata pangka to bae. Pasi sira damangarata seja pansawang see taa kojo meka rayanya magombo resi sa’e mangkonong pangaya nsira resi i Kerisitu Yesu.
14 O Timotius, pamporaningku aku tamo masae dayau resi korom, pei aku mangantulisika korom paposia si’i
15 see ane re’e to mangantalas aku, korom nunsani yami ewa wimba lengko ngkatuwu to masipato napolengkoka ntau to Pa’anya i Pue Allah. Wali kita to mangaya, kita semo tau i mPue Allah anu to tuwu. Pasi kita semo to mampotundeka pasi mampoewaka anu to monso mangkonong i Pue Allah ewa nika ntinja pasi tundasi mangkongko pasi mampakaroso banua.
16 Wali monso pu’u bae kojo batuanginya anu to napaponsanika i mPue Allah mangkonong pangaya ngkita. Etu semo, I Pue Allah nama’i mawali tau, Pasi i Nosa Mapasing mampakanasa Ia tare dosa. Ia nakita mpomakauNya yako ndate saruga, Pasi kareba mangkonong Ia rapakarebaka resi tau samparia bansa. Pasi tau sambawo lino re’e to mangaya Ia. Pasi Ia tiokotaka nto’u saruga ri raya ngkayawaNya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA