Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mule kenaq ucapan niki, "Dengan saq melẽt jari pengawas jemaah, setetune ie melẽtang sopoq pegawẽan saq solah."

² Keranaq nike pengawas jemaah harus dengan saq ndẽq bedowẽ cacat cele, semame lẽman sopoq senine, tao nahen diriqne, bijaksane, bedowẽ tate kerame; demen bẽng dengan nyodoq lẽq balẽne, dait ceket ngajah dengan;

³ ndaq dengan saq girang bowos, atao girang sili. Sebalikne, ie harus gerasaq, demen bedamẽ dait ndẽqne tejariang panjak siq kẽpẽng.

⁴ Ie harus tao ngatur keluargene secare solah, dait didik bije-bijene jari taat dait hormat lẽq ie.

⁵ Sẽngaq lamun dengan ndẽq tao ngurus keluargene mẽsaq, berembẽ ie bau ngurus jemaah Allah?

⁶ Pengawas jemaah ndẽqne kanggo dengan saq baruq betobat, sẽngaq laun ie jari sombong dait kene hukuman Belis.

⁷ Ie harus dengan saq solah aranne lẽq masyarakat; sẽngaq lamun ndẽqne maraq nike, ie gen tehine siq dengan, sehingge ie geriq ojok dalem siasat Belis.

⁸ Pelayan jemaah ẽndah, harus dengan saq solah dait tulus; ndẽq kanggo dengan saq girang bowos siq anggur atao dengan saq mentingang kẽpẽng.

⁹ Ie pade harus taat lẽq rahasie iman saq sampun tenyatayang siq Allah, dait selapuqne nike harus telaksaneang siq angen saq tulus.

¹⁰ Ie pade harus teuji bejulu, dait lamun ternyate ie mule ndẽq bedowẽ cacat cele, baruq ie bau jari pelayan lẽq dalem jemaah.

¹¹ Senine ie pade harus ẽndah dengan saq solah, ndẽqne dengan saq girang pitnah dengan. Ie pade harus tao nahen diriqne dait jujur lẽq dalem selapuq hal.

¹² Pelayan jemaah harus bedowẽ cume sopoq senine. Ie harus tao ngurus bije-bijene dait keluargene.

¹³ Dengan-dengan saq solah entane jari pelayan lẽq dalem jemaah, gen tehormatin dait jari sayan bani ngeraos mengenai iman ie pade tipaq Almasih.

¹⁴ Tiang beharep gen bau jangoq side lẽq waktu saq ndẽq ngonẽq malik. Timaq maraq nike, tiang tulis surat niki tipaq side,

¹⁵ adẽq lamun tiang telat dateng, side sampun nenaoq berembẽ ite harus idup sebagẽ keluarge Allah, nike jemaah Allah saq idup. Jemaah niki saq jari pilar dait dasar kebenaran.

¹⁶ Ndẽq araq sopoq dengan juaq saq tao nilas, berembẽ belẽqne rahasie ibadahte: Ie saq sampun nyatayang diriq-Ne lẽq dalem wujut manusie, dait tenyatayang kenaq siq Roh Allah, dait tesaksiang siq pare malaẽkat. Beritene teumumang lẽq antare bangse-bangse saq ndẽq kenal Allah, dait Ie tepercaye lẽq dalem dunie dait teangkat ojok dalem kemuliean.

1 Timotius

Video 1 Timotius 3

Ikuti Kami:

KONTAK | PARTISIPASI | DONASI