Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Gareg en ouwan naugb en edag mougt naugb goucimdeb, kaba, gini dag en ouci areg mera eisaugb naugb enohob. Aremeijouhw gini misen namcir.
2 Dangga gareg en ouwan naugb yen yeigdoumesa en dag mougt, kaba, Allah en ouwan naugb lusud lemehin meriresa en icira aremer hom touwero. Doba men geicara augwan ecabeci namcir. Dara en eic mesuwa toua hom dous. Dara en medoc ouforoho se aremer augwan namcir. Hanoba en esedougwo enin medoc mes dougwo sug en aimo areg gecgu augwan. Dara en medoc edag beim an lusud laugwan toua teitei. Dara en ebin len gus. Dara en mou ouforoho naugb en edidib meijouhw augwan asesa dou lusud.
3 Hang en medoc gororougb ahwei mohu. Dara en mer emeised lusud naugb en emogod len gus dedemeda touwero. Doba Allah ouwan dag en medoc arjaga namcir naugb en oho geigouhw se lusud merdoc mes terimda. Dara en medoc emetrij icira aregoufu dara aremougb naugb en emenara ucucugb dou lusud touwero. Doba en enara dara medoc arjaga namcir.
4 Dangga toua, Allah en ouwan naugb en edag mougt naugb en ens ucina geigouhw dou leng leigtou desij en se men tu. Dara en omnomna dou en mehir naugb len lowun lenin merdoc mes arjaga deseino en. Hanoba len leigdoumesa en moho toua terimda.
5 Anai sug sud hom en mou emouforoho naugb en esedougwo lusud se men tu dara geigouhwero, kaba, dagiro, naugwe hang, en esedougwo Allah men lusud dara geigouhwa? Naro.
6 Dara Allah emouwan naugb sug yen yemeigdoumesa sud hom Krisden menau dag gembala touwero. Doba yen yeigdoumesa sud hom gedag lusud mos dous. Anai sug yen yeigdoumesa sud hom Krisden menau edag mougt, kaba, cum, en agahugouhw beimiman enin an gin namcir. Dangga en esma gogom, aninim dag gogom areg Bilis esma sug nosa touohob.
7 Dangga toua, Allah en ouwan sud hom gedag mougt naugb yen, kaba, dag eni sud hom areg leng medigo Yesus leigdoumesa en moho an men geicara gedag beim sug nosa touohob. Anai sug yen yeigdoumesa sud hom areg men geicara gecguohob, kaba, cum, lusud lesbes an en. Hanoba en obsara se Bilis men digorobei ucugb toua.
8 Dangga toua, sug yen yeigdoumesa sud hom dag pembela, kaba, yen yemeigdoumesa sud hom gedig en metemouwu maraida. Dara en medoc gororougb ahwei mohu dara en medoc etrij icira aremougb touwero. Doba yen yeigdoumesa sud hom gedig lusud leigdoumesa en moho an aremer augwanohob, dag pembela dous. Anai gareg en medoc etrij icira naugb en agungun lusud an meren aremougb, kaba, men geicara gini eic dag lusud igdebeseba len an namcir.
9 Dara yen yemeigdoumesa sud hom gedig en eija mouwesa areg Allah ens dou maman eisaugb Krisdus gin touwero. Doba yen yeigdoumesa sud hom gedig en esetoto se mer gin namcirohob dous. Anai sug nosa, kaba, Allah emens dau areg eisaugb Krisdus dou sud hom ingma touebma. Doba en ecgoneh augwan dau len terimda. Doba iteitogin, kaba, en ens augwan gini ainyes dou mamanohob.
10 Dara sud hom areg yen yeigdoumesa en dag pembela, kaba, en mesouwa toua hom dous. Hanoba en esedougwo en mehir dara men sogougwir laugwan dara geigouhw toua. Dara yen, kaba, yen yemeigdoumesa en namcirlobma. Doba yen yehigdecin en mairesebahabi. Dauntoba sug yen yeiya, doba men geicara edeinyum naugb augwanohob, kaba, yen yeigdoumesa en dag pembela misen deit toua. Anai sug pembela aimo men ucina gin dareg gedag beim an lusud namcir, kaba, eic dag len leigdoumesa en moho an gini terimda. Hang eic geic mos dou en naugb en os badi Krisdus Yesus en moho se goubesa dou len toua. Dangga toua, sug yen yeigdoumesa ligida dag pembela, kaba, Allah en emouwan naugb yen yemeigdoumesa ligida gedig len loc desan aremer touwero. Doba en ouwan naugb yen yeigdoumesa ligida gedig lusud leigdoumesa len meroho an aremer augwanohob dag pembela dous. Hanoba yen youci ligida gedig len lebehnehino lenin merdoc mes dougwo areg gecgu augwan. Dara len lemesediara touwero. Doba meren geicara augwan edag beim an lusud terimda toua.
11 (3:10)
12 (3:10)
13 (3:10)
14 Dan desedeb naugb dan dedeiya ban sungga. Dauntoba dan dens dau gin augwan ai dan indirs dou ban touahabi. Dobnaro, kaba, dan dog dau augwan gini se surad gin dou ban. Dauntoba ban becinaga dau maman geicara areg Allah esedeb naugb men lusud maman men meijouhw augwan asesa toua.
15 Anai maman mainesa Allah gedig en maireseb huhugb men uro mesohob. Hang en emogugwo en mer geica gini se maman mamsira toua. Dauntoba maman madeijan en mer misen gini. Dara maman masedougwo deigouhw dougwo areg gecgu toua.
16 Dangga areg Allah en ens dau Krisdus dou mamanohob, kaba, sud hom ingma dau maman, kaba, en emaideido dougwo gin touwero. Doba maman maugwan mauma debin dag en mer gin, kaba, moho agas namcir. Anai enin eng ouwaden dau bogo naugb en edag lusud misen. Dara sug Mena Gogoufu eigdoumesa en dau gomom ucugwohob, kaba, gini dag en ouma debin Krisdus dag en emereiyara dou maman mougwa hom touwero. Doba en edag Allah Meisi mohora hom dag misen namcirohob. Dara malaikad len toua, merugwengga desij en naugb len leiya dau men geicara augwan gin toua. Hang Mer Geigouhw eisaugb en, kaba, agaha becinten lugmahara len laugwan naugb len merdoc ebdebin an en toua. Anai maman macinaga dag Allah eigdoumesa en ucugb dig bogo aud en. Dauntoba en edag mougt mera medam naugb augwan namcir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA