Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Těngadẹ̌ bue wawera ini, "I sai mělawị pangkatẹ̌ těmbonangu jamaatẹ̌, ute i sie mẹ̌měnningu munara mawantugẹ̌."
2 Sěngkatau těmbonangu jamaatẹ̌ harusẹ̌be sěngkatau tawe kasasěngkul᷊ang, kawingu wawine sěngkatau, makẹ̌dang, matahuěnna, ringangu maatorẹ̌, mahimumu dangenang u sake su wal᷊ene, ringangu pelesa maněntiro, bal᷊inewe tahawukaneng,
3 arau tahapěndariha, kaiso tuhụ hinone i sie kai harusẹ̌ taumata naunge maal᷊usẹ̌ dingangu puluang mẹ̌gaghighilẹ̌. Tawe wotonge maanggang su roitẹ̌.
4 I sie pelesa měngatorẹ̌ dal᷊ohon bal᷊ene, mamihing manga anạ e tadeạu matuhụ dingangu maadatẹ̌ si sie.
5 U kamageng tawe makaatorẹ̌ dal᷊ohon bal᷊ene sẹ̌sane, kụ kai kereapa i sie mangatorẹ̌ jamaat'u Mawu e?
6 Těmbonangu jamaatẹ̌ tawe wotonge taumata wuhu nasahani, watụ u mạdiring i sie mẹ̌těngkaobotẹ̌, mase manawo su hukumang kere setang nạung kal᷊imona.
7 I sie kai harusẹ̌be mapia arenge su kawanua; kai kamageng bal᷊inewe kerene, nal᷊ahẹu i sie kai tahumeangu taumata, dingangu maikị u sedẹ u setang.
8 Tumatimbangu hal᷊ẹ̌ u jamaatẹ̌ e harusẹ̌be lai sěngkatau mapia ringangu matul᷊idẹ̌, bal᷊inewe tahainung dingangu maanggang su roitẹ̌.
9 I sire harusẹ̌be měngumpaedẹ̌ masěgadẹ̌ dingangu naung burẹ̌si su těntirom pěngangimangu tau sahani e kụ seng nilahẹ u Mawu Ruata.
10 Kai i sire e mal᷊aing harusẹ̌be wanikateng kal᷊imona, kụ kereu i sire nal᷊ahẹu mamben tawe kasasěngkul᷊ang ute, wuhụe i sire makapẹ̌koạ munara tumatimbang u jamaatẹ̌ e.
11 Kawing i sire mal᷊aing harusẹ̌ taumata mapia, bal᷊inewe tahapẹ̌silontahẹ̌. I sire harusẹ̌be masingkạ měndiagạ batangeng dingangu matul᷊idẹ̌ su patikụ sạbarang.
12 Tumatimbangu jamaatẹ̌ e harusẹ̌be kětạeng sěngkatau kawinge. I sie harusẹ̌be masingkạ mamihing manga anạe ringangu ral᷊ohom bal᷊ene pakapia.
13 I sai-sain mẹ̌tẹ̌tangkiang mapia su jamaatẹ̌ e, sarung lahunggeětang mase měngkate wahani mahumbisarang hal᷊ẹ̌ u pangangimang i sire si Kristus.
14 Iạ e mělěharapẹ̌ semben tạ karěngụe lai iạ sarung makapẹ̌tiwo si kamene. Kai maningbe kerene, iạ delaing manurat'u ini si kamene,
15 tadeạu kamageng iạ e nal᷊ongge ute, i kau e sembeng masingkạ u kereapa i kitẹ harusẹ̌ mẹ̌biahẹ̌ kere anạ u sěmbaụ su ral᷊ungu Mawu Ruata, kụ kai jamạat'u Mawu Ruata e wiahẹ̌. Kụ kai jamaatẹ̌ ini e dihi měpudẹ̌ kinaianengu katěngadu Mawu Ruata.
16 Tawẹu sarang sěngkatau makapẹ̌sunial᷊u kai apa kasaria lẹ̌lirungu agamang kitẹ e: I Sie nělahẹu watangenge su ral᷊ungu ghěsin taumata, ringangu mapakal᷊ětạu katěngadẹ̌ su Rohkẹ̌ u Ruata ringangu kinasilon manga malaekatẹ̌. Habare nipěluntingihe sutal᷊oaran bansa, kụ i Sie pinangimangeng su patikụ dunia ringangu nihengkẹ su sorga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA