Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ini bala luk matu: Kudeng seburur lemulun sikal ku kekamen lun rayeh sidang, idi ieh pian ku kekamen luk do'.
2 Ngaceku ineh do' lun rayeh sidang ineh na nganau' sala'. Do' ieh ngalap sebuleng awan mo', idi ngimet bururneh dengan terawé luk lutep. Do' ieh maya' amung-amung luk petulu, idi nganak nelun sakai. Do' ieh mileh mada'.
3 Na ieh miak mangun ku lemulun luk mabuk idi luk pekedaluh, iamo' do' ieh mulai niat, idi mebeneh niat. Na ieh miak melili ku usin.
4 Do' ieh ngasa' uang tetek ruma'neh dengan meriput, idi mada' anak-anakneh maya' ukumneh idi ngedita' neneh.
5 Kudeng seburur lemulun na mileh ngimet uang tetek ruma'neh sebuleng, kudeng apehké ieh miak matar sidang Allah?
6 Aleg ieh seburur lemulun luk baruh-baruh ngalap Yésus, pad ieh na miak ngerayeh bururneh idi mekaneh ukum Iblis.
7 Idi do' ieh lemulun luk buren lun luk na manu, pad ieh na mekaneh useh idi abpung Iblis.
8 Kudeng ineh teh do' amung-amung lun ngasa' sidang ineh mepiteb, aleg perapid dila', aleg ideh melili ku luk inan mabuk. Idi aleg melili ku binaweh.
9 Do' ideh ngimet bada' luk matu luk ginala' Allah dengan anu idi teruayen niat luk do'.
10 Idi do' ideh tetunin atun. Idi kudeng ideh na mesala', do' ideh ngimet kekamen ngasa' sidang ineh.
11 Kudeng ineh teh do' awandeh mepiteb, idi na ngatum bala, idi do' ideh ngimet bururdeh idi lutep bang luk amung-amung.
12 Idi do' lun ngasa' sidang ineh ngalap sebuleng awan mo', idi ngasa' anak-anakneh idi uang tetek ruma'neh dengan meriput.
13 Lun luk ngasa' sidang do'-do' miak buren lun baken, idi ideh mekuu mada' ratnan anu tau inan Yésus Keristus.
14 Kareb ui ngayud surat ini kuanmu ui merapet miak macing namu teh dengan mesaget.
15 Iamo' kudeng ui mio, idi iko miak kali' kudeng apeh ulun lemulun bang ruma' Allah, ieh ineh sidang Allah luk mulun, sebuleng diri idi tuked ratnan luk matu.
16 Idi rayehneh luk inalum ineh ratnan baya' tau na miak belén. Ieh pangeh linigan bang burur lemulun, idi inau' matu ratnan Roh, idi ginala' kuan melaikat-melaikat. Ieh bida' arang amung-amung pupu, idi inan merapet bang tana', idi inuit umak dengan rayeh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA