Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto! Ngini ma sirete nianako gee ngomi nginioka miaika ge'ena 'amia manarama de ma faedaaka.

² Ngini nianako gee ngomi komioboawasi nginika 'o Tesalonikaka, ngomi misikisaakau de misela-sela 'o Filipioka. Ma ngaro manga gudai komisidabiwa miositotara 'o Habari ma Owa, ma ma Jo'oungu ma Dutu wokulakau ngomino 'o moroini ma ngale miositotara nginika 'o Habari ma Owa 'unano.

³ Ngomi minidongose la niongaku 'o Habari ma Owa ge'ena ko 'o ngelukuwa, de mita 'amia dumutu ge'ena 'itiai, so kominisihagawa.

⁴ Ngomi miobicara ma dumutu ka 'o nyawawa manga singina miosisanangi, ma 'ena to ma Jo'oungu ma Dutu 'awi singina miosisanangi. 'Unau ge'ena watailokau 'amia singina ma ngale walega ma diai so wanakokau 'amia singina. Ge'enau so 'una wamaoku ngomi 'idadi miosihabari 'o Habari ma Owa ge'ena.

⁵ Ngini ma sirete nianako ngomi koma'iwa miobi-bicara 'amia demo-demo ka gee 'o nyawa yodua-duaka bolo kamimadidumu 'amia dumutu 'ito-torou ma ngale miomau mimadamake 'o kianikia nginino. Ma Jo'oungu ma Dutu ma sirete wanako 'amia singina!

⁶ Ngomi miooluku miomanarama ma dumutu ka ngini bolo 'o nyawa 'iregu minisiie ngomino. Ngaro ma Kristus 'awi su-suloko ge'ena tanu yadaene ngomi kaidadi mioga'asoko 'o kianikia nginika,

⁷ ma ngomi mia singina 'ima'ai ma 'orasi ngomi nginioka, 'isoka 'o 'esa mimoi 'ami ngowa-ngowaka ma di-dingoono maleleani.

⁸ Sababu minisibosono, so ngomi de mia singina 'isa-sanangi minisitotara 'o Habari ma Owa ma Jo'oungu ma Dutuno. De duga kage'enawa, so 'ena 'amia 'ahu mita minikula, sababu minidora ma sala!

⁹ Ma raiokau kaniongano-nganonosi kokia ngomi miomariwo ma sala miomanarama. Ngomi miomagae ma sala miomanarama la ka moi ma 'uwa minisitubuso nginika gee ma 'orasi ngomi minisitotara 'o Habari ma Owa ma Jo'oungu ma Dutuno.

¹⁰ Nginiou de mita ma Jo'oungu ma Dutu nianako to ngomi mia 'ahu 'itebini, 'itiai de koi'iwa mia sala nginika gee niongaku-ngakuokau ma Kristusika.

¹¹ Ngini nianako ngomi minidiai nginika moi-moi 'isoka 'o dea wimoi wakidiai 'awi ngowa-ngowaika.

¹² Ngomi minidongose ma ngale miosikuata 'ania singina de nia ngo-ngaku, minibabata de minisigegoto la nio'ahu niasanangi ma Jo'oungu ma Dutu 'awi singina. Sababu 'una wini'asoko ma ngale niomoteke 'awi pareta ma sigoronaka gee posironga 'ikumatioka.

¹³ Gee ngomi miositotara nginika 'o habari ma Jo'oungu ma Dutuno, ngini niongaku 'ato 'o habari ge'ena ko 'o nyawanowa ma 'ena ma gou-goungu ma Jo'oungu ma Dutuno. 'O habari ge'enau gee 'imanarama nginioka niongaku-ngaku ma Kristusika ma ngale nia'ahu 'isidiai. Ge'enau so ngomi kaitaurika mio'amalaha ma Jo'oungu ma Dutuka.

¹⁴ 'Esa moi riaka dodoto. 'Isoka kokia naga yosangisarakau 'o nyawa yongaku-ngaku ma Jo'oungu ma Dutuka ge'ena la to ma Yesus Kristus 'awi nyawa 'o Yudeaka, koge'enali mita ngini. Ngini niosangisara sababu ka to ngini ma sirete nia nyawa nisisangisara, 'isoka 'o nyawa yongaku-ngaku ma Jo'oungu ma Dutuka 'o Yudeaka, 'ona yosangisara sababu 'o Yahudi ma nyawa.

¹⁵ 'O Yahudi ma nyawa go'ona ma sira yakito'oma 'o nabii-nabii, de mita wito'oma ma Jou Yesus 'asa de misikisaa ngomi. 'Ona koyakalesanguwa 'okia naga gee ma Jo'oungu ma Dutu 'awi singina yadae-daene, de yamusu 'o nyawa 'iodumu.

¹⁶ De 'ona mikatatoko miosihabari ma Jo'oungu ma Dutu 'awi demo 'o nyawa-nyawaka gee ko 'o Yahudiokawa, gee 'idadi yakisilaha sababu 'o habari ge'ena. De ge'enau 'o Yahudioka go'ona kayaga-ganapu manga so-sowono sigado ma no-noimi 'itotomo. De ne'ena ma duanguku 'ona yakidaene ma Jo'oungu ma Dutu 'awi gorosau.

¹⁷ Ma 'Esa moi riaka dodoto, gee ngone pomakati-tingaokasi 'o 'orasi moi, duga ngaro pomakakurutoka ma kaminisi-singina. Ngomi mioduaka ma sala pomakamakeli so ngomi mimariwo ma sala miomau miaikali la pomakamakeli.

¹⁸ Ngomi mia singinaka miaika nginika, so ngoi 'o Paulus tosigali-galiou tositaili taikali ma 'o Tokata ma Koana mikatatoko.

¹⁹ Ngoi tomau taikali nginika sababu nginiou to ngomi mia singina nganono de miodo-domorene. Sababu dua nako ma Jou Yesus woboali de ngone potaari 'unaka, ge'ena nginiou dua to ngomi mia singina niosisanangi!

²⁰ Ma gou-goungu nginiou so ngomi mia singina 'iamoko de miomorene.

1 Tesalonika

Video 1 Tesalonika 2

Ikuti Kami:

KONTAK | PARTISIPASI | DONASI