Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ya'ami ira talifusõ! Mi'ila samõsa wa no tenga zayazaya gõlõ we'amõima ba khõmi.
2 Noa sa aboto ba dõdõmi, wa fatua lõ si mõi ndra'aga ba khõmi ba Desalonika, no lafakao ba la'osiwawõi ndra'aga ba Wilifi. Ba hew̃a'ae ato niha solaw̃a ya'aga, ba no Ibe'e barani ndra'aga Lowalangi ba wangombakha Turia Somuso Dõdõ andrõ soroi khõ-Nia.
3 Tenga ba wa'elungu mudõnisi ami; tenga gõi wa so gohitõ dõdõma si lõ sõkhi, ma ba wolimo ya'ami.
4 Lõ'õ! Lõ muhede ndra'aga ba wangomusoi'õ tõdõ niha. Muhede ndra'aga ba wangomusoi'õ tõdõ Lowalangi, no Ibe'e sinangea ndra'aga Lowalangi ba wangombakha Turia Somuso Dõdõ andrõ. Lowalangi samõsa zi no manandraigõ tõdõma.
5 Mi'ila samõsa wa lõ irai malau li nihaogõ ba ma marõrõ ami ba wamini'õ ohitõ dõdõma ba wangalui hare. Lowalangi zangila!
6 Lõ gõi ma'alui zumangema ba niha, he ba khõmi ba he ba niha bõ'õ. Sindruhunia tola manõ sa ma'andrõ hadia ia moroi khõmi, me no sinenge Keriso ndra'aga.
7 Ba lõ omasiga malau da'õ. Me so ndra'aga ba khõmi, ba no mahaogõhaogõ manõ, hulõ nina sondrorogõ ononia.
8 Bõrõ wa'omasi si so khõma, aoha gõlõma ba wanehegõ khõmi tenga ha Turia Somuso Dõdõ andrõ soroi Lowalangi, no nosoma gõi. Bõrõ me no omasi sibai ndra'aga ami!
9 Tatu lõ olifu ami hewisa wa'erege dõdõma wohalõw̃õ ba fanaõgõma fa'afõkhõ. Bongi ma'õkhõ mohalõhalõw̃õ ndra'aga, ena'õ samõsa lõ sabu tõdõ ba khõmi, sagõtõ fanuriaigõma Turia Somuso Dõdõ soroi Lowalangi ba khõmi.
10 Ba ma'o'aurifagõ wa'auri ni'amoni'õ ba khõmi, si no mamati khõ Keriso, satulõ ba si lõ sinegu, si no mamati khõ Keriso. Ya'ami zangila ya'aga, si manõ gõi Lowalangi.
11 Mi'ila wa no malau khõmi zi mane nilau nama ba ndraononia.
12 Ma'amenesi ami, mafarou dõdõmi ba ma'andrõ sibai ena'õ mi'o'õ zomasi Lowalangi. No Ikaoni ami Lowalangi tobali ono mbanua wamatõrõ-Nia awõ ba wamatõfa ba dõdõmi howuhowu famatõrõ-Nia andrõ solakhõmi.
13 So sambua tõ danõ bõ'õ wa lõ mamalõmalõ ma'andrõ saohagõlõ khõ Lowalangi. Ya'ia wa me luo ma'ombakha'õ daroma li Lowalangi ba khõmi, no mitema daroma li andrõ, tenga si mane taroma li niha, no si mane taroma li Lowalangi. Lowalangi zohalõw̃õ bakha ba dõdõmi, ya'ami si no mamati khõ Keriso.
14 Ya'ami ira talifusõ! Si no mitõrõ andrõ, ba no gõi latõrõ ya'ira banua Lowalangi ba Yudea, si no okhõta Yesu Keriso. Falukha ami wamakao nilau mbanuami khõmi, hulõ zi falukha mbanua Lowalangi ba Yudea andrõ bõrõ wolau niha Yahudi.
15 Ya'ira andrõ zi no mamunu So'aya Yesu awõ ndra sama'ele'õ, ba samakao ya'aga gõi. La'uduni fefu niha, ba ma'ifu lõ omasi Lowalangi khõra.
16 Ya'ira zanenaw̃a ya'aga ba wangombakha turia andrõ ba niha si tenga Yahudi, ba wangorifi ya'ira. Bõrõ da'õ itugu lanõnõ manõ horõra ya'ira niha Yahudi irege afõnu. Iada'e ba no gõna ira fõnu Lowalangi!
17 Ba ya'ami ira talifusõ, i'otarai me no fabali ndra'aga khõmi si lõ arara -- arõu ba hõrõ ba ahatõ ba dõdõ -- no humulu sibai dõdõma wangondrasi ya'ami ba ma'odõdõgõ sibai ena'õ falukha nasa ndra'aga khõmi!
18 No so ba dõdõma we'amõi mangondrasi ya'ami; ba ya'o Faulo, no tõra samuza utandraigõ, ba no iba'agõ Afõkha.
19 Ha ya'ami dõtõnafõma ba fa'omuso dõdõma. Bõrõ na so Zo'aya Yesu dania, ba mõi ita fõna-Nia, ba ya'ami dania zi tobali fanunoma!
20 Ya'ami lakhõmima ba fa'omuso dõdõma!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA