Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O senina-senina, ietehndu maka kerehen kami ku kam e labo sia-sia.
2 Ietehndu ope denga kami reh ndahi kam ku Tesalonika nggo leben kami isiksa dingen igombang-gombangi kalak i Pilipi. Tapi ipetetap Dibatanta ukur kami guna nuriken Berita Si Mehuli man bandu, e me Berita Si Mehuli si reh i bas Ia nari, aminna pe erbage-bage kiniseran si man bentasen.
3 Kata pengajuk si isehken kami man bandu labo erpalasken kepapaken, ntah sura-sura si la mehuli. Labo ate kami nipu ise pe.
4 Tapi kami tetap ngerana rikutken si ngena ate Dibata, sabap nggo ipetunggung Dibata kami guna meritaken Berita Si Mehuli e. Kami ngerana labo gelah ngena ate manusia, tapi gelah ngena ate Dibata, si nguji sura-sura ukur kami.
5 Tangkas ietehndu labo alu ranan medate kami reh ndahi kam, ntah pe pekulah-kulah nutupi kinirangapen kami. Dibata jadi saksi.
6 Labo kami ersura-sura gelah ipujiken kalak, subuk i bas kam nari ntah i bas kalak si deban nari,
7 aminna pe lit hak kami mindo kai-kai pe i bas kam nari erkiteken kami rasul Kristus. Tapi asum kami i tengah-tengahndu melias kami man bandu, bagi sekalak nande nandangi anakna.
8 Erdandanken kelengna ate kami nandangi kam meriah ukur kami merekenca man bandu labo Berita Si Mehuli si rehna i bas Dibata nari saja tapi geluh kami pe. Keleng kal ate kami kam!
9 O senina-senina, tentu ingetndu denga kelatihen kami erdahin! Erdahin kami suari ras berngi gelah ula kami jadi tanggungenndu kidekah kami meritaken Berita Si Mehuli si rehna i bas Dibata nari man bandu.
10 Kam me saksi kami, bage pe Dibata; lagu langkah kami man bandu, kam si tek man Jesus Kristus mehuli nge, bujur dingen la salah.
11 Ietehndu kai si ibahan kami man bandu sekalak-sekalak bali ras perbahanen sekalak bapa nandangi anak-anakna.
12 Iajuk kami kam dingen ipetetap kami ukurndu, bage pe ipindo kami gelah kam nggeluh rikutken si ngena ate Dibata, e me Dibata si ndilo kam gelah ikut ngenanami kemalemen ate i bas KinirajanNa ras KemulianNa.
13 Janah lit denga sabap si deban si erbahanca kami tetap ngataken bujur man Dibata. Asum iberitaken kami man bandu Kata Dibata, ibegikenndu dingen ialokenndu Kata e labo bagi kata si rehna i bas manusia nari tapi bagi Kata si rehna i bas Dibata nari. Janah si tuhuna kin Kata e i bas Dibata nari. Sabap Dibata sangana erdahin i bas kam si tek man BaNa.
14 O senina-seninangku, kai si nggo inanamindu bali me ras kai si nggo inanami perpulungen-perpulungen Dibata si lit i Judea, e me kalak si nggo jadi sikerajangen Kristus Jesus i jah. Kam pe ngenanami kiniseran-kiniseran si rehna i bas bangsandu nari bagi kalak e nggo ngenanami kiniseran i bas kalak Jahudi nari,
15 e me kalak Jahudi si munuh Tuhan Jesus ras nabi-nabi, dingen si niksa kami. Seh kal jahatna ia i lebe-lebe Dibata! Ise pe jadi imbangna.
16 Tole pe, iambatina atena kami meritaken Berita si maba keselamaten e man bangsa si deban. Alu kejahatenna e itambahi kalak Jahudi e ku dosa-dosa si ibahanna gelgel nari seh nggo dem kal. Emaka genduari ia nggo kena pernembeh ate Dibata.
17 Tapi kami, o senina-senina asum kami sirang kentisik ras kam labo i bas ukur, tapi i bas kula ngenca. Metedeh kal ate kami nandangi kam! Janah usahaken kami kal ndahi kam mulihi.
18 Ersura-sura kal kami gelah jumpa mulihi ras kam. Aku, Paulus, la sekali ngenca ersura-sura gelah mulihi ndahi kam, tapi iambati Iblis kami.
19 Ma kin kam nge pengarapen ras keriahen kami, sabap kam la kurang asangken kalak si deban? Erdandanken kam me maka megah iakap kami kerna kemenangen kami i lebe-lebe Tuhanta Jesus asum Ia reh pagi.
20 Tuhu-tuhu kam me erbahanca megah dingen meriah iakap kami.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA