Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i, komi mangansani bae batuanginya tempo kami mayunu resi komi seore.
2 Apa komi mangansani seja mangkonong palaong to mawali resi kami nja’u kota Pilipi ri tempo kami tawa rata resi komi. Tempo etu kami nasesai pasi narunes ntau Pilipi etu. Pei nempo ewa wetu, i Pue Allah mampakaroso raya mami see kami taa meka yau damampakarebaka resi komi kareba matao to yako resi Ia. Wali see naka nempo boros tau ri kota Tesalonika etu to mangewa seja, pei kami tiroo maroso raya mami mampakarebaka resi komi kareba matao.
3 Naka pei maroso raya mami mampakarebaka resi komi kareba matao apa kareba etu monso pu’u. Pasi kami tare songka to maja’a, pasi taa seja rani mangakal komi.
4 Kasimbalinya yako etu, raya mami roomo nakita i mPue Allah pasi Ia manganto’o kami masipato rasarumakaka mangangkeni kareba matao. Wali kami mangika palaong to etu si’a damampakasanang to lino, damampakasanang i Pue Allah to mangkita raya mami semo.
5 Pasi komi mangansani kami tare mangamomis komi seore. Pasi kami taa seja re’e songka rani mangakal komi see damangarata kasugi yako resi komi. I Pue Allah semo matamanasa mami.
6 Pasi kami taa rani nabarong ngkomi bara nabarong ntau to yusa. Kamonsonya kami to pomakau i ngKerisitu, kami masipato marapi sawang yako resi komi, pei kami taa mangika ewa wetu. Kami ojo manganto’oka komi kareba matao semo.
7 Ewa naika nu indo mangararamaka ananya, ewa see kuika resi komi.
8 Apa kami mamporayang kojo komi. See naka kami masanang si’a ojo mampakarebaka resi komi kareba matao yako resi i Pue Allah. Kami nempo tuwu nempo mate, buya raya mami mangansawang komi apa bae kojo pamporayang mami resi komi.
9 Wali a’i-a’i, komi mangansani kami tare mamporapi bara kesaa yako resi komi seore. Komi bara tawa mangkalingan ewa wimba kabeunya palaong mami tempo kami maroo ri oyo ngkomi seore. Tempo etu kami mangika palaong i mPue, pei kami wuri eo mapalaong seja see damangarata anu to danapake mami. Kami mangika ewa wetu see taa damampakabeu palaong ngkomi ri rayanya kami mampakarebaka resi komi kareba matao yako resi i Pue Allah.
10 Wali komi pasi i Pue Allah seja mawali matamanasa mangkonong lengko ngkatuwu mami tempo kami maroo ri oyo ngkomi to mangaya nja’u ria seore. Lengko ngkatuwu mami etu lengko to masipato naika ntau to i Pue Allah Puenya. Pasi lengko mami etu singkonong pei i Pue Allah pasi tare to maya rapakasala.
11 Pasi komi mangansani, ewa wimba naika mpa’a resi ananya, ewa wetu seja naika mami resi komi. Kami mampaposiaka komi pasi mampakaroso raya ngkomi pasi mamporapika kojo resi komi
12 see komi damangika lengko ngkatuwu to singkonong pei i Pue Allah. Apa Ia roomo mampokio komi damawali seja tau to Ia Makolenya pasi to mangarata seja kayawaNya.
13 Wali kami tare seja pandoonya manganto’oka i Pue Allah tarima matao apa tempo kami mampaponsanika resi komi tuntu i mPue Allah seore, komi manasa kareba etu yako resi i Pue Allah semo. Komi taa mampobuuka kareba etu ojo yako resi to lino. Wali see naka tempo komi mangandonge, komi masanang mangantima apa kareba etu monso pu’u tuntu i mPue Allah to mapalaong ri raya ngkita to mangaya.
14 A’i-a’i, manasa komi roomo mangantima kareba etu apa komi roomo mawali ewa tau to mangaya i Pue Allah to siromu ri lipu-lipu nja’u tana Yudea. Komi sewaju ewa sira apa palaong to mawali resi komi sewaju ewa palaong to mawali resi tau to samba’a pei i Kerisitu Yesu to nja’u Yudea etu. Etu semo, komi nasesai nu yunu ngkomi to si’a to Yahudi sewaju ewa to Yudea etu nasesai ntau paka siraja.
15 Pei si’a ojo sira to nasesai nto Yahudi etu. Apa to Yahudi semo to mampopate yau i Pue Yesu seore, pasi mampopate yau seja to pantuntu tuntu i mPue Allah to napokau i mPue Allah resi sira tempo owi. Pasi sira mangarubak seja kami. Wali tau etu taa kojo mampakasanang i Pue Allah pasi sira mangewa samparia tau.
16 Kamonsonya kami rani mampakarebaka resi tau to si’a to Yahudi kareba matao to maya mampalaes sira. Pei to Yahudi etu sangkani mangaliwu jaya damangaba’a palaong mami etu. Wali kanjo’u-njo’u kapari-pari dosa to naika nto Yahudi etu, see naka i Pue Allah mangepe ganam. Ia tamo re’e sabaraNya. Wali kapura-puranya sira ojo mangarata huku apa i Pue Allah maja’a nakita dosa. Wali etu semo mangkonong to Yahudi to mangewa kareba matao.
17 Pei ane mangkonong kita, a’i-a’i, tawa masae yako paga’a ngkita seore, mula wo’u mawongko raya mami resi komi. Pei nempo kita mamolongko, pei raya mami tiroo re’e siwaka pei komi apa tare pandoonya kami mampobuuka komi. Wali apa saba kami mawongko raya, see naka kami mangaliwu kojo jaya see maya yau makawongko resi komi.
18 Wali kami rani kojo yau resi komi, pasi aku, i Paulus, malagi ngkani mansongka dayau. Pei i Kepala Measa sangkani mangantalas kami see taa mawali.
19 Kami rani kojo simparata wo’u pei komi apa saba komi semo naka pei re’e kandende ndaya mami. Pasi apa saba komi naka pei kami mansarumaka i Pue Ia re’e to danawaika kami. Apa komi raparapaka ewa dale to narata ntau to menang. Wali apa saba komi semo naka pei kami damasanang kojo raya mami mampotango i Pue Yesu Kerisitu ane ratamo tempo danakama’i.
20 Wali monso pu’u apa saba komi see naka kami rabarong. Pasi apa saba komi see naka kami ndende raya mami.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA