Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Oih sudaro-sudaro! Angku-angku sandiri tawu, baraso indak siyo-siyo sajo doh kadatangan kami kabake angku-angku.

² Angku-angku tawu, baraso sabalun kami datang ka Tesalonika, kami lah di aniayo, sarato lah dihino di Filipi. Tapi, biyapun sambuah urang nan malawan kami, nan Allah kito lah mambarikan kabaranian kabake kami, untuak mambaritokan Injil nan barasa dari Baliau, kabake angku-angku.

³ Kami ma ajak angku-angku, bukannyo suatu nan kaliru; indak pulo doh jo mukasuik nan indak barasiah, atau untuak mangicuah.

⁴ Indak! Kami mangecek indak untuak manyanangkan ati urang doh, tapi untuak manyanangkan ati Allah, nan ma uji ati kami. Dek karano, kami di anggap patuik dek Allah untuak malewakan Injil.

⁵ Angku-angku sandiri tawu, baraso indak panah doh kami bamuluik manih, atau mangicuah angku-angku, untuak mangalimbuni mukasuik-mukasuik kami nan cangok. Allah sandirilah sasinyo!

⁶ Kami indak ba usawo pulo doh, untuak mancari pujian dari urang -- biya dari angku-angku, ataupun dari urang lain. Sabananyo sabagai rasul Isa Almasih, kami buliah sajo manuntuik sasuatu dari angku-angku.

⁷ Tapi, kami basikap lamah lambuik, dikutiko kami di adok-an angku-angku, samo jo bakcando surang mandeh nan mangasuah anak-anaknyo.

⁸ Dek karano kasiah sayang kami, kami basadiyo mambarikan kabake angku-angku, indak hanyo Injil nan dari Allah, tapi, iduik kami pun, kami barikan. Dek karano kami sangaik mangasiahi angku-angku!

⁹ Tantu layi takana juwo lai di angku-angku, baa ka gigiahnyo kami ba usawo sarato jo bajuwang. Siang malam kami bakarajo, supayo kami indak manggaduah surang juwo di antaro angku-angku, dikutiko kami malewakan Injil nan dari Allah kabake angku-angku.

¹⁰ Kami iduik sacaro suci, bana, sarato indak bacacek di adok-an angku-angku nan lah ba iman kapado Isa Almasih. Angku-angkulah sasi-sasi kami, baitu pulo Allah.

¹¹ Angku-angku tawu, baraso satiyok angku-angku, kami jadikan samo jo bakcando surang apak kabake anak-anaknyo.

¹² Angku-angku kami nasiyaik-i, kami agiah dorongan, kami sasakkan angku-angku, supayo iduik manuruik ka inginan Allah, sainggo manyanangkan ati Baliau. Dek karano, Allah lah mamanggie angku-angku, untuak masuak Karajaan, sarato jo kamuliaan-Nyo.

¹³ Ado ciyek lai parkaro nan lain, nan mambuwek kami taruih batarimo kasih kapado Allah. Nan kami mukasuikkan iyolah, dikutiko kami manyampaikan firman Allah, angku-angku layi namuah mandanga, sarato manarimo firman tu indak sabagai barito dari manusia doh, tapi sabagai barito nan batua-batua dari Allah. Baliaulah nan sadang bakarajo dalam diri angku-angku nan ba iman kapado Isa Almasih.

¹⁴ Oih sudaro-sudaro, masalah nan angku-angku alami, lah di alami pulo, dek jamaat-jamaat Allah nan di Yudea, nan manjadi miliak Isa Almasih. Angku-angku mangalami sansaro, dari pihak banso angku-angku sandiri, saroman pulo jo sansaro nan di alami, dek jamaat-jamaat Allah nan di Yudea tu, dari urang-urang Yahudi pulo.

¹⁵ Urang-urang tu lah nan mambunuah Tuhan Isa Almasih, nan mambunuah nabi-nabi, sarato nan ma aniayo kami. Inyo mamusuahi kasadonyo urang, Allah sabana indak suko kabake urang-urang tu.

¹⁶ Malahan inyo ma ambek-ambek kami untuak mambaritokan Injil, kabake banso-banso nan indak urang Yahudi, iyolah barito nan dapek manyalamaikkan sagalo banso tu. Jo caro nan baitu, urang-urang Yahudi tu taruih manaruih manambah dosonyo, sampai ganok bilangannyo. Akienyo, kiniko urang-urang tu ditimpo dek kutuak Allah!

¹⁷ Tapi sudaro-sudaro, sajak kami tapisah samantaro wakatu dari angku-angku -- jauah dimato, tapi dakek di ati -- kami batambah taragak jo angku-angku, kami sabana-bana ba usawo supayo kito batamu baliak!

¹⁸ Kami baniyaik payi ka tampaik angku-angku; lah ambo cubo sakali, duwo kali, tapi Ubilih ma alangi kami.

¹⁹ Sabananyo, angku-angkulah harapan kami, sarato sukocito kami. Dek karano, jikok isuak Tuhan Isa Almasih datang, kito ka mangadap Baliau, mako angku-angkulah nan ka jadi kabanggaan kami!

²⁰ Batua, angku-angkulah kabanggaan kami, sarato jo sukocito kami!

1 Tesalonika

Video 1 Tesalonika 2

Ikuti Kami:

KONTAK | PARTISIPASI | DONASI