Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ai ibotoh nasiam sandiri do, nasiam sanina, na so soya parrohnami bani nasiam.
2 Ai age pe marsitaronon hinan anjaha hona arsik hanami i Pilippi, songon na binotoh nasiam, marhinsah ni uhur do hanami ibagas Naibata, mangambilankon bani nasiam Ambilan Na Madear na humbani Naibata ibagas buei parlawanan.
3 Ia pamodahionnami, sedo ibagas hakahouon ai barang hasipahulah-hulahon barang akal-akal,
4 tapi songon na dob niakuhon ni Naibata hanami gabe haondosan ni Ambilan Na Madear in, sonai do ihatahon hanami, sedo ase harosuh hanami bani jolma, tapi bani Naibata do, siuji uhurnami.
5 Ai seng ongga hanami marhata lemes-lemes, songon na binotoh nasiam, barang marakal-akal laho mambuat arta, Naibata do saksi pasal ai;
6 barang mangindahi sangap hanami humbani jolma, atap humbani nasiam, atap humbani na legan pe, age pe songon apostel ni Kristus boi hanami namin marhatunggungon.
7 Tapi basar do hanami i tongah-tongah nasiam songon parinangon patorsa-torsa niombahni.
8 Sonai ma, halani masihol hanami bani nasiam, ihamalaskon uhurnami do mamberehon bani nasiam, sedo pitah Ambilan Na Madear in, tapi dihut do hosahnami, halani na dob holong uhurnami bani nasiam.
9 Ai idingat nasiam do, nasiam sanina, halojaon ampa hasunsahannami, arian pakon borngin do hanami marhorja, ase ulang marhaboratan age ise nasiam. Sonin do pangambilankonnami bani nasiam Ambilan Na Madear na humbani Naibata.
10 Nasiam do saksi, Naibata homa, paboa daulat, pintor anjaha seng panurakon parlahounami dompak nasiam na porsaya,
11 ai ibotoh nasiam do, sonaha hanami songon bapa hubani niombahni mamodahi nasiam sada-sada, mangojur anjaha pabijahon nasiam,
12 ase marparlahou na patut nasiam dompak Naibata, na dob mandilo nasiam hubagas harajaon-Ni ampa hasangapon-Ni.
13 Halani ai mangkatahon tarima kasih do hanami tongtong bani Naibata, ai ijalo nasiam do hata ni Naibata na binogei nasiam hun bennami, ijalo nasiam do in, sedo songon hata ni jolma, tapi songon hata ni Naibata do, ai in do in tongon, gabe marpangkorhon ibagas uhur nasiam na porsaya.
14 Nasiam sanina, na dob gabe paniru do nasiam bani kuria ni Naibata na i nagori Judea, na ibagas Kristus Jesus, ai manaron na parngit do nasiam humbani hasoman nasiam sabangsa, songon sidea na niarsik-arsik ni halak Jahudi,
15 na mambunuh Tuhan Jesus ampa nabi-nabi, na mangayak-ayak hanami anjaha na mambahen sogam ni uhur ni Naibata, imbang ni haganup jolma,
16 na manlarang hanami mangambilankon Ambilan Na Madear bani sipajuh begu-begu, ase andohar maluah sidea. Sonai ma tongtong igoki sidea suhat-suhat ni dousa ni sidea. Jadi sogop ma bani sidea ringis ai bani ujungni.
17 Ia hanami, nasiam sanina, dob lingod nasiam tongkin hun bannami lingod bani panonggor, tapi sedo bani uhur, lambin ihaporluhon hanami do marhasoman uhur na masihol tumang sihol mangidah bohi nasiam.
18 Halani ai, sihol roh do hanami marayak nasiam, ahu tene si Paulus, sahali barang dua hali, tapi tarlanglang do hanami ibahen sibolis in.
19 Ai ise do pangarapan bannami, malas ni uhur ampa sortali puji-pujian sobali nasiam i lobei ni Tuhanta Jesus Kristus bani parroh-Ni ai?
20 Tongon, nasiam do hasangapon ampa malas ni uhur bannami.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA