Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian! Side mẽsaq nenaoq bahwe kedatengan tiang pade ojok taoqde ndẽqne sie-sie.

² Side pade nenaoq bahwe sendẽqman tiang pade dateng ojok side lẽq Tesalonika, tiang pade sampun teaniaye dait tehine lẽq Pilipi. Laguq siq pertulungan Allah, tiang pade jari bani beriteang tipaq side pade Kabar Solah saq asalne lẽman Allah lẽq dalem perjuangan saq berat.

³ Sẽngaq nasẽhat tiang pade ndẽqne berasal lẽman kesesatan; dait ndẽqne ẽndah siq maksut saq ndẽq murni atao jari nipu.

⁴ Tetu-tetu ndẽqne maraq nike! Tiang pade ndẽq ngeraos jari nyenengang angen dengan, laguq jari nyenengang Allah, saq nguji atẽn tiang pade. Sẽngaq tiang pade teanggep patut siq Allah jari nyampẽang Kabar Solah nike.

⁵ Side mẽsaq nenaoq bahwe tiang pade ndẽq uwah ngeraos saq manis-manis atao ngakalang side pade jari seboq maksut-maksut serakah. Allah jari saksine!

⁶ Tiang pade ndẽq ẽndah berusahe adẽq teajum siq dengan -- timaq lẽman side pade atao dengan lain. Setetune sebagẽ rasul Almasih, tiang pade bau doang nuntut napi juaq lẽman side pade.

⁷ Laguq tiang pade secare lemah lembut sewaktu tiang araq lẽq tengaq-tengaq side pade, maraq sopoq inaq saq peliharaq bije-bijene.

⁸ Lantaran kasih sayang tiang pade, tiang pade rẽde ngebẽng side ndẽqne cume Kabar Solah saq lẽman Allah nike, laguq idup tiang pade ẽndah. Sẽngaq tiang pade tetu-tetu ngasihin side pade!

⁹ Pasti side pade masih inget berembẽ kerasne tiang pade berusahe dait bejuang. Kenjelo kekelem tiang pade begawẽan adẽq tiang pade ndẽq nyusahang sai juaq lẽman side pade sewaktu tiang pade nyebarang Kabar Solah saq lẽman Allah nike tipaq side.

¹⁰ Tiang pade idup solẽh, adil dait ndẽq araq cacat cele tipaq side pade saq sampun percaye lẽq Almasih. Side pade jari saksi-saksi tiang pade, maraq nike ẽndah Allah.

¹¹ Side pade nenaoq bahwe tiang pade perlakuang side pade sopoq-sopoq maraq sopoq amaq saq perlakuang bije-bijene.

¹² Tiang pade ngebẽng semanget tipaq side dait sanget siq tiang pade tunas adẽq side pade idup menurut pekayunan Allah, saq sampun ngemanikang side pade tame ojok dalem kerajaan dait kemuliean-Ne.

¹³ Araq malik sopoq hal lain saq miaq tiang pade tetep besyukur lẽq Allah. Sẽngaq waktu tiang pade nyampẽang berite lẽman Allah tipaq side, side pade dengah dait nerimaq Manik Allah nike ndẽqne sebagẽ berite lẽman manusie, laguq sebagẽ berite saq tetu-tetu lẽman Allah, saq kenyeke bekarye lẽq dalem diriqde saq percaye lẽq Almasih.

¹⁴ Semeton senamian, hal saq side pade alamin sampun ẽndah tealamin siq jemaah-jemaah Allah lẽq Yudea saq jari dowẽn Deside Isa Almasih. Side pade ngalamin penderitean lẽman bangsende mẽsaq, pade maraq saq tealamin siq jemaah-jemaah Allah lẽq Yudea nike lẽman dengan-dengan Yahudi.

¹⁵ Dengan-dengan nike saq nyematẽq Junjungan Saq Mulie Deside Isa dait nabi-nabi, dait nganiaye tiang pade. Napi saq nyenengang Allah ndẽq ie pade peduli dait selapuq manusie ie pade musuhin.

¹⁶ Malahan ie pade berusahe ngalangin tiang pade jari beriteang Manik Allah tipaq dengan bangse-bangse lain adẽq ie pade mauq keselametan. Siq care nike ie pade terus sayan ngeromboq dose-dose ie pade jangke genep jumlahne. Dait mangkin ie pade tetimpe siq murke Allah.

¹⁷ Laguq semeton senamian, sementare waktu tiang jaoq lẽman side pade -- jaoq lẽq mate laguq rapet lẽq angen -- tiang pade sayan kangen kance side dait tetu-tetu berusahe jari jangoq side pade!

¹⁸ Tiang pade beniat lumbar jangoq side pade; dait tiang sampun berusahe, laguq Belis ngalangin tiang pade.

¹⁹ Setetune side pade harepan dait sukecite tiang pade. Sẽngaq ẽraq lamun Junjungante Saq Mulie Deside Isa rauh, dait ite parek lẽq arepan-Ne, make side pade saq gen jari kebanggean tiang pade.

²⁰ Mule side pade niki saq jari kemuliean dait sukecite tiang pade.

1 Tesalonika

Video 1 Tesalonika 2

Ikuti Kami:

KONTAK | PARTISIPASI | DONASI