Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i, aku rani magombo mangkonong doi to raporomung damangansawang tau to i Pue Allah Puenya. Wali aku rani komi mangalulu seja porenta to aku manganto’oka tau to mangaya nja’u Galatia.
2 Wali ponto-ponto eo Minggu aku rani komi samba’a pei samba’a mamporomung yami doi. Tau to bae doi to narata nsira, masipato mamporomung doi bae sangkodi, pei tau to taa bae doi narata nsira masipato mamporomung doi nempo taa bae kojo. Wali ewa see raika see ane tempo aku rata resi komi, kita tamo parluu mamporomung wo’u doi apa re’e yami raporomung.
3 Pasi tempo aku rata resi komi etu, aku damampokauka tau to nusarumaka ngkomi yau damangkeni doi to nuporomung ngkomi etu nto’u Yerusalem. Pomakau etu darawaika sura to darakenika tau ri Yerusalem see sira damanasa pomakau etu yako resi kita semo kama’inya.
4 Pasi ane masipato aku dayau seja nto’u Yerusalem, ane ewa see sira dayau sinjaya-njaya pei aku.
5 Wali aku re’e songka dayau resi komi ane roomo aku mayunu resi tau nja’u Makedonia, apa aku dayau ruyu liu nja’u ria.
6 Pasi tempo aku rata resi komi aku bara masae sangkodi maroo-roo resi komi. Aku bara damampeas kapuranya tempo loto panewa polas wo’u yako ri lipu ngkomi see komi maya mangansawang aku tempo dakukapolas etu bara imbare dakukanjo’u.
7 Wali aku tawa rani mayunu resi komi ri tempo si’i apa aku taa rani ojo sangkodija temponya kupayunu-yunu. Aku rani masae sangkodi maroo-roo resi komi ane nawaika i mPue.
8 Pei aku damaroo ri kota Epesus si’i sampe rata temponya Roa Pentakosta.
9 Apa rire boros palaong to bae kojo batuanginya to aku maya mangika nempo boros seja tau to mangewa palaong i mPue etu.
10 Wali i Timotius re’e songka dayau resi komi. Wali ane ratamo ia aku rani komi mangika matao resi ia see ia taa mampomoruka komi. Apa ia seja mangika palaong i mPue sewaju pei aku.
11 Wali ne’e rabiaka tau mangarowis ia. Pasi ane ratamo temponya ia meyoko muni yako ri oyo ngkomi, sawang ia see ia mawolili muni resi aku ri raya ngkasanang ndaya. Apa aku mangampeas ia ma’i muni sindara-ndara pei pua’i ngkita to samba’a pangaya.
12 Wali re’e wo’u to aku rani manganto’o mangkonong a’i ngkita to samba’a pangaya, i Apolos. Wali aku mamporapika kojo resi ia see ia dayau mayunu resi komi sindara-ndara pei pua’i ngkita to yusa. Pei ia bo’onya yau ri tempo si’i. Pei tempo ia yoa, tempo etu ia dayau resi komi.
13 Wali a’i-a’i, ne’e ewa tau bayore. Pakaroso pangaya ngkomi pasi pakaroso seja raya ngkomi. Ne’e meka-meka raya.
14 Pasi samparia palaong to nuika ngkomi, ika yako pamporayang ngkomi resi yunumu samba’a pei samba’a.
15 Wali komi mangansani mangkonong i Stepanus pasi tau to maroo ri banuanya. Sira semo to uyunya mangaya nja’u propinsi Akhaya, pasi sira tare yusa palaonginya yako palaong to mangansawang tau to i Pue Allah Puenya. Wali a’i-a’i kuporapika resi komi,
16 palaika tau to ewa wetu pasi samparia tau to mangansawang sira pasi to mangika seja palaong to etu.
17 Wali aku ndende kojo rayangku tempo karata i Stepanus sira togo i Fortunatus pasi i Akhaikus. Naka pei ndende rayangku apa aku kaliang kojo mampobuuka komi taa siwaka pei aku. Pei ane rata tau togo etu sira ewa mangawakil komi mayunu-yunu resi aku.
18 Apa sira re’e mampakaroso rayangku ewa naika nsira mampakaroso raya ngkomi seja. Wali masipato kita manga’angga tau to ewa wetu.
19 Wali samparia tau to mangaya i Pue to siromu nja’u lipulipu ri propinsi Asia manganto’oka aku, “To’oka to Korintus kami taa mangkalingan sira.” Pasi i Akwila sira dua i Priskila sindara-ndara pei tau to mangaya to siromu nja’u banua nsira dua manganto’o seja, “To’oka to Korintus kami taa kojo mangkalingan sira apa samba’a seja pei i Pue.”
20 Pasi samparia pua’i ngkita rire manganto’oka seja aku, “To’oka to Korintus kami taa mangkalingan sira.” Wali tempo komi simparata samba’a pei samba’a, masinengu ri kasanang ndaya ewa to masipato naika ntau to i Pue Allah Puenya.
21 Wali aku, i Paulus, taa seja mangkalingan komi. Pasi gombo to si’i aku semo mangantulis.
22 Wali i sema-sema to taa mamporayang i Pue Yesu Kerisitu, biakamo i Pue Allah mantanaa yau ia. O Pue, ma’imo!
23 Wali aku mamporapika resi i Pue Yesu see Ia mampaponsanika komi kanotoNya.
24 Wali aku kuporayang komi samparia to samba’a pei i Kerisitu Yesu. Amin. Ungkanyamo ruyu gombo si’i.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA