Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ratnan ngamung usin kuan lun manu déi' Yudia, do' muyuh maya' kudeng luk pangeh icukku kuan amung-amung sidang déi' Galatia.

² Anid-anid Aco luk inan Mudeng, do' amung-amung muyuh nganug usin bang ruma'neh sebuleng maya' kinula'neh, pad kareb ui macing na muyuh ngamung usin.

³ Kareb ui macing, idi ui miak ngecuk idé-idé luk uen muyuh ngamo dengan surat pad ideh nguit luk biré muyuh ineh amé' Yerusalim.

⁴ Idi kudeng petulu ui amé' teh, miak ideh maya' negku.

⁵ Ui sikal macing nemuyuh, kareb ui pangeh nengikak bawang Makedonia, ngaceku ui sikal amé' déi' Makedonia atun.

⁶ Ui miak tudo mio sesuut dengan muyuh, kian, tudo kareb meteneb lek, pad muyuh miak nated negku iapeh-iapeh luk ui sikal amé'.

⁷ Iamo sekua' ini na ui papu' nemuyuh, iamo' ui merapet miak tudo mio sesuut dengan muyuh kudeng Tuhan nima'.

⁸ Iamo' ui sikal tudo déi' Epesus pad macing Aco Pentakosta,

⁹ ngaceku pangeh inukab kuanku tanga' luk rayeh kuan kekamen luk do' ulek, idi inan mula' luk sikal metueh déi'.

¹⁰ Kudeng Timotius macing, nganak neneh, ngaceku ieh nganau' kekamen Tuhan mepad kudeng ui ini teh.

¹¹ Ngaceku ineh aleg nima' selemulun ngebeneh neneh. Iamo' do' muyuh nated neneh nalan dengan mawang niat, pad ieh miak lemubed amé' negku, ngaceku ui nganét neneh dengan kinanak-kinanak luk baken ineh.

¹² Ratnan kinanak tau Apolos, tuda'-tuda' kua' ui nengubuk neneh, pad ieh amé' ngikak nemuyuh dengan kinanak-kinanak ineh. Idi na ieh ngamo amé' nekini, iamo' ieh sikal macing kudeng tanga' kabin kuanneh.

¹³ Kekipedneh, matar do'-do', idi tuped meraben bang anu muyuh. Do' muyuh mekuu' idi metueh.

¹⁴ Nima' amung-amung kekamen muyuh ruen dengan awa.

¹⁵ Muyuh kali' ratnan Stepanus idi tetek ruma'neh. Ideh luk pun-pun manu inan Yésus déi' Akaya, idi ideh pangeh nemaré bururdeh pad ngasa' nelun manu. O kinanak-kinanakku, ui mutuh nemuyuh,

¹⁶ maya' kuyut lemulun luk kudeng ineh idi anid-anid lemulun luk pad-pad ngakem dengandeh.

¹⁷ Ui mawang niat ratnan acing Stepanus, Portunatus, idi Akaikus, ngaceku ideh pangeh nengelibal nemuyuh.

¹⁸ Ideh pangeh nengawang niatku idi niat muyuh pana'. Lemulun luk kudeng ineh petulu uen muyuh ngerayeh.

¹⁹ Amung-amung sidang déi' Asia maré tabi' kuan muyu. Akila idi Priskila dengan sidang luk tebubpun bang ruma' didueh maré tabi' nemuyuh bang Tuhan.

²⁰ Amung-amung kinanak luk tungé' maré tabi' kuan muyuh. Do' muyuh petabi' seburur dengan seburur dengan pebuen luk meligan.

²¹ Ui ngayud ini dengan ticu'ku sebuleng: Tabi' rat negku, Paulus.

²² Kudeng idé lemulun luk na mawa inan Tuhan ineh, nima' neneh uen ngediman. Maranata! (ilungneh, O Tuhan, amé' dengan mesaget!)

²³ Idi katu Tuhan tau Yésus Keristus ineh ngedengan nemuyuh.

²⁴ Idi awaku ngedengan nemuyuh anid-anid burur bang Keristus Yésus. Amin!

1 Korintus

Video 1 Korintus 16

Ikuti Kami:

KONTAK | PARTISIPASI | DONASI