Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kapolana, sampesuvu-sampesuvu, ane doi rapasiromumiu mombatulungi sampesuvuta sampomparasaya napakasi ri ngata Yerusalem, kana rapoviamiu muni mpo niparentaku ka todea topomparasaya ri ngata Galatia.

² Haitumo, ri eo-eo Aka saito-saito komiu simbo kana mompatani sabagia lako ri doi panggavamiu nangoseaka kadea nu asele nikavamiu. Bo doi haitu kana rabolimiu sampe yaku tou nte komiu. Nee damo makava yaku ri situ pade rapasiromumiu doi haitu.

³ Ane makava yaku, kudekei sura popaisani ka tona anu rapelisimiu, bo ira kutudu manggeni doi petulungi lako nte komiu hau ri ngata Yerusalem.

⁴ Ane rapekirimiu mabelo muni yaku hau, raporoara yaku bo mosanggani-nggani kami hau.

⁵ Maupu kupelioda ira ri propinsi Makedonia pade tou mompeinta komiu, apa yaku nonia moliu ri Makedonia mami.

⁶ Dotaku masae sakide monturo ante komiu, bara sampe maupu tempo ranindi, ala komiu mamala mantulungi yaku riara polipaku hau ri ponturo ntanina.

⁷ Yaku ledo madota aga mesai sampalai nte komiu sii-sii. Ane rapodota nTupu, yaku madota masae sakide monturo nte komiu.

⁸ Tapi hitupa yaku maroo ri ngata Efesus sampe Eo Mbaso Pentakosta,

⁹ apa nadea loga ka yaku ri sii mokarajaa anu mamala manggeni belo ka todea, naupa nadea muni topangeva yaku ri sii.

¹⁰ Ane makava ri situ i Timotius, tarimamiu mabelo ia ala matinda rarana monturo nte komiu, apa ia muni nantui pokarajaa i Pue Yesus nasimbayu mpo yaku.

¹¹ Jadi nee sampe maria tona manjauru ia. Tapi tulungimo ia mompapola polipana mabelo ala ia mamala manjili nte yaku, apa yaku nompopea kakavana ri sii nosanggani-nggani ante sampesuvu-sampesuvu sampomparasaya ntanina.

¹² Ane sampesuvuta i Apolos, nadea ngganimo nituduku tou mompelioda komiu mosanggani-nggani ante topomparasaya-topomparasaya ntanina. Tapi hitu-hitu ia dopa nadota tou. Ane maria loga nabelo ntanina ngena, pade tou ia.

¹³ Komiu kana mainga bo nee menonto momparasaya i Kristus. Komiu kana maroso bo nee maeka ka nuapa-nuapa.

¹⁴ Nuapa-nuapa rapoviamiu, poviamo ante pepotove.

¹⁵ Sampesuvu-sampesuvu, natantu nisanimiumo i Stefanus sambanua. Ira tona pamulana nomparasaya i Yesus ri propinsi Akhaya, bo ira nompasimbuku ante mpuu-mpuu rarara mantulungi todea nu Alatala. Jadi sampesuvu-sampesuvu, kuperapi nte komiu ante mpuu-mpuu raraku,

¹⁶ pekoumo nte tona ivehaitu bo nte pura-pura tona nokarajaa ntamo nosanggani-nggani nte ira nantulungi todea topomparasaya.

¹⁷ Nadamba mpuu raraku tempo i Stefanus, i Fortunatus bo i Akhaikus tumai nte yaku ri sii, sabana ira nanjambei komiu nantulungi yaku ri sii.

¹⁸ Ira nompakasana raraku nasimbayu mpo raramiu nipakasanara muni. Haitu sampe kuperapi nte komiu, bilamo tona ivehaitu!

¹⁹ Nadea tabe lako nte todea topomparasaya ri propinsi Asia. Bo tarima muni nadea tabe lako nte i Akwila bo i Priskila nosanggani-nggani ante todea topomparasaya anu nasiromu ri banuara, apa komiu pura-pura nosampesuvu sabana pomparasayamiu i Pue Yesus.

²⁰ Nadea muni tabe lako nte pura-pura topomparasaya ri sii. Posipakavotekamo tabe saito-saito ante pepotove.

²¹ Paleku mboto notulisi hitu ivei: nadea tabe lako nte yaku, i Paulus.

²² Isema-sema ledo nompotove i Pue Yesus, masurukavumo ia! Maranata- Tupu kami, kakavamo!

²³ Kuperapi i Pue Yesus mombadekei belo ka komiu.

²⁴ Yaku nompotove komiu pura-pura anu nosangu rara ante i Yesus Kristus. Tabe lako nte yaku, I Paulus

1 Korintus

Video 1 Korintus 16

Ikuti Kami:

KONTAK | PARTISIPASI | DONASI