Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Arawe hal᷊ẹ̌ u lahuwụ baụgu sěndinganeng tau Sahani e iạ kai mạul᷊ịu koạko l᷊ai kere takụ niatorẹ̌ su kal᷊awọu jamaatẹ̌ su Galatia e.
2 Su ěllo humotong apang kamisae kěnangko i kamene kěbị e pěmpěnělẹ u roitẹ̌ pẹ̌kạdodọ e tuhụ ewe ěbạ e. Komol᷊ẹ̌ko roitẹ̌ ene sarang iạ duměnta, tadeạu su tempo ene e semben tawahal᷊uasu měmpěngomol᷊ẹ̌.
3 Hẹ̌dowen iạ e seng marěnta, ute iạ e sarung měndolohu taumata kụ seng kinapulung kamene. Iạ e kai mangonggọu suratu pawawa tatonda kakěndag'i kamene e sol᷊ong Yerusalem.
4 Kụ Kereu patehang dembem mapia ute iạ mal᷊aing hinon taraị mahundingang kụ sěngkaral᷊eng dingangi sire.
5 Iạ e kai sarung mẹ̌tiwo si kamene, kereu matẹ̌pasu Makedonia, u iạ e mẹ̌kẹ̌karaki sumahe wọu ene.
6 Botonge mariadi iạ e sarung mẹ̌tanạ kạdodọ tempo ringangi kamene, arau aramanung saral᷊aing pakal᷊iun musungu matěho e. Mal᷊iung ene i kamene wotonge makapẹ̌sumbala si siạ manẹ̌pasu raral᷊eng sol᷊ong tampạ tuhụ e.
7 Iạ e tawe mapulu mẹ̌tiwo si kamene tumbạu mẹ̌totong mạtarang sẹ̌saheěng. Kereu Mawu e mapakawala ute, iạ deng mapulu mẹ̌tanạ diọ mararěnna ringangi kamene.
8 Těntal᷊ang ene e iạ deng matanạ su soa ini, su Efesus, sarang ěllong, "Katatěntungu Rohkẹ̌ u Ruata."
9 Lawọ l᷊oahe sini waụgu munara piạ kěhase, manịeng lawọ l᷊ai rụdokạ.
10 Kereu i Timotius e marěnta e, ute sěmpike wue pakapia i sie, tadeạu i sie marěpang bue sutal᷊oarang kamene, u i sie kai kere iạ mal᷊aing mẹ̌munara waụgu Mawu.
11 Kumbahangbe sarang piạu tawe měndekeng i sie. Sumbalai wue i sie tadeạu i sie makapaněpasu raral᷊enge mẹ̌sul᷊e kapia sol᷊ong anuku tạ kurange apa, watụ u iạ e mạngampal᷊ẹ̌ darěntane ringangu manga anạ u sěmbaụ bal᷊ine.
12 Arawe anạ u sěmbaụ i kitẹ i Apolos, měngkate seng apa piran sul᷊e mạul᷊ị si sie tadeạu i sie ringangu manga anạ u sěmbaụ bal᷊ine e měmpẹ̌tiwowe si kamene. Kai i sie wẹ̌dawen tawe nakạpěndang maiaking u i sie kai harusẹ̌ lighạ tamai ini. Kai tangu kereu hẹ̌dowe piạ tempone, ute tantu sarungbe ruměnta.
13 I kamene pakaral᷊ukadẹ̌ bue, ringangu pakatatoghasẹ̌ bue sural᷊engu pẹ̌bawiah'i kamene mamewẹ u tau Sahani. Pakawawahani wue ringangu měngkai pakakakuatẹ̌.
14 Apạeweng kẹ̌koateng i kamene e, koạbe ringangu pẹ̌kakakěndagẹ̌.
15 I kamene e masingkạ beng i Stefanus ringangu i sire sěmbal᷊eěng, u kai i sire kakal᷊amonaěngu němpẹ̌sowa Sahani su wanuan Akaya. I sire ringangu kaguwạu naung němpẹ̌těngkasarakang su pẹ̌tatangkiang jamạat'u Mawu.
16 Iạ e maul᷊ị si kamene ringangu sěngapam botonge tadeạu i kamene tumol᷊ewe pěmamihingu taumata kerene, ringang kewe lai i sire wal᷊ine sěhal᷊ěkang sěngkapẹ̌tangkiang si sire.
17 Iạ e mal᷊uasẹ̌ su rarěntang Stefanus, Fortunatus dingangu i Akhaikus. I sire mẹ̌sul᷊ungkelain gaghanting kamene waụgu iạ.
18 I sire e kai seng nakal᷊uasẹ̌ naungku e, kerẹewe i sire makạl᷊uasẹ̌ naung i kamene. Taumata kerene e harusẹ̌be lẹ̌arẹ̌gai.
19 Manga jamaatẹ̌ su Asia e něndohom ben tạbeạ i sire si kamene. I Akwila rẹ̌duan Priskila e ringangu jamaatẹ̌ apan němpẹ̌tampung su wal᷊en sire e mal᷊aing němpěndohon tabeạ si kamene, ual᷊ingkem pẹ̌kakauhu tau Sahani e.
20 Kěbị manga anạ u sěmbaụ sini e němpěndohon tạbeạ si kamene. Pěmpẹ̌papangadatẹ̌ bue pakakakěndagẹ̌ lawọ tau Sahani.
21 Takụ l᷊ai takidang sini tabeạku takụ niwohẹ sẹ̌saku: Tabeạ bọu iạ, i Paulus.
22 I sain ta kumakěndagẹ̌ Mawu e kapiangbe i sie mawinasa! Maranatha -- Mawung kami e děntạe!
23 Karimạko Mawu Yesus měngal᷊amatẹ̌ si kamene.
24 Kakěndagẹ̌ku e pahundingang i kamene kěbị nasěmbaụ dingangi Kristus Yesus e. Adat'i kami, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA