Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkin mengenai kẽpẽng saq side pade mẽlẽ sumbang tipaq dengan-dengan solẽh, tiang anjurang adẽq side pade laksaneang menurut petunjuk saq tiang bẽng tipaq jemaah-jemaah lẽq Galatia.

² Lẽq jelo penembẽq sebilang minggu, side pade sopoq-sopoq harus kelin kẽpẽng sesuai penghasilanne sesuai pengasilande. Toloq kẽpẽng nike jangke tiang dateng, adẽq lẽq waktu nike ndẽqne perlu malik tekumpulang.

³ Laun lamun tiang dateng, tiang gen ngutus dengan-dengan saq sampun side pade anggep patut. Tiang gen ngebẽng surat lẽq ie pade, adẽq ie pade jauq kẽpẽng sumbangan nike ojok Yerusalem.

⁴ Dait lamun teanggep kenaq tiang milu ẽndah bareng kance ie pade, make tiang gen lalo bareng kance ie pade.

⁵ Tiang gen jangoq side pade sesampun tiang liwat lẽq Makedonia, sẽngaq tiang beniat gen liwat lẽq derike.

⁶ Sang tiang gen madẽq piro jelo ngonẽqne kance side pade, atao sang sengonẽq musim telih. Sesampun nike side pade bau tulung tiang ngelanjutang kelampan tiang ojok taoq saq lainne.

⁷ Tiang ndẽq mẽlẽ jangoq side pade sekedar nyelaloq doang. Lamun Tuhan ngijinang, tiang gen ndot ngonẽqan malik kance side pade.

⁸ Laguq tiang gen ndot lẽq Epesus, jangke jelo Pentakosta,

⁹ sẽngaq lẽq deriki luwẽq kesempatan jari ngelaksaneang pegawẽan saq bemanpaat, timaq luwẽq ẽndah dengan saq nentang pegawẽan nike.

¹⁰ Lamun Timotius dateng, terimaq ie bagus-bagus adẽq ie beridap betah lẽq antare side pade, sẽngaq ie maraq tiang ẽndah begawẽan bagi Tuhan.

¹¹ Ndaq jangke araq saq ngerẽmẽhang ie. Tulung ie adẽqne bau selamet ngelanjutang kelampanne malik tulak ojok tiang, sẽngaq tiang ngantih kedatenganne bareng kance semeton-semeton saq lainne.

¹² Mengenai semetonte Apolos, sampun pire kali tiang suruq ie adẽq bareng kance semeton saq lainne lumbar jangoq side pade. Laguq ie ndẽqman merase yakin bahwe ie harus lumbar mangkin. Laguq laun lamun araq kesempatan, ie pasti gen dateng.

¹³ Side pade harus waspade dait kuat lẽq dalem iman. Ndaq takut dait harus tetep kuat.

¹⁴ Selapuq saq side pade laksaneang, laksaneang nike lẽq dalem kasih.

¹⁵ Side pasti kenal kance Stepanus dait keluargene; ie pade saq penembẽq jari percaye tipaq Almasih lẽq Akaya. Ie pade sepenoq angenne begawẽan husus jari ngelayanin dengan-dengan saq tehususang bagi Allah.

¹⁶ Keranaq nike, pade taat lẽq dengan-dengan saq maraq nike, dait dengan-dengan lain saq begawẽan dait ngelayanin bareng ie pade.

¹⁷ Tiang seneng siq kedatengan Stepanus, Portunatus dait Akaikus, sẽngaq ie pade saq nyukupang napi saq masih kurang lẽq side pade.

¹⁸ Ie pade sampun miaq angen tiang jari seneng, maraq ie pade nyenengang angen side. Keranaq nike, side pade harus hargein dengan-dengan saq maraq nike.

¹⁹ Jemaah-jemaah lẽq Asia Kodẽq nyampẽang salam tipaq side pade. Akwila kance Priskila dait jemaah saq bekumpul lẽq balẽ ie pade ẽndah ngirim salam tipaq side pade.

²⁰ Selapuq semeton lẽq deriki nyampẽang salam tipaq side pade. Pade besalam-salaman sebagẽ semeton seiman.

²¹ Tiang romboq lẽq deriki salam saq tiang tulis mẽsaq:

²² Dengan saq ndẽq ngasihin Tuhan, pasti ie tekutuk! Tuhan gen gelis rauh!

²³ Rahmat Junjungan Saq Mulie, Deside Isa Almasih araq bareng kance side.

²⁴ Kasih tiang araq bareng kance side selapuq lẽq dalem Deside Isa Almasih.

1 Korintus

Video 1 Korintus 16

Ikuti Kami:

KONTAK | PARTISIPASI | DONASI