Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sitarruhna ia tee karrempunanmi doi' la diben padanta' tomatappa' kaasi-asi jio tana Yudea la mipugauk susi to mangka kuajaran tomatappa' jio tana Galatia.

² Ianna dete' omi allo Aha', pada la misarakki to doi' la mipangben situru' assele'mi, miannai jio bolami, danggi' naratupa' mati' mimane' la nnangahhi.

³ Na ia ke ratumo' mati', la kusuai to tomipileimo, namale mbawai joo doi' de' kota Yerusalem. La miben sura' mpangpetandanni tuu lako tau, napasibawai joo doi' pangtulungan, anna male mbawai de' kota Yerusalem.

⁴ Nadikitapa kumua parallura'ka male, kumane' male sola tuu lako tau.

⁵ La malena' mati' ssikitan kamu' apa la liupa' jolo jio tana Makedonia, nasaba' kuakkattai la nnola jio.

⁶ Mbai la torropa' iti' sola kamu' masai-sai ke wattu macakke'. Mangkai joo, ke wa'dingngi, mitulungna' kupatarruh kalingkanku' umbo-umbo to kunii la male.

⁷ Te'da kumale mati' kulaleppang bangra cingga'tu', apa ia ke napuelohhi Puang la torrona' masai ssolan kamu'.

⁸ La inde' unapa' kota Efesus, namane' pangramean Pentakosta,

⁹ sanga den wattu melo inde' kunii njama jaman makkeguna, moi nabuda tau nnewalina'.

¹⁰ Ianna ratu Timotius mati', tarima meloi anna masannang torro sola kamu', nasaba' susi bang una aku' mpangjaman Puang Allataala.

¹¹ Danggi' lalo miden ngkita sere'i. Tulungngi nawa'ding mpatarruh kalingkanna nasalama' pole, sanga kutajanni sola padanta' tomatappa' inde'.

¹² Ia to padanta' tomatappa' Apolos tuli kukuanmo namale mati' sola ba'tu pira-pira padanta' tomatappa' ssitammuan kamu', apa te'dapa nasadia la ratu tee too. Apa moi nasusi joo, ianna den wattunna, la male una ia mati'.

¹³ La majaga kamu', mituru' tarruhhi to pangngajaran tongan. Barani kamu' mipamawatang tooi to kamatapparanmi.

¹⁴ Na sininna apa mipugauk, la mipugaukki sanga kasipakamojatan.

¹⁵ Ee, tomala'bihku' sola ngasan! Tantu miissen to repokkona Stefanas. Iamo tuu lako tau to pamula matappa' jio tana Akhaya, namaringngan penawanna ntulung umma'-Na Puang Allataala.

¹⁶ Meta'da tongan-tonganna' lako kamu', mituru'i to tosusi joo, sola tolaen to pada-pada mangjama ntulung tomatappa'.

¹⁷ Kupumasannang to karatuanna Stefanas, Fortunatus na Akaikus. Susi to kumua ia to karatuanna kamu' to rratuina', nasaba' gaja kukamali' kamu'.

¹⁸ Mangkamo' napamario, susi too kamu' mangka napamasannang. Iamo joo sipato' dikasiri' to tosusi joo.

¹⁹ Massallang ngasankan lako kamu' to jamaa inde' propinsi Asia Biccu'. Akwila na Priskila sola jamaa to sirempun jio bolana gaja sannangngi massallang lako padanna tomatappa' iti'.

²⁰ Ia ngasan to padanta' tomatappa' inde' kusolan massallang todai lako kamu'. Sisalama' kamu' misikamasean too, susi taun-Na tongan Puang Allataala.

²¹ Kurangngannipa ntee passallang to aku' nnuki'i. Sallangku' Paulus.

²² Ia to tocia' mpakamoja' Puang, ake'mo ditampakki ropu! Maranata, battuananna ratumiki' Puang!

²³ Dennaa upa' nabarakka'i kamu' Puang Isa!

²⁴ Kupakamoja' kamu', sininna taun-Na Puang Isa Almaseh. Padamo jolo' too. Sallangki' mati', Paulus.

1 Korintus

Video 1 Korintus 16

Ikuti Kami:

KONTAK | PARTISIPASI | DONASI