Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iada'e, sanandrõsa ba gefe somasi ami mibe'e buala ba niha si faoma faduhu tõdõ khõ Keriso, ufarou ami ena'õ milau si mane nifarougu banua Niha Keriso ba Galatia.
2 Mi'oniagõ ma'ifu gefe ero luo migu, molo'õ wa'abõlõ zamõsana. Mi'irõ'õ gefe andrõ, irege tohare ndra'o, ena'õ lõ sa'ae mu'owuloi dania na inõtõ da'õ.
3 Na no tohare ndra'o dania, ufatenge niha si no ha sara dõdõmi. Ube'e khõra zura famasao, ena'õ la'ohe gefe fanolo andrõ ba Yeruzalema.
4 Ba na sõkhi nasa na mõi ndra'o awõra, ba mõi ndra'odo awõra dania.
5 Mõi ndra'o ufalukhaisi ami na no aefa utõrõ Makedonia, bõrõ me omasido utõrõ da'õ.
6 Ma tebato ndra'o khõmi sabata dania, gasagasa mbaw̃a sokafukafu. Aefa da'õ mitolodo ena'õ utohugõ wofanõ ba nahia ganete da'õ.
7 Lõ omasido ufalukhaisi ami ha molombase manõ. Na Itehegõ So'aya, omasido torõi khõmi, ara ma'ifu.
8 Gasagasa da'õ torõi ndra'o dania ba da'e, ba Nefeso, irugi ngaluo Wendrakose.
9 Oya ginõtõ si sõkhi ba da'e ba wanga'i halõw̃õ soguna, hew̃a'ae ato niha si lõ fao tõdõ.
10 Na tohare Dimoteo, mihaogõ mitema'õ ia ena'õ terou dõdõnia wa'atorõi khõmi, bõrõ me sohalõw̃õ khõ Zo'aya ia si mane ya'odo.
11 Bõi so zangositengagõ ya'ia. Mitolo ia ena'õ tola itohugõ mangawuli wofanõnia irugi ba nahia si so ya'o lõ hadia ia, bõrõ me no ubaloi ia awõ ndra talifusõ bõ'õ.
12 Sanandrõsa khõ dalifusõda Afolo, no ha'uga kali ufarou ia ena'õ mõi ia wangondrasi ya'ami awõ ndra talifusõ bõ'õ. Ba hiza lõ fa'edõna khõnia we'amõi ba da'e. Tatu mõi ia dania, na so ginõtõ tanõ bõ'õ.
13 Bõi arõrõ ami ba mi'abe'e'õ wamatimi. Akha barani ba abõlõ ami.
14 Milau hadia ia fefu ba wa'omasi.
15 Tatu mi'ila Zitefana awõ nõsi nomonia; ya'ira zi fõfõna tobali Niha Keriso ba Akhaya. La'oigõ sibai dõdõra wohalõw̃õ ba mbanua Lowalangi.
16 Ufarou sibai dõdõmi ena'õ mi'o'õ wondrõnia'õ niha si manõ, awõ danõ bõ'õ si fa'awõ wohalõw̃õ awõra.
17 Omuso dõdõgu ba wa'atohare Zitefana, Fotunato ba Akhaiko. No salahi dalifusõ ira khõgu.
18 Sindruhundruhu no la'omusoi'õ dõdõgu, si manõ gõi dõdõmi. Lõ tola lõ'õ mufosumange niha si manõ.
19 Lafa'ema wangowaira khõmi banua Niha Keriso ba Asia. Lafa'ema wangowai fa'aniha Keriso soroi dõdõ ira Akila ba Firisikila awõ mbanua Niha Keriso sowulo ba nomora.
20 Lafa'ema wangowaira khõmi ira talifusõ ba da'e. Mifa'ema wangowaimi faoma fa'agosa bawa fa'atalifusõta soroi dõdõ.
21 Unõnõ ba da'e wangowaigu nisuragu samõsa: Ya'odo Faulo, u'owai ami.
22 Akha Ihuku Lowalangi niha si lõ mangomasi'õ So'aya Yesu! Maranatha -- So'aya ya'aga, aine khõma!
23 Ya'ifahowu'õ ami So'aya Yesu.
24 Si fao fa'omasi ba khõmi fefu si ha sambua ba khõ Keriso.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA